ސަރުކާރު ޖަވާބުދާރީ ކުރުވުން ހުއްޓިފައި އޮތީ ހަމައެކަނި ރައްޔިތުންގެ މަޖިލީހާ ހިސާބަކުން ނޫން ކަމަށާއި އެ މަސައްކަތުގައި މީޑިއާތައް ވެސް އޮތީ ހުއްޓިފައި ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެެ.
ދުނިޔޭގެ ޑިމަކްރަސީ ދުވަސް ފާހަގަ ކުރުމުގެ ގޮތުން މިއަދު ދެއްވި މެސެޖެއްގައި ރައީސް ނަޝީދު ވިދާޅުވީ، މީޑިއާގެ މިނިވަންކަމާއި މަޖިލީހުގެ މިނިވަންކަމަކީ ޑިމަކްރަސީގައި ކޮންމެހެން ބޭނުންތެރި ކަމެއް ކަމަށެވެ.
އެމަނިކުފާނު ވިދާޅުވީ، ޑިމަކްރަސީގެ އެންމެ މުހިންމު ނުކުތާއަކީ މިނިވަން އިންސާފުވެރި އަދި ދެފުށް ފެންނަ އިންތިޚާބެއް ބޭއްވުން ކަމަށެވެ.
"ސަރުކާރުގެ ވަސީލަތްތައް އެއްވެސް ބޭފުޅަކު އެ އިންތިޚާބުގައި ބޭނުން ނުކުރުން. އަދި ސަރުކާރުގެ މަގާމާއި ނުފޫޒު ވެސް އެ އިންތިޚާބުގައި ބޭނުން ނުކުރުން. ޚާއްސަ ގޮތެއްގައި ސަރުކާރު ހިއްސާވާ ކުންފުނިތައް އިންތިޚާބުތަކުގައި ބޭނުން ނުކުރުން،" ނާޝީދު ވިދާޅުވިއެވެ.
ނަޝީދު ވިދާޅުވީ، ސަރުކާރު ޖަވާބުދާރީ ކުރުވުމަކީ ޑިމަކްރަސީގައި ދެވަނައަށް އެންމެ މުހިންމު ކަންތައް ކަމަށެވެ.
"ދެން މިވަގުތު ކިހިނެތްތޯ މިކަންކަން އޮތީ، އެއީ އަޅުގަނޑުމެން އަބަދުވެސް ކުރާ ސުވާލެއް،" އެމަނިކުފާނު ވިދާޅުވިއެވެ.
މިފަދަ ދަނޑިވަޅެއްގައި ހިތުއަޅަންވީ ކުރިއަށް އޮތް ތަނުގައި މިފަދަ ކަންކަން މާބޮޑަށް ރަނގަޅު ކުރުމަށް ކަމަށް ރައީސް ނަޝީދު ވިދާޅުވިއެވެ.
މީގެ އިތުރުން އެމަނިކުފާނު ވިދާޅުވީ، ޑިމަކްރަސީގައި ތިންވަނައަށް އެންމެ މުހިންމީ އިންސާފުވެރި ޝަރީއަތެއް ކަމަށެވެ. އަދި ޖިނާއީ އަދުލުގެ ނިޒާމް އަދި މާކަންޓައިލް ކޮމާޝަލް ކަންކަމާ ގުޅިގެން ވެސް ހިންގާ ހުރިހާ ޝަރީއަތެއް ވެސް އިންސާފުވެރިކަމާ އެކީގައި ހިންގުން ކަމަށް ވިދާޅުވިއެވެ.
މިއަހަރުގެ ޑިމަކްރަސީ ދުވަހުގެ ޝިއާރަކީ "އެމްޕަވަރިން ދަ ނެކްސްޓް ޖެނެރޭޝަން" އެވެ. ނަޝީދު ވިދާޅުވީ މިކަމުގައި ލިބޭ އެންމެ ބޮޑު ހިތްހަމަޖެހުމަކީ މިއަހަރުގެ ރިޔާސީ އިންތިޚާބުގައި ވެސް ޒުވާން ކެންޑިޑޭޓުން ފެނިގެން ދިއުން ކަމަށެވެ. އަދި މަޖިލީހުގައި ވޭތުވެދިޔަ ދެ އަހަރުތެރޭ "ޕްރެކްޓިސް ޕާލިމަންޓް ފޯ ޔޫތް"ގެ ނަމުގައި ޕްރޮގްރާމެއް ވެސް ހިންގާކަމަށް އެ މަނިކުފާނު ވިދާޅުވިއެވެ.
ނަޝީދު ވިދާޅުވީ، ދިވެހިން ޑިމަކްރަސީ ބަލައިގެންފި ކަމަށެވެ.
"ޑިމަކްރަސީ އަޅުގަނޑުމެނަށް މުހިންމު ވަނީ ޑިމަކްރަޓިކް ވެއްޓެއްގެ ތެރެއިން ރައްޔިތުންނަށް ލިބެންއޮންނަ ތަނަވަސްކަން، މުއްސަނދިކަން، އުފާ ފާގަނތިކަން ހިތްހަމަޖެހުން މާބޮޑުތަނުން ރަނގަޅުކަމަށް އިންސާނީ ތަޖުރިބާއިން ފެންނާތީ،" އެމަނިކުފާނު ވިދާޅުވިއެވެ.