ފީނަން އުޅުމުގެ ތެރޭގައި، ރ. ދުވާފަރު މީހަކު މިއަދު ނިޔާވެއްޖެއެވެ.
ފުލުހުން ބުނީ، އެ މީހާ ފީނަން ފޭބީ އެ އަތޮޅުގައި އޮންނަ ޔޫ އެންޑް މީ ރިޒޯޓް މޯލްޑިވްސް ކައިރިއަށް ކަމަށެވެ.
އެ މީހާ އުނގޫފާރު ހޮސްޕިޓަލަށް ގެންދިޔައީ މިއަދު 14:12 ހާއިރު ކަމަށާއި ހޮސްޕިޓަލަށް ގެންދިޔައިރު ވެސް ނިޔާވެފައިވާ ކަމަށް ފުލުހުން ބުންޏެވެ.
ދުވާފަރު ކައުންސިލްގެ ރައީސް ޙަސަން ހަކީމް "ސަން"އަށް ވިދާޅުވީ ފީނަން އުޅެނިކޮށް ނިޔާވެފައި ވަނީ އެ ރަށު އިސްމާއީލް މޫސާ، 51، ކަމަށެވެ.
އުނގޫފާރު ހޮސްޕިޓަލްގެ ސީނިއާ ކަސްޓަމާ ރިލޭޝަންސް އޮފިސަރު ހަސަން ފަޒީލް "ސަން"އަށް ވިދާޅުވީ އެ މީހާ ހޮސްޕިޓަލަށް ގެންދިޔައީ މެންދުރު ފަހު ވަގުތެއްގައި ކަމަށާއި ގެންދިޔައިރުވެސް ނިޔާވެފައިވާ ކަމަށެވެ.
ޑޮކްޓަރުންނާ ހަވާލާދެއްވައި އޭނާ ވިދާޅުވީ އެ މީހާ ނިޔާވީ ފެތިގެން ކަމަށެވެ.
ނޯޓް: އެ މީހާ މޫދަށް ފޭބީ ދުވާފަރުން ކަމަށް މީގެ ކުރިން ރިޕޯޓްކުރެވިފައި ވަނީ ހާދިސާއާ ބެހޭ ގޮތުން އެންމެ ފުރަތަމަ ލިބުނު މައުލޫމާތަށް ބިނާކޮށެވެ. އެކަމަށް ޓަކައި ކިޔުންތެރިންގެ ފަރާތުން މައާފަށް އެދެމެވެ.