ޕީޕީއެމް ތޮބީއީ ސިފައަކީ އަނިޔާވެރިކަމާއި ބިރުވެރިކަމާއި އިންޒާރު ދިނުން ކަމުގައި އާރުޑީސީގެ މެނޭޖިން ޑިރެކްޓަރު މޫސާ އަލީ މަނިކު (މޫކޭ) ވިދާޅުވެއްޖެއެވެ.
ސޯސަންމަގުގައި އެމްޑީޕީން ރޭ ބޭއްވި ކަންމަތީ ޖަލްސާގައި މޫކޭ ވިދާޅުވީ ވެރިކަމުގެ ފަސް އަހަރު ތެރޭގައި ޕީޕީއެމުން ގެންގުޅުނު އަނިޔާވެރި ސިޔާސަތަށް އެއްވެސް ބަދަލެއް ނާންނަ ކަމަށާއި އެގޮތުން ފުރަތަމަ ބުރުގައި ލިބުނު ވޯޓާ އެކު ވެސް އެމްޑީޕީގެ މެންބަރުންނަށް ބިރު ދެއްކުމާއި އިންޒާރު ދިނުން އިތުރުވެއްޖެ ކަމަށެވެ.
ޕީޕީއެމްގެ ފަލްސަފާއަކީ އަދި ވިސްނުމަކީ އެމްޑީޕީ މެންބަރުންނަށް ބިރު ދައްކާ އުލު ބޭންދުން ކަމުގައި ވިދާޅުވެ، މޫކޭ ވަނީ އެ ޕާޓީއަށް ވެރިކަން ލިބިއްޖެ ނަމަ އެމްޑީޕީގެ މެންބަރުންނަށް އެހާ ހިސާބުން ދެން ކަންތައް ވާނެ ގޮތް ވިސްނާލުމަށް އެދިލައްވައިފައެވެ.
"ޕީޕީއެމްގެ ތޮބީއީ ސިފައަކީ އަނިޔާވެރިކަން. ބިރުވެރިކަން. އިންޒާރު ކުރުން. އަޅުގަނޑު މި ބުނެދެނީ އެ މީހުންގެ ސިޔާސަތެއް ބަދަލެއް ނުވެޔޭ. ފުރަތަމަ ބުރުން ކިރިޔާ ބޯ ހިއްލާލެވުނީތީވެ، މިހާރު އެމްޑީޕީގެ މެންބަރުންނަށް އެދޭ އިންޒާރުތަކާއި ދައްކާ ބިރު ތިޔަ ބޭފުޅުންނަށް މިހާރު އެނގޭނެ. މާލޭގެ މަގުތަކުގެ އަމާންކަން ގެއްލެމުންދާ ވަރު ތިޔަ ބޭފުޅުންނަށް އެނގޭނެ،" މޫކޭ ވިދާޅުވިއެވެ.
އޭނާ ވިދާޅުވީ ޕީޕީއެމުން އާންމު ރައްޔިތުންނަށާއި ފުލުހުންނަށާއި ސިފައިންނަށް އަމާޒުކޮށްގެން އެކި ތަންތަނުން ދެމުން އެގެންދާ އިންޒާރުތަކުގެ ވާހަކަ އިތުރަށް ދައްކަން ނުޖެހޭނެ ކަމަށާއި އެއީ ރައްޔިތުންނަށް އެއްވެސް އޮޅުމެއް ނާރާހާ ސާފުކޮށް މިއަދު ފެންނަން އޮތް ހަގީގަތެއް ކަމަށެވެ.
ރައީސް އިބްރާހީމް މުހައްމަދު ޞާލިޙުގެ ވެރިކަމުގެ ފަސް އަހަރު ތެރޭގައި މުޒާހަރާއެއްގައި ބައިވެރިވެގެން ދައުވާއެއް ކޮށްފައި އޮތީ ކާކަށްތޯ ސުވާލު ކުރައްވާ މޫކޭ ވިދާޅުވީ ޕީޕީއެމްގެ ބިރުވެރި، އަދި ނާމާން ފަސް އަހަރު ތެރޭގައި ނޫސްވެރިން ހިމެނޭހެން 1400 އަށްވުރެ ގިނަ މީހުންނަށް ދައުވާ އުފުލާފައި އެބަހުރި ކަމަށެވެ.
"ކިތަން މައިން ތޯ ކަރުނަ އެޅީ. ފިރިމީހާ އަތު ނުޖެހުނީމަ ހަ މަހުގެ ދަރިފުޅުގެ މަންމަ ގެންގޮސް. ދަރިފުޅު އަތު ނުޖެހުނީމަ ކާފަ ގެންގޮސް. މަންމަ ނިޔާވީމަ ސަހަރާއަށް އާދެވޭނެ ގޮތް ނެތިފައި ކިތައް މީހުންތޯ ތިބީ. ނަމަވެސް ރައީސް ޞާލިޙު ވެރިކަމާ ހަވާލުވިތާ ފަސް އަހަރުވީ. ކާކަށްތޯ ދައުވާއެއް ކޮށްފައި އޮތީ. މުޒާހަރާއެއްގައި ބައިވެރިވެގެން ހައްޔަރުކޮށްފައި ދައުވާ ކުރީ،" މޫކޭ ވިދާޅުވިއެވެ.
