މަޝްރޫއުތަކުގެ ދަޅަ ދެއްކި ނަމަވެސް ރައްޔިތުން އެއަށްވުރެ ވިސްނުންތެރިކަން ހާމަކޮށްދީފިކަމަށާއި އިންތިޚާބުގެ ދެވަނަ ބުރު ވެސް އިދިކޮޅު ކެންޑީޑޭޓް ޑރ. މުޙައްމަދު މުއިއްޒު ސަރުކާރަށް އަރައި ހަމަނުކުރެވޭވަރުގެ ނަތީޖާއަކުން ކާމިޔާބުކުރާނެކަމަށް އިދިކޮޅު ޕީޕީއެމުން ބުނެފިއެވެ.
އިންތިޚާބުގެ ފުރަތަމަ ބުރަށް ފަހު، ފުރަތަމަ ފަހަރަށް ނޫސްވެރިންނާ ބައްދަލުކުރައްވާ މުއިއްޒުގެ ކެމްޕޭން ތަރުޖަމާނު މުހައްމަދު ތޮލާލް ވިދާޅުވީ ރިޔާސީ އިންތިޚާބުގެ ވޯޓުލުމުގައި ކަންބޮޑުވުން ހުރި ބައެއް ކަންކަން އެބަހުރިކަމަށެވެ.
އެގޮތުން ބާތިލް ވޯޓު ގިނަވިއިރު އޭގެ ތެރެއިން ޑރ. މުއިއްޒަށް ލިބުނު ގިނަ ވޯޓުތަކެއް ބާތިލް ވޯޓުގެ ގޮތުގައި ކަނޑައެޅިކަން ފާހަގަކުރެވުނުކަމަށް ތޮލާލް ވިދާޅުވިއެވެ.
"ޚާއްސަކޮށް ޑރ. މުހައްމަދު މުއިއްޒު، ކެންޑިޑޭޓް ނަމްބަރު ހަތަރަކަށް ޖަހައިފައިހުރި ވަރަށް ގިނަ ފާހަގަތަކެއް، ވަރަަށް ގިނައިން ތިޔަ ބޭފުޅުން ނޫސްވެރިންގެ ތެރެއިން އޮބްޒާވް ކުރެއްވި ބޭފުޅުންނަށް ފެނިވަޑައިގަންނަވާނެ، ވަަަރަށް ގިނައިން ޑރ، މުއިއްޒަށް ދިން ވޯޓުތަކެއް ބާތިލްވެފައި އެބަހުރި،" ތޮލާލް ވިދާޅުވިއެވެ.
ނަމަވެސް، މި މަހުގެ 30ވަނަ ދުވަހު، އިންތިޚާބުގެ ދެވަނަ ބުރު ބޮޑު އަޣުލަބިއްޔަތަކުން މުއިއްޒު ކާމިޔާބުކުރައްވާނެކަމަށް ތޮލާލް ވިދާޅުވިއެވެ.
"އަޅުގަނޑުމެންގެ ދެ ޕާޓީ ހިންގެވުމާ ހަވާލުވެ ހުންނެވި އަބްދުއްރަހީމް ވިދާޅުވާ ގޮތަށް 60 ޕަސެންޓަށްވުރެ މަތިން ޑރ. މުއިއްޒު މި ފަހަރު ކާމިޔާބުކުރައްވާނެ އިރާދަކުރެއްވިއްޔާ،" ތޮލާލް ވިދާޅުވިއެވެ.
ތޮޮލާލް ވިދާޅުވީ ފުރަތަމަ ބުރުގައި ރައީސް އިބްރާހިމް މުޙައްމަދު ޞާލިހަށާއި އެމްޑީޕީއަށް ލިބުނީ ބޮޑު ބައްޔެއް ކަމަށެވެ. އެ ކަމުގެ ރުޅިވެރިކަން މިއަދު ބާލަމުން އަންނަކަމަށާއި އެއީ އެކަން ކޮށްގެންވާނެ ކަމެއް ނޫންކަމަށް އޭނާ ވިދާޅުވިއެވެ.
އެގޮތުން، ގޯތި ދިނުމާއި އެ ނޫން ވެސް މަޝްރޫއުތަކަކީ އިންތިޚާބާ ދިމާކޮށް ހިންގާ މަޝްރޫތައްކަން ތުހުމަތުކުރައްވައި ތޮލާލް ވިދާޅުވީ ރައްޔިތުން ވެސް އެ ކަން ގަބޫލުކުރާ ކަމަށެވެ.
"ގޯތި ވެސް އެ ބޭފުޅުންނަށް ލިބެން އޮތީ ޑރ. މުއިއްޒު ވެރިކަމަށް ވަޑައިގެންކަން އެ ބޭފުޅުންނަށް ރައްޔިތުންނަށް ވެސް އެބަ އެނގިވަޑައިގަންނަވާ. އެހެންވީމާ އެ ރައްޔިތުން އެ ދައްކައިދިނީ. ރައްޔިތުން ބޭނުންވަނީ ކަންކުރެވޭ ގައުމަށް ތަރައްގީ ގެނެސްދެވޭ ރައްޔިތުންނަށް ކަން ކޮށްދެެވޭނެ ބޭފުޅަކު ވެރިކަމަށް ގެންނަން ބޭނުންވާތީވެ ޑރ. މުއިއްޒަށް ވޯޓު ދެއްވަވައިފައިއެވަނީ،" ތޮލާލް ވިދާޅުވިއެވެ.
އޭނާ ވިދާޅުވީ ކުންފުނިތަކާއި ދައުލަތުގެ މުއައްސަސާތަކުގެ މުވައްޒަފުން ވެސް ނުފޫޒުގައި ނުޖެހި މިނިވަންކަމާއެކު ވޯޓުލުން މުހިންމު ކަމަށެވެ. ޕީޕީއެމަށް ކެމްޕޭން ކުރުމުގެ ފުރުސަތު ވެސް އެ މުވައްޒަފުންނަށް އޮންނާނެކަމަށް މުއިިއްޒު ވިދާޅުވިއެވެ.
"ޑރ. މުއިއްޒުގެ ވެރިކަމެއްގައި މިހާރު ވަޒީފާ ލިބިވަޑައިގެން ތިއްބެވި އެއްވެސް ބޭފުޅެއްގެ ވަޒީފާއެއް ނުގެއްލޭނެ. އެ ބޭފުޅުންނަށް ވަޒީފާގައި ދެމިތިއްބެވޭނެ،" ތޮލާލް ވިދާޅުވިއެވެ.