މި ފަހަރުގެ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންގެ ތެރެއިން އެ މަނިކުފާނަށްވުރެ ރަނގަޅަށް ވެރިކަން ކުރެވޭނެ އެއްވެސް ކެންޑިޑޭޓެއް ނެތްކަމުގެ ފުރިހަމަ ޔަގީންކަން އަމިއްލަ ނަފްސަށް އޮންނަ ކަމަަށާއި، ރައްޔިތުންނަށް ވެސް އެ ކަމުގެ ޔަގީންކަން ދެއްވާ ކަމަށް ރައީސް އިބްރާހިމް މުޙައްމަދު ޞާލިހު މިއަދު ވިދާޅުވެއްޖެއެވެ.
ހދ. ނޭކުރެންދޫގައި އޮތް ކެމްޕޭން ޖަލްސާގައި ވާހަކަފުޅުދައްކަަވަމުން ރައީސް ވިދާޅުވީ ރިޔާސީ ދެވަނަ ދައުރަކަށް އެ މަނިކުފާނު ކުރިމަތިލެއްވީ ވެރިކަން ކުރެވޭނެ ކަމުގެ ގާބިލްކަމާއި ޔަގީންކަން ހުރިކަން އަމިއްލަފުޅަށް ގަބޫލުފުޅު ކުރައްވާތީ ކަމަށެވެ.
އަދި ރައްޔިތުން ބޭނުންވާ ގޮތަށް ދެވަނަ ދައުރުގައި ވެސް ރާއްޖެ ތަރައްގީކުރުމުގެ އަމާޒަކާއެކު ކަމަށެވެ.
"އަޅުގަނޑު މި މަގާމަށް ކުރިމަތިލައިގެން މި ހުރީ މާތްﷲގެ ވާގިފުޅާއެކު އެ ކަން ކުރެވޭނެ ކަމުގެ ޔަގީންކަން އަޅުގަނޑަށް އޮތީމާ. މިއަދު އަޅުގަނޑާ ވާދަކުރަން ނިކުމެވަޑައިގެން އެ ތިއްބެވި ކޮންމެ ބޭފުޅަކަށް އަޅުގަނޑު ޗެލެންޖުކޮށްފައި މި ދަންނަވަނީ އަޅުގަނޑަށްވުރެ ރަނގަޅަށް މި ރާއްޖޭގެ ވެރިކަން ކުރެވޭނެ މީހަކު މާތްﷲގެ ވާގިފުޅާއެކު މިހާރު ކުރިމަތިލައިފައެއް ނެތް،" ރައީސް ވިދާޅުވިއެވެ.
ރައީސް ވިދާޅުވީ އެ މަނިކުފާނަށް ވޯޓުދޭންވީ ގައުމުގެ ތަރައްގީއަށް ޓަކައި ކަމަށެވެ. އަދި އެ ވޯޓު ބާކީ ވެސް ނުވާނެ ކަމަށެވެ.
މީގެ އިތުރުން ވާހަކަފުޅުދައްކަވަމުން ރަށްތަކުން ފެންނަ ބޮޑު މަންޒަރަކީ ކޮންމެ ރަށަކަށް ވެސް އަންނަ ހެޔޮ ބަދަލުކަމަށް ރަައީސް ފާހަގަކުރެއްވިއެވެ.
އެއާއެކު އުފެދޭ ސުވާލަކީ މިއަދު އެ ރަށްރަށް ތަރައްގީވާން ފަށައި ކުރިން އެ ރަށްތައް ތަރައްގީނުވެ ކުރިން ދޫވެފައިހުރީ ކިއްވެތޯ އުފެދޭ ސުވާލުކަމަށް ރައީސް ވިދާޅުވިއެވެ. މާލޭގައި ހުރެ ރަށެއްގައި ބަނދަރެއް އަޅައި ނުވަތަ ނަރުދަމާއެއް އެޅުމުގެ ވާހަކަ ދެއްކިދާނެކަމަށް ރައީސް ވިދާޅުވިއެވެ. ނަމަވެސް ރައްޔިތުން ތަހައްމަލުކުރާ ދަތި ހާލު އެނގެނީ އެ ރަށަކަށް އެރުމުންކަމަށް ރައީސް ވިދާޅުވިއެވެ.
"ފެނާއި ނަރުދަމާގެ ވާހަކަ ދައްކާއިރުގައި ރާއްޖޭގެ ކިތައް ރަށުގައިތޯ އިރުވައިި މޫސުމުގައި ފެން ނުލިބިގެން އެ ހާލުގައި އުޅެން ޖެހުނީ. ހަމަ އަޑުއިވޭ ކަމަކަށް އެއްވެސް ސަރުކާރަކުން ނުހަދާ. ކަރަންޓު ކެންޑިގެން ކަނު އަނދިރީގައި ރޭ ހޭދަކުރަންޖެހުނު ކިތައް ރަށް މި ރާއްޖޭގައި އެބައޮތްތޯ،" ވޭތުވެދިޔަ އެއްވެސް ސަރުކާރަކުން އެކަމަށް އަޅައިނުލައިކަން ފާހަގަކުރަައްވައި ރައީސް ވިދާޅުވިއެެވެ.
ހދ. ނޭކުރެންދޫގައި ބޭއްވި ޖަލްސާގެ ތެރެއިން -- ފޮޓޯ/ އެމްޑީޕީ
ރައީސް ވިދާޅުވީ އެ ދުވަހު ސަރުކާރުގައިި ތިބެ އެ ކަން ނުކުރި ބޭފުޅުން މިއަދު ވެސް އެ ކަންކަން ސިފަކުރަނީ ބޭކާރު ކަންކަމުގެ ގޮތުގައިކަމަށެވެ. ފެނާއި ނަރުދަމާއަކީ 'ބިމު އަޑީ ވަަޅުލާ ހޮޅި'ތަކަކަށްވުމުން އެ ނުފެނުނު ނަމަވެސް އެ ކަންކަން މުހިންމު ކަމަށް ރައީސް ވިދާޅުވިއެވެ.
"މިއަދު ނިކުމެ އެ ބޭފުޅުން އެ ވިދާޅުވަނީ ބޭކާރު ކަންތައްތަކޭ އެއީ. ކީއްކުރަން ކުރާ ކަންތައްތަކެއްހޭ އެއީ،" ރައީސް ވިދާޅުވިއެވެ.
އެ މަނިކުފާނު ވިދާޅުވީ ވާދަވެރި ކެންޑިޑޭޓް ބޭނުންވަނީ އުސް އިމާރާތްތައް އަޅައި އެ ދައްކަން ބަހައްޓަން ކަމަށެވެ.
ދެވަނަ ދައުރެއްގައި ނޭކުރެންދޫގައި ހިންގާނެ މަޝްރޫއުތައް:
- މަގުތައް ޒަމާނީކޮށް ތަރައްގީކުރުން
- މޫދަށް އެރޭ ސަރަަހައްދެއް ހެދުން
- ދޯނި އެހެލާ ސަރަަހައްދެއް ހެދުން
- ޒުވާނުންނަށް ޔޫތު ސެންޓަރެއް އެޅުން
- އިންޑޯ ބެޑްމިންޓަން ކޯޓެއް އެޅުން