ހުޅަނގު މޫސުމުގެ ވިއްސާރައިގައި މި މަސް ތެރޭ ހަތަރު ރަށަކުން 84 ގެޔަކަށް ގެއްލުންވެގެން ރިޕޯޓްކޮށްފައިވާ ކަމަށް, ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)އިން ބުނެފިއެވެ.
އެންޑީއެމްއޭއިން ކުރި ޓުވީޓެއްގައިވާ ގޮތުން އެ އޮތޯރިޓީއަށް ރިޕޯޓުކޮށްފައި ވަނީ ޅ. ކުރެންދުއިން 66 ގެއަކަށާއި އއ. އުކުޅަހުން 15 ގެއަކަށާއި އެ އަތޮޅު ފެރިދުއިން އެއް ގެއަށާއި އައްޑޫ ސިޓީ ފޭދުއިން ދެ ގެއަކަށް ގެއްލުން ވެގެންނެވެ.
އެންޑީއެމްއޭއިން ބުނީ އެ ގެތަކަށް ލިބުނު ގެއްލުން ވަޒަންކޮށް މިހާރު ނިމިފައިވާ ކަމަށާއި އެހީތެރިކަން ފޯރުކޮށްދިނުމުގެ މަސައްކަތް މިހާރު ކުރަމުންދާ ކަމަށެވެ.
މި މަހު ރާއްޖޭގެ އެކި ސަރަހައްދުތަކަށް ބޯކޮށް ވާރޭވެހި، ބައެއް ރަށްރަށަށް އުދަ އަރައި، ފެންބޮޑުވެފައިވެއެވެ. އޭގެ ތެރެއިން މިދިޔަ ހަފުތާ ތެރޭގައި ކުރެންދުއަށް ވެހުނު ވާރޭގެ ސަބަބުން ފެން ބޮޑުވެފައި ވަނީ މީގެ ކުރިން ފެންބޮޑުނުވާ މިންވަރަކަށް ކަމަށް އެ ރަށު ކައުންސިލުން ވަނީ ބުނެފައެވެ.
މިދިޔަ ހަފުތާގެ އާދިއްތަ ދުވަހު މާލެއަށް ވެސް ގިނައިރުތަކެއް ވަންދެން ހުއްޓުމެއް ނެތި ވާރޭވެހިފައިވެއެވެ. އޭގެ ސަބަބުން ފެމިލީ ކޯޓުގެ ފުރާޅުން ފެން ލީކުވުމުން އެ ކޯޓުގެ އިމާރާތަށް ގެއްލުންވެ، ކޯޓުގެ މަސައްކަތްތައް ވަގުތީ ގޮތުން ޖަސްޓިސް ބިލްޑިންގަށް ބަދަލު ކުރަން ޖެހުނެވެ.
ނަމަވެސް ފެމިލީ ކޯޓުގެ މަސައްކަތްތައް އަލުން އެ ކޯޓަށް ބަދަލުކޮށްފައިވާ ކަމަށް މިދިޔަ އަންގާރަ ދުވަހު އެ ކޯޓުން ވަނީ ބުނެފައެވެ.
މިއަދު ވެސް ރާއްޖޭގެ ބޮޑު ސަރަހައްދަކަށް ބޯކޮށް ވާރޭވެހޭނެ ކަމަށް ލަފާކޮށް ހއ. އަތޮޅުން ފެށިގެން ފ. އަތޮޅަށް މެޓް އޮފީހުން ވަނީ ހުދު ސަމާލު ނެރެފައެވެ.