މި އިންތިޚާބަކީ ނުފޫޒު ފޯރުވައިގެން ކުރިއަށް ގެންދާ އެތެރެ ނުފެންނަ އިންތިޚާބެއް: ގާސިމް

އަންނަ ހޮނިހިރު ދުވަހު ބާއްވާ ރިޔާސީ އިންތިޚާބަކީ ސަރުކާރުގެ ނުފޫޒާއި ބާރު އިންތިހާއަށް ފޯރުވާފައިވާ އިންތިޚާބެއްކަމާއި އެއީ އެތެރެ ނުފެންނަ އިންތިޚާބެއް ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް ވިދާޅުވެއްޖެއެވެ.

ގާސިމް މިހެން ވިދާޅުވީ، މިރޭ ބޭއްވި ރިޔާސީ ބަހުސްގައި ފަހު ބަސް ބުނުމަށް ފުރުސަތު ދިނުމުންނެވެ. އޭނާ ވަނީ ބަހުސްގައި ސަރުކާރަށް ފާޑު ވިދާޅުވެ ވާހަކަ ދައްކަވާފައެވެ.

އެގޮތުން ރާއްޖޭގައި އިންޑިއާ ސިފައިން ގާއިމްވެ ތިބިކަމަށް ދެކެވޭ ވާހަކައާ ގުޅިގެން އޭނާ ވިދާޅުވީ މި ސަރުކާރުން ގާނޫނު އަސާސީއާ ޚިލާފު ވެފައި ވާކަމަށެވެ. އަދި ގާނޫނުގައި ބަޔާންކުރާ ގޮތުން ރާއްޖޭގައި އެހެން ގައުމެއްގެ މިލިޓަރީއަށް ތިބެވޭނީ ރައްޔިތުންގެ މަޖިލީހަށް ހުށަހަޅައިގެން މަޖިލީހުން ނިންމާ ގޮތެއްގެ މަތިންކަމަށް ގާސިމް ވިދާޅުވިއެވެ.

"އެހެންވީމަ މި ސަރުކާރު ބޮޑު ތަނުން ގާނޫނު އަސާސީއާ ޚިލާފުވެފައި ވާކަމަށް އަޅުގަނޑަށް ކަނޑައެޅިގެން ގަބޫލު ކުރެވޭތީ އަޅުގަނޑު މިގޮތަށް ނުކުމެ މި މަސައްކަތް ކުރަނީ،" ގާސިމް ވިދާޅުވިއެވެ.

ގާސިމްގެ ވެރިކަމެއްގައި ރާއްޖޭގެ ދަރަނި އަދާކުރުމަށް ގެންގުޅުއްވާ ސިޔާސަތު ހާމަކުރައްވާ ގާސިމް ވިދާޅުވީ، 2026ވަނަ އަހަރު ދައްކަންޖެހޭ ދަރަނީގެ ތެރެއިން 600 މިލިއަން ޑޮލަރު ހިލޭ އެހީގެ ގޮތުގައި ހޯއްދަވާނެ ކަމަށެވެ. އަދި ޓެކްސްގެ ނިޒާމު ބަދަލުކޮށް އާމްދަނީ އިތުރުކުރުމުގެ މަގު ފަހި ކުރާނެކަމަށް ގާސިމް ވިދާޅުވިއެވެ.

ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމް --- ފޮޓޯ/ ވަގުތު

ގާސިމްގެ ވާހަކަފުޅުގައި އޭނާ ވަނީ ވަރަށް ބޮޑަށް އާސަންދައިގެ ނިޒާމަށް ވެސް ފާޑު ވިދާޅުވެފައެވެ. އެގޮތުން އާސަންދައިގެ ދަށުން މިހާރު ލިބޭ އެހީއަކީ ބޭސް ދިނުމާއި ރާއްޖޭން ބޭރަށް ދާންޖެހިއްޖެ ހާލަތެއްގައި ހޮސްޕިޓަލުގެ ބިލް ދައްކައިދިނުން ކަމަށެވެ. މިކަމުގެ ސަބަބުން ރައްޔިތުންނަށް އެތައް ތަކުލީފެން ކުރިމަތިވާކަމަށް ގާސިމް ވިދާޅުވިއެވެ.

"އަޅުގަނޑުމެން އެކަން ހާމަނައިޒްކޮށް އިންޝުއަރެންސް ޕޮލިސީއެއްގެ ދަށުން އެކަން ހަމަޖެއްސޭނެ އުސޫލުތަކެއް ކަނޑައަޅާ ހުރިހާ އެންމެންނަސް ބޭސްފަރުވާ ލިބޭނެ އިންތިޒާމް ހަމަޖައްސައި ދޭނަން،" ގާސިމް ވިދާޅުވިއެވެ.

ޚާރިޖީ ސިޔާސަތާ ގުޅޭ ގޮތުން ކުރެއްވި ސުވާލަށް ޖަވާބު ދެއްވަމުން ގާސިމް ވިދާޅުވީ، އޭނާގެ ސަރުކާރެއްގައި ތަންފީޒު ކުރާނީ ކުރީގެ ރައީސް މައުމޫން އަބްދުލްގައްޔޫމާއި އިބްރާހިމް ނާސިރު ވެސް ގެންގުޅުއްވި ޚާރިޖީ ސިޔާސަތު ކަމަށެވެ.

"އަޅުގަނޑުމެންގެ ޚާރިޖީ ސިޔާސަތުގައި އޮންނާނީ ދިވެހިންނަށް އިސްކަން ދިނުމުގެ ސިޔާސަތު. އެންމެ ފުރަތަމައަށް ވެސް ދެވަނައަށް ވެސް ތިންވަނައަށް ވެސް. އޭގެ މާނައަކީ އިގްތިޞާދީ ކަންކަމުގައި ވެސް އިޖްތިމާއީ ކަންކަމުގައި ވެސް ދާޚިލީ ކަންކަމުގައި ވެސް،" ގާސިމް ވިދާޅުވިއެވެ.

މީގެ އިތުރުން، ގާސިމްގެ ވެރިކަމެއްގައި އުމުރުން ދުވަސްވީ މީހުނަށް ދޭ 5000/- ރުފިޔާ 7000 ރުފިޔާއަށް ބޮޑުކޮށްދިނުމަށް ވެސް ގާސިމް ވަނީ ވައުދުވެ ވަޑައިގެންފައެވެ. އޭނާ ވިދާޅުވީ އެމްޑީޕީއާއި ޕީޕީއެމް މިހާރު ވަނީ ވެރިކަން ކުރުމުގައި ފެއިލްވެފައި ކަމަށެވެ.

"އެހެންވީމަ މިހާރު ރައްޔިތުން ވިސްނާ ވަޑައިގަންނަވަންވީ ރަނގަޅު ކެންޑިޑޭޓަކާ މެދުގަ. ކަންތައްތައް ކުރުން ގާބިލްކަން ހުރި ކެޕޭސިޓީ ހުރި މިދެންނެވި ގޮތަށް އެހީތެރިކަން ވެސް ދެވިދާނެ މީހަކަށް ވޯޓުލުން މީ މުހިންމު ކަމަކީ،" ބަހުސް ނިންމަލައްވަމުން ގާސިމް ވިދާޅުވިއެވެ.