ކުޑަ އިންޖީނު ދޯންޏެއްގައި އެކަނި މަހަށް ނުކުމެ އުޅެނިކޮށް އިއްޔެ ގެއްލުނު އދ. ދަނގެތި، މޫންލައިޓް، ޔޫސުފް އިބްރާހީމް އަދިވެސް ނުފެންނަ ކަމަށް އެރަށު ކައުންސިލުން ބުނެފިއެވެ.
"ސަން"އާ ވާހަކަ ދައްކަމުން އެރަށު ކައުންސިލްގެ ރައީސް މުއާވިއަތު ރަޝީދު ވިދާޅުވީ، ސިފައިންނާއި ރަށު ރައްޔިތުން ގުޅިގެން އޭނާ ހޯދުމުގެ މަސައްކަތް ވަރަށް ބުރަކޮށް ކުރާކަމަށެވެ.
މިކަމާ ގުޅިގެން ސިފައިންގެ މީޑިއާ އޮފިޝަލް ވިދާޅުވީ، ޔޫސުފް އިބްރާހީމް ހޯދުމުގެ މަސައްކަތަށް ޑޯނިއާ މަތިންދާ ބޯޓު މިހާރު ވަނީ އެ ސަރަހައްދަށް ދިއުމަށް ދަތުރު ފަށާފައިކަމަށެވެ. އަދި ކަނޑު މަގުން ވެސް އޭނާ ހޯދުމަށް މަސައްކަތް ކުރާ ކަމަށާއި މި މަސައްކަތަށް އެރަށު ގިނަ ބައެއްގެ އެހީތެރިކަން ލިބޭކަމަށް ސިފައިންގެ މީޑިއާ އޮފިޝަލް ވިދާޅުވިއެވެ.
އުމުރުން 65އަހަރަށް ވުރެ މަތިވެފައިވާ ޔޫސުފް އިބްރާހީމް ގެއްލުނުކަން ކައުންސިލާއި އާއިލާ އަދި އެރަށު މީހުންގެ ސަމާލުކަމަށް އައީ އޭނާ މަަހަށް ދިޔަ ދޯނި ހުސްކޮށް ރަށު ކައިރިން ފެނުމުންނެވެ.
އޭނާ ގެއްލުނުކަން ސިފައިންނަށް ރިޕޯޓުކޮށްފައި ވަނީ އިއްޔެ މެންދުރު 11:42 ހާއިރެވެ. އަދި ވަގުތުން ވަނީ އޭނާ ހޯދުމުގެ މަަސައްކަތް ފަށާފައެވެ.