ލަގްޒަރީ އެއާލައިން ''ބިއޯންޑް''ގެ ފުރަތަމަ ފްލައިޓް ރާއްޖެއަށް؛ ދަތުރުތައް އަންނަ މަހު ފަށަނީ

ރާއްޖޭގެ ސިމްޑީ ގުރޫޕް އަދި، ޔޫއޭއީގެ އެރަބިސްކް ކުންފުނިން އުފެއްދި "ބިއޯންޑް" އެއާލައިން ލޯންޗުކޮށް ފުރަތަމަ ފްލައިޓް މިއަދު ރާއްޖެ ގެނެސްފިއެވެ.

ރާއްޖޭގެ ފުރަތަމަ މަތީ ފަންތީގެ ލެޝާ އެއާލައިން ކަމަށްވާ ބިއޯންޑް އެއާލައިން ރަސްމީކޮށް ލޯންޗްކޮށްފައި ވަނީ، މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)ގެ ވެސް ބައިވެރިވުމާއެކު ވެލާނާ އިންޓަނޭޝަނަލް އެއާޕޯޓުގައި މިއަދު ބޭއްވި ޚާއްޞަ ހަފުލާއެއްގައެވެ.

މި އެއާލައިންގެ ފުރަތަމަ ފްލައިޓް މިއަދު މެންދުރު 12:30ގައި ވަނީ ވެލާނާ އިންޓަނޭޝަނަލް އެއާޕޯޓުގައި ޖައްސައިފައެވެ.

މި ފްލައިޓަށް މަރުހަބާ ކިޔުމުގެ ގޮތުން ވޯޓާ ސެލިއުޓް ވެސް ވަނީ ދީފައެވެ.

"ބިއޯންޑް" އެއާލައިން ލޯންޗުކޮށް ފުރަތަމަ ފްލައިޓް މިއަދު ރާއްޖެ އައުމުން ވަނީ ވޯޓާ ސެލިއުޓަކުން މަރުހަބާ ކިޔައިފައި-- ސަން ފޮޓޯ

މި އެއާލައިންގެ ދަތުރުތަކުގައި އޭ-319 ފެމިލީގެ ބޯޓުތައް ބޭނުންކުރާއިރު މި ފްލައިޓަކީ ޖާގައިގެ ގޮތުން ތަނަވަސް ފްލައިޓެކެވެ. އަދި ފުރަތަމަ އެއާކްރާފްޓްގައި ބިޒްނަސް ކްލާސްގެ 44 ސީޓު ހިމެނެއެވެ.

ބިއޯންޑްގެ ކޮމާޝަލް އޮޕަރޭޝަންތައް ކުރިއަށް އޮތް ނޮވެމްބަރު މަހު ފަށާނެ ކަމަށް އެ އެއާލައިނުން ބުންޏެވެ. އެގޮތުން ބިއޯންޑްގެ ވެބްސައިޓު މެދުވެރިކޮށް މިހާރުން ފެށިގެން ބުކިން ހެއްދޭނެއެވެ. އެންމެ ފުރަތަމަ ދަތުރުކުރަން ހަމަޖެހިފައި ވަނީ ތިން މަންޒިލަކަށެވެ. އެއީ:

• ސައުދީ އަރަބިއްޔާ، ރިޔާދު (ފުރަތަމަ ދަތުރު ނޮވެމްބަރު 9ގައި)
• ޒިއުރިކް، ސްވިޓްޒަލެންޑް (ފުރަތަމަ ދަތުރު ނޮވެމްބަރު 17ގައި)
• މިއުނިކް، ޖާމަނީ (ފުރަތަމަ ދަތުރު ނޮވެމްބަރު 15ގައި)

ދަތުރުތަކުގެ އަގުތައް ފެށެނީ 2،000 ޑޮލަރުންނެވެ. ޔޫރަޕްގެ ގައުމުތަކުން ކުރާ ދަތުރުތަކުގެ އަގުތައް ފެށެނީ 3،800 ޔޫރޯއިންނެވެ.

ދަތުރުތައް ފަށާއިރު ދިވެހިންނަށް ޚާއްސަ އަގުތަކެއް އަދި ކަނޑައަޅާފައި ނުވާ ކަމަށް އެ އެއާލައިނުން ބުންޏެވެ. އެހެންނަމަވެސް ދަތުރުތައް ފެށުމަށް ފަހު ދިވެހިންނަށް ޚާއްސަ ޕްރޮމޯޝަންތައް ހިންގާނެ ކަމަށް ބުންޏެވެ.

އެ އެއާލައިންގެ އެންމެ ބޮޑު އަމާޒަކީ ކުރިއަށް އޮތް ފަސް އަހަރު ފްލީޓު ބޮޑުކޮށް، ދަތުރުކުރާ މަންޒިލްތައް ގިނަކުރުން ކަމަށް އެ އެއާލައިނުން ބުންޏެވެ.

"ބިއޯންޑް" އެއާލައިން ލޯންޗުކޮށް ފުރަތަމަ ފްލައިޓް މިއަދު ރާއްޖެ އައިސްފައި-- ސަން ފޮޓޯ

އެއާލައިން ލޯންޗުކުރުމުގެ ހަފުލާއަށް ފަހު ބޭއްވި ޕްރެސް ކޮންފަރެންސްގައި ވާހަކަދައްކަވަމުން ބިއޯންޑްގެ ސީއީއޯ ޓެރޯ ޓަސްކިލާ ވިދާޅުވީ ކުރިއަށް އޮތް ތަނުގައި އިތުރު މަންޒިލްތަކަށް ދަތުރުކުރުމަށް ހުޅުވާލާނެ ކަމަށެވެ. އެގޮތުން އަންނަ އަހަރުގެ މާޗު މަހުގެ ފަހުކޮޅުގައި އެ އެއާލައިންގެ ދެވަނަ ފްލައިޓުން އިތުރު ތިން މަންޒިލަކަށް ދަތުރުތައް ފަށާނެ ކަމަށް ވިދާޅުވިއެވެ. އެއީ އިޓަލީގެ މިލާންއާއި ބެންކޮކް އަދި ދުބާއީއަށެވެ.

ޓެރޯ ވިދާޅުވީ މިވަގުތު ދަތުރުކުރާ ތިން މަންޒިލަށް ބުކް ކުރެވޭނީ ހަމައެކަނި އެ އެއާލައިންގެ ވެބްސައިޓް މެދުވެރިކޮށް ކަމަށެވެ. ނަމަވެސް އެ އެއާލައިންގެ މޮބައިލް އެޕްލިކޭޝަނެއް ހެދުމުގެ މަސައްކަތް ކުރަމުންދާ ކަމަށް ވިދާޅުވިއެވެ.

ޕްރެސް ކޮންފަރެންސްގައި ވާހަކަދައްކަވަމުން ސިމްޑީ ގްރޫޕްގެ ސީއީއޯ ޑރ. މަރިޔަމް ޝަކީލާ ވިދާޅުވީ އެ އެއާލައިންގައި މަސައްކަތްކުރާ 50 ޕަސެންޓަކީ ދިވެހި މުވައްޒަފުންނަށް ހެދުމަކީ ވަރަށް ބޮޑު އުންމީދެއް ކަމަށެވެ. އެގޮތުން އެ މަސައްކަތް މިހާރު ވެސް ކުރަމުންދާ ކަމަށާއި ޚާއްސަ ގޮތެއްގައި އަންހެނުންނަށް އެ ފުރުސަތު ދީ އަންހެނުން ކުރިއެރުވުމަށް އިސްކަން ދެއްވާނެ ކަމަށް ޝަކީލާ ވިދާޅުވިއެވެ.

ބިއޯންޑް އެއާލައިންގައި މިވަގުތު މަސައްކަތްކުރާ ދިވެހި ސްޓާފުންގެ އަދަދަކީ 75ކެވެ.

މި އެއާލައިންގެ ފްލައިޓްތަކުގެ އިންޓީރިއާ ޑިޒައިން ކޮށްފައިވަނީ އެ ޚިދުމަތް ބޭނުން ކުރާ ކަސްޓަމަރުންނަށް ވެސް ލަގްޒަރީ ތަޖުރިބާއެއް ލިބިގެން ދާނޭ ގޮތަށް އިޓަލީގެ ކުންފުންޏަކުންނެވެ.