މިރޭ އިރުއޮއްސި 6:45 އާ ހަމައަށް ރާއްޖޭގެ ބޮޑު ސަރަހައްދަކަށް އުދަ އަރާނެކަމަށް މެޓް އޮފީހުން ލަފާކޮށްފިއެވެ.
މެޓް އޮފީހުން ބުނީ އުދަ އަރާނެ ކަމަށް ލަފައިކުރެވެނީ ކ. އަތޮޅުން ފެށިގެން އައްޑު އަތޮޅާ ދެމެދުގެ ހުރިހާ އަތޮޅަކަށްކަމަށެވެ. އެ އިދާރާއިންވަނީ އެ ހުރިހާ އަތޮޅަކަށް ހުދު ސަމާލު ނެރެފައެވެ.
މި ދުވަސްވަރު މާލެއަށް ވެސް އުދައިގެ އަސަރު ކޮންމެވެސް މިންވަރަކަށް ކުރެއެވެ.
މީގެ އިތުރުން ރާއްޖޭގެ ބައެއް އަތޮޅުތަކަށް ވިއްސާރަވެ، ބައެއް ރަށްރަށަށް ވެހުނު ބޯ ވާރޭގައި ގިނަ ގެއްލުންތަކެއް ވެސް ލިބިފައިވެއެވެ.
މެޓް އޮފީހުން އިއްޔެވަނީ އުދަ އަރައިފާނެ ކަމަށް ލަފާކޮށް މުޅި ރާއްޖޭގެ ހުރިހާ ހިސާބަކަށް ހުދު ސަމާލު ނެރެފައެވެ.
އުދަ އެރުމުން ހިނގާފާނެ ހާދިސާއަކުން ނުވަތަ ގެއްލުމަކުން ދުރުވުމަށް ޓަކައި ދުރާލާ ތައްޔާރުވުމަށް ކަމާ ބެހޭ އިދާރާތަކުން އަބަދު ވެސް އެދެއެވެ.
އެގޮތުން އަގުބޮޑު އިލެކްޓްރޯނިކް ތަކެތި ފެން ނުޖެހޭ މިންވަރަށް އުސް ތަނަކަށް ބަދަލުކުރުމާއި ފަރުނީޗަރު ރައްކާތެރިކުރުމާއި، ގޭގެ އޮޅިގަނޑުން ފެން ނުވަންނާނެހެން ވެލި ބަސްތާ ޖަހަން އިސްކަން ދިނުން މުހިންމެވެ.
ހަޑިި ކިލާ ފެނުގައި ޖެހިފައި ހުންނަ އަންނޯނާއި، ކުޑަކުދިންގެ ކުޅޭ ސާމާނު ފަދަ ތަކެތި ބޭނުން ނުކުރުމަކީ ވެސް މުހިންމު ކަމެކެވެ.