ބަޣާވާތް ކުރިކަމަށްބުނެ، ދޮގު އިލްޒާމުތައް އަޅުވަމުންދަނީ ވެރިން ޖެހިލުންވާ މީހެއްގެ ގޮތުގައި އޭނާ ހުންނާތީކަމަށް އެމްއެންޕީގެ ރިޔާސީ ކެނޑިޑޭޓް ކާނަލް ރިޓަޔާޑް މުހައްމަދު ނާޒިމް ވިދާޅުވެއްޖެއެވެ.
ރޭ އޮތް ރިޔާސީ ކެނޑިޑޭޓުންގެ ބަހުސްގައި ވާހަކަދައްކަވަމުން ނާޒިމް އެހެން ވިދާޅުވީ، ރައީސް މުޙައްމަދު ނަޝީދުގެ ވެރިކަމުގައި ފެބްރުއަރީ ހަތް ވަނަ ދުވަހު އެއްވެސް ހައިސިއްޔަތެއް ނެތި ސިފައިންގެއަށާއި ރައީސް އޮފީހަށް ވަދެ، އޭރުގެ ވެރިކަން ވައްޓާލުމަށް ބަޣާވާތް ކުރި ކަމަށާއި، ރައީސް އަބްދުﷲ ޔާމީންގެ ސަރުކާރުގައި ކާނަލް ރޭންކަށް ވުރެ މަތީ ބޭބޭފުޅުން ބަންޑާރަ ކޮށްޓަށް އެއްކުރައްވާ ސަރުކާރާ ދެކޮޅަށް ބަޣާވާތްކުރުމުގެ މަސައްކަތް ކުރިކަމަށް ގިނަ ބަޔަކު ބުނާ އިރު އެފަދަ މީހަކަށް ގައުމުގެ ވެރިކަން ދެވިދާނެތޯ ސުވާލު ކުރުމުންނެވެ.
އެ ކަމަށް ރައްދު ދެއްވާ ނާޒިމް ވިދާޅުވީ، ފެބްރުއަރީ ހަތް ވަނަ ދުވަހު އޭނާ ކުރެއްވީ ގައުމީ މަސައްކަތެއް ކަމަށެވެ.
"އަޅުގަނޑު އެ ދުވަހު ކުރީ ގައުމީ ވާޖިބެއް އެދުވަހުގެ ވެރިކަން ބަދަލު ވުމުގަ އެއްވެސް ވަރެއްގެ ޒިންމާ އެއް އަޅުގަނޑު ނަގަން ނުޖެހޭނެ. އެދުވަހު މައްސަލަ ތަހުގީގު ކޮށްފަ އޮތް ކޯނީ ރިޕޯޓުގަ ވެސް އަޅުގަނޑުގެ މައްސަލައެއް އޮތްކަމަކަށް ލިޔެވިފައެއް ނެތް" ނާޒިމް ވިދާޅުވިއެވެ.
ބަޣާވާތް ކުރިކަމަށް ހަމައެކަނި އޭނާއަށް ތުހުމަތު ކުރި ނަމަވެސް އޭނާއާ އެއްކޮށް އެދުވަހުގެ މަސައްކަތުގައި އިތުރު މީހުން އުޅުންކަން ވެސް ނާޒިމް ވަނީ ފާހަގަ ކުރައްވައިފައެވެ.
"ޒިންމާ ނަގަންޖެހޭނަމަ، އެދުވަހު އަޅުގަނޑާ އެއްވަރަށް ޒިންމާ ނަންގަވަން ޖެހޭ ދެ ބޭފުޅުން ތިއްބަވާނެ. އެއީ އޭރުގެ އުއްތަމަ ފަނޑިޔާރު [ އަޙްމަދު ފާއިޒް ޙުސައިން] އާއި އޭރުގެ މަޖިލީހުގެ ރައީސް [އަބްދުﷲ ޝާހިދު]." ނާޒިމް ވިދާޅުވިއެވެ.
މީގެ އިތުރަށް ރައީސް ޔާމީން ކާނަލް ނާޒިމް ބަންދުކުރެއްވީ ފިސްތޯލަ ފެނިގެން ނޫން ކަމަށާއި، އެއީ ބަޣާވާތް ކުރަން އުޅުމުން ކަމަށްް ބުނާ ބުނުމަށް ރައްދު ދެއްވަމުން ނާޒިމް ވިދާޅުވީ ރައީސް ޔާމީނު ހެއްދެވީ އިތުރުފުޅެއް ކަމަށެވެ. އަދި އޭނާ އަކީ ގައުމީ މީހެއް ކަމަށާއި އެއްވެސް ހާލެއްގައި ވެރިކަމެއް ވައްޓާލުމަށް އޭނާ މަސައްކަތް ނުކުރާނެ ކަމަށް ވެސް އޭނާ ވިދާޅުވިއެވެ.
އޭނާ ހަމައެކަނި މަސައްކަތް ކުރަމުން އައީ ރާއްޖެއަށް ކުރިއެރުމާއި ތަރައްގީ ގެނައުމަށް ކަމަށާއި، ކުރިއަށް އޮތްތާ މަސައްކަތް ކުރާނީވެސް އެ މަގުސަދު ހާސިލު ކުރުމަށް ކަމަށްވެސް ނާޒިމް ވިދާޅުވިވެއެވެ.
އޭނާ ވިދާޅުވީ ރާއްޖެއަށް އިގްތިސާދީ އިންގިލާބެއް ގެނައުމައްޓަކައި، އިތުރު ދެ އިންޑަސްޓްރީއެއް އޭނާ ތައާރަފް ކުރައްވާނެ ކަމަށެވެ. އޭގެ ތެރެއިން އެއް އިންޑަސްޓްރީ އަކީ އިންފޮމޭޝަން ޓެކްނޮލޮޖީ އެންޑް އިނޮވޭޝަން އިންޑަސްޓްރީ ކަމަށްވެސް ނާޒިމް ވަނީ ވިދާޅުވެފައެވެ. އެގޮތުން ރާއްޖޭގައި ތިބި އައިޓީ ދާއިރާ އަށް ކުޅަދާނަ ކުދިންގެ ބޭނުންހިފާ އެ ކުދިންގެ ސަބަބުން ގައުމަށް އާމްދަނީ ލިބޭނެގޮތް ހަދާނެ ކަމަށްވެސް އޭނާ ވިދާޅުވިއެވެ.