މޭޖާ ލީގް ސޮކާ (އެމްއެލްއެސް)ގައި އިންޓަ މަޔާމީން ކުޅޭ ފަހު މެޗަށް އާޖެންޓީނާ ތަރި ލިއޮނެލް މެސީ ޓީމާ ގުޅިއްޖެއެވެ.
އެމްއެލްއެސްގައި މިދިޔަ މަހުގެ ހަތަރުވަނަ ދުވަހު އެލްއޭ އެފްސީ އަތުން 3-1ގެ ނަތީޖާއަކުން މޮޅުވި މެޗަށްފަހު، އިންޓަ މަޔާމީއަށް އެއްވެސް މެޗެއްގައި މެސީއަށް 90 މިނެޓު ކުޅެވިފައެއް ނުވެއެވެ.
އަނިޔާއަށްފަހު މިދިޔަ އާދީއްތަ ދުވަހު އެފްސީ ސިންސިނަޓީ އަތުން 1-0ގެ ނަތީޖާއަކުން އިންޓަ މަޔާމީ ބަލިވި މެޗުގެ 35 މިނެޓު މެސީ ވަނީ ކުޅެފައެވެ. ލީގުގެ ފަހު މެޗުގައި ޗާލޮޓްއާ ދެކޮޅަށް މެސީ 90 މިނެޓު ކުޅޭނެ ކަމަށް ރިޕޯޓުތައް ބުނެއެވެ.
މިސީޒަނުގައި މެސީ ގުޅުމާއެކު ރަނގަޅު ނަތީޖާތަކެއް ނެރެ، އިންޓަ މަޔާމީން ވަނީ ލީގު ކަޕް ވެސް ކާމިޔާބުކޮށްފައެވެ. ނަމަވެސް މެސީއަށް ލިބުނު އަނިޔާއަށްފަހު، އިންޓަ މަޔާމީގެ ނަތީޖާތަކަށް ވެސް ވަނީ އެކަމުގެ އަސަރުތައް ކޮށްފައެވެ.
އެމްއެލްއެސްގައި އިންޓަ މަޔާމީން ކުޅޭ ފަހު މެޗުގައި ޗާލޮޓްއާ ދެކޮޅަށް ނުކުންނާނީ ރާއްޖޭ ގަޑިން މިރޭ 3:00 ގައެވެ. މިވަގުތު އީސްޓާން ކޮންފަރެންސް ތާވަލުގެ 14 ވަނައިގައި އޮތުމުން އެމްއެލްއެސްގެ ފައިނަލް ބުރުން އިންޓަ މަޔާމީއަށް ފުރުސަތެއް ނުލިބޭނެއެވެ.