ފާއިތުވި ސަރުކާރުތަކުން ކަންތައް ކުރަނީ ގޯސްކޮށްކަން އެނގުނީ ސަރުކާތަކުގެ ތެރޭގައި މަސައްކަތް ކުރުމުން ކަމަށް އަމިއްލަގޮތުން މިއަހަރުގެ ރިޔާސީ އިންތިޚާބުގައި ވާދަ ކުރައްވާ ހަސަން ޒަމީލް ރޭ ވިދާޅުވެއްޖެއެވެ.
ޕީއެސްއެމްއާ ގުޅިގެން ސަންގު ޓީވީން ބޭއްވި ބަހުސްގައި ވާހަކަދައްކަވަމުން ޒަމީލް ވިދާޅުވީ ފާއިތުވި 15 އަހަރު ރާއްޖޭގައި ވެރިކަން ކުރަމުން ގެންދިޔައީ ކޯލިޝަން ސަރުކާރުތަކުން ކަމަށާއި އެހެނަސް އެއްވެސް ކަމެއް ރަނގަޅު ވެފައިނުވާ ކަމަށެވެ.
"ކޮންމެ މީހަކަށް ވެސް ދުވަސްކޮޅަކު ތަނެއްގައި މަސައްކަތްކުރެވި ބަޔަކު ކަންތައްތައް ކުރާ ގޮތް ފެނި ތަޖުރިބާއެއް ލިބުނީމަ އެނގޭނީ ދެެއްތޯ ކަންކަން ދަނީ ގޯސްކޮށްކަން،" ޒަމީލް ވިދާޅުވިއެވެ.
އޭނާ ވިދާޅުވީ 2008 ވަނަ އަހަރުގެ ރިޔާސީ އިންތިޚާބާ ދިމާކޮށް ވެސް ދެއްކީ ވަރަށް އުއްމީދީ ވާހަކަތަކެއް ކަމަށެވެ. އަދި މި ސަރުކާރު ފެށިގެން އައި އިރުގައި ވެސް ވަރަށް ރަނގަޅު ވާހަކަތަކެއް ހަމަ އެފަދައިން އަޑުއިވިގެން ދިޔަ ކަމަށާއި ނަމަވެސް ފަސް އަހަރު ނިމޭއިރު އެއްވެސް ކަމެއް ހާސިލުކުރެވިފައި ނެތް ކަމަށެވެ.
"އެހެންވީމަ މިހާރު އަޅުގަނޑަށް ހީވާ ގޮތުގައި އަޅުގަނޑު އެކަންޏެއް ނޫން ނިކުންނަން ޖެހޭނީ. ވަރަށް ގިނަ މީހުން ނިކުންނަށް ޖެހޭ އެބަ މިކަންކަން ރަނގަޅުކުރުމަށް ޓަކައި،" ޒަމީލް ވިދާޅުވިއެވެ.
މި ބަހުސްގައި ޒަމީލް ވަނީ ރާއްޖޭގައި މީހުން ދިރިއުޅޭ އެއްވެސް ރަށެއް ބާކީ ނުކޮށް، ކުދި އާބާދީތައް ވެސް ތަރައްގީކުރުމަށް ސަރުކާރުން ގެންގުޅެމުން އަންނަ