ރިޔާސީ އިންތިޚާބުގެ ކެމްޕެއިންގައި ވެވަޑައިގަންނަވާ ވައުދުތައް ހަނދާން ނައްތައިލައި ފިލައިގެން އުޅުއްވާ މީހަކަށް ނުވާނެކަމަށް ޕީޕީއެމް، ޕީއެންސީގެ ރިޔާސީ ކެންޑިޑޭޓް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
މިއަދު ހއ. ފިއްލަދޫގައި ވާހަކަ ދައްކަވަމުން މުއިއްޒު ވިދާޅުވީ މި ފަސް އަހަރު ނިމިގެންދާއިރު ރައްޔިތުންނަށް ޓަކައި ކޮށްދޭން ޖެހޭ ކަންކަން ހުރީ ނުނިމި ކަމަށެވެ. ކޮށްދޭނެކަމަށް ވައުދުވެފައިވާ ކަންކަން ވެސް ނުނިމޭކަމަށް އޭނާ ވިދާޅުވިއެވެ.
އެހެން ނަމަވެސް، އޭނާ ބޭނުންވަނީ ރައްޔިތުންނަށް ތެދުވެރި، އިހްލާސްތެރި ވެރިކަމެއް ކޮށްދޭންކަމަށާއި އެ ޔަގީންކަން އަރުވާކަމަށް ވިދާޅުވިއެވެ.
ރައްޔިތުން އެދޭ ކަންކަމަކީ ވަރަށް މުހިންމު ކަންކަން ކަމަށާއި މައިކެއް ކުރިމައްޗަށް ހުއްޓި ކަމެއް ކުރެވޭނެ ވާހަކައެއް ދައްކާއިރު އެ ކަމެއް ކުރާނެ ގޮތާއި ފައިސާ ހޯދާނެ ގޮތާއި މަސައްކަތް ގެންދާނެ ގޮތުގެ ވިސްނުމެއް ރޭވިފައި އޮންނަން ވާނެ ކަމަށް މުއިއްޒު ވިދާޅުވިއެވެ.
މި ކެމްޕެއިން ތެރޭގައި 131 ޖަލްސާއެއްގައި ވާހަކަ ދެއްކެވިއްޖެކަމަށާއި އެ ހުރިހާ ވާހަކައެއް ރަސްމީކޮށް ޑޮކިއުމަންޓް ކުރެވިފައި ހުންނާނެކަމަށް ވެސް މުއިއްޒު ވިދާޅުވިއެވެ.
ޕީޕީއެމް، ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ފިއްލަދޫގައި ވާޙަކަ ދައްކަވަނީ --
130 ފަހަރު ދެއްކުނު ކޮންމެ ވާހަކައެއް ހުންނާނީ ރަސްމީކޮށް ޑޮކިއުމެންޓް ކުރެވިފައިކަން ވެސް އޭނާ ފާހަގަކުރެއްވިއެވެ.
"އެއީ ކީއްވެގެން؟ އެއީ އަޅުގަނޑު ބޭނުންވަނީ އެ ކަންކަން ކުރަން. އެ ކަންކަން ހަނދާން ނައްތައިލައިފައި ފިލައިގެން އުޅޭކަށް ނޫން،" މުއިއްޒު ވިދާޅުވިއެވެ.
ރައްޔިތުން އޭނާއަށް އިތުބާރުކޮޮށް ވެރިކަން ހަވާލުކޮށްފިނަމަ ބޭނުންވާ ކަންކަން ކޮށްދެއްވާނެކަމުގެ ޔަގީންކަން މުއިއްޒު ދެއްވިއެވެ.
"ބައެއް ބޭފުޅުން ވިދާޅުވޭ ކިހިނެއްހޭ ކުރާނީ އިގްތިސޯދުގައި ނެތޭ ހަކަތައެއް. އިގްތިސޯދުގައި ހަކަތައެއް ނެތް މި ވަގުތަކު. އެކަމަކު އެ ހަކަތަ އުފައްދާނެ ގޮތް ވެސް މި ދަނީ ކިޔައިދެމުން،" މުއިއްޒު ވިދާޅުވިއެވެ.
މުއިއްޒުގެ ސަރުކާރެއްގައި އިގްތިސޯދީ ވިސްނުމުގައި ކަންކަން ކުރާނެ ގޮތް ރޭވިފައިވާކަމަށް ވެސް އޭނާ ވިދާޅުވިއެވެ. އަދި ހަމައެކަނި ދައްކައިލާ ވާހަކައަކަށްވުރެ ބޮޑަށް މުޅި ޕްލޭން ހިތުގައި ތަސައްވަރުކުރެވިފައިވާކަމަށް ވެސް ވިދާޅުވިއެވެެ.
"އަޅުގަނޑުމެން ބޭނުންވަނީ ސީރިއަސް މަސައްކަތެއް ކުރަން. ސީރިއަސް ގޮތެއްގައި ރައްޔިތުން ބޭނުންވާ ކަންކަން ކޮށްދީ ނިންމަން،" މުއިއްޒު ވިދާޅުވިއެވެ.
"ނުކުރެވޭ ވަރުގެ ކަމެއްގެ ވާހަކަ އަޅުގަނޑުމެން ރައްޔިތުންނަށް ހުވެފެން ދައްކާކަށް ނުދައްކާނަން،"
މުއިއްޒު ވިދާޅުވީ ގައުމީ ވިސްނުމެއްގައި މި މަހު 30ގައި ހުރިހާ ރައްޔިތުން އެކަތިގަނޑަކަށް ވާންޖެހޭ ކަމަށެވެ. ޕާޓީ ފިކުރު ދޫކޮށްލާ ގައުމީ ފިކުރުގައި ގޮތް ނިންމަން ޖެހޭ ކަމަށް ވެސް ވިދާޅުވިއެވެ.