އޭނާ ވިދާޅުވީ ރަނގަޅަށް ވިސްނާ ފިކުރުކުރުމަށް ފަހު އެ ބިރުވެރި، އަނިޔާ އިއާދަވިޔަ ނުދިނުމަށްޓަކައި މުޅި އެމްޑީޕީ އެކަތިގަނޑެއްގެ ގޮތުގައި އޮވެގެން ނުކުމެ، ދެވަނަ ބުރު ކާމިޔާބު ކުރަންޖެހޭ ކަމަށެވެ.
ޚިޔާލު ތަފާތުވެ، އެމްޑީޕީއާ ކޮންމެ ވެސް ވަރަކަށް ޖަޒުބާތުވެފައި ތިބި މެންބަރުން ވެސް، ޖަޒުބާތު ދޫކޮށްލާފައި މި ކުރަން އުޅެނީ ކޮން ކަމެއްތޯ އާއި ފުރިހަމަ ބާރާ އެކު ޕީޕީއެމަށް ފަސް އަހަރުގެ ދައުރެއް ދީފި ނަމަ ދެން ވާނެ ގޮތާއި ރަށްރަށަށް ވާނެ ގޮތް ވިސްނާލުމަށް ވެސް އޭނާ އެދިލެއްވިއެވެ.
"އެ މީހުން ކުރަން އެ އުޅޭ ކަން ވިސްނާލައްވާފައި ތިޔަ ބޭފުޅުން ވިސްނުންތެރިކަމާ އެކީގައި އަޅުގަނޑުމެންގެ ސަފު ތަކާ ގުޅިވަޑައިގެން ދެވަނަ ބުރުގައި ތިޔަބޭފުޅުން އަޅުގަނޑުމެންނާ އެކީގައި މި ރާއްޖެ އަމާންކަމާ އެކު ދެމެހެއްޓުމަށްޓަކައި ހިތްވަރު ކޮށްދެއްވާ،" މޫކޭ ވިދާޅުވިއެވެ.
އޭނާ ވިދާޅުވީ އެމްޑީޕީގެ މެންބަރުންނާއި ރާއްޖޭގެ ގިނަ ރައްޔިތުންނަކީ އަންނަން އުޅޭ މިފަދަ އަނިޔާވެރިކަމެއް ކުރިމަތީގައި އިސްޖަހާނެ ބައެއް ނޫން ކަމަށެވެ. އަދި، އެ މީހުންނަކީ ބާރަށް ތެދުވެ، ކިތަންމެ ބޮޑު ކޮޅިގަނޑެއް ވެސް ހުރަސް ކޮށްފައި މަންޒިލް ހިފާނެ މީހުން ކަމަށާއި ހަގީގީ އެމްޑީޕީއަކީ އެއީ ކަމަށް ވެސް ވިދާޅުވިއެވެ.
ރޭގެ ޖަލްސާގައި މޫކޭ ވަނީ އިދިކޮޅު ޕީއެންސީގެ ފަރާތުން ވާދަ ކުރައްވާ ރިޔާސީ ކެންޑިޑޭޓް، ޑރ. މުޙައްމަދު މުއިއްޒުގެ ސިޔާސީ މާޒީއަށް ވަރަށް ބޮޑަށް ފާޑު ކިޔުއްވާފައެވެ.
މާލޭގެ ރައްޔިތުން ވަރަށް ބޮޑަށް ވިސްނަން ޖެހޭނެކަން ފާހަގަ ކުރައްވަމުން މޫކޭ ވިދާޅުވީ ސަރުކާރުން ދިން ގޯއްޗާއި ފްލެޓްތައް ހަދައިދޭނެ ކަމަށް ބުނެ، މުއިއްޒު އެ ހައްދަވަނީ ބުހުތާނު ދޮގު ކަމަށާއި ދައްކަވަނީ ވެސް ހޮޅި ވާހަކަ ކަމަށެވެ.
"އެއީ ތިޔަ ބޭފުޅުންނަށް ލިބުނު ފުލެޓު އަތުލި މީހާ. އެއީ ތިޔަ ބޭފުޅުންނަށް ދިން ގޯތި އަތުލި މީހާ. އެއްގޮތަކަށް ވެސް އެ މަޅީގައި ނުޖެހޭތި،" މޫކޭ ވިދާޅުވިއެވެ.
އޭނާ ވިދާޅުވީ މުއިއްޒަށް ވެރިކަން ލިބިއްޖެއްޔާ، އެއް އިރެއްގައި ވެސް އެމްޑީޕީއަށް ނިސްބަތްވި މީހަކަށް ނަމަ މީގެ ކުރިން ލިބުނު އަނިޔާވެރިކަންތައް އަނެއްކާ ތަޖުރިބާ ކުރަން ޖެހޭނެ ކަމަށާއި މި ކަންކަމަށް ސަމާލުކަން ނުދީ ވޯޓު ދީފި ނަމަ ފަހުން ބޯންޖެހޭ ބޭސް މާ ހިތިވާނެ ކަމަށެވެ.
"ތިޔަ ބޭފުޅުން ހިތްވަރު ކުރައްވާ ރަނގަޅަށް ނިކުންނަވާ ދެވަނަ ބުރު ބޮޑުތަނުން ރައީސް ޞާލިޙަށް ކާމިޔާ ކޮށްދިނުމަށް މަސައްކަތް ކޮށްދޭން،،" މޫކޭ ވިދާޅުވިއެވެ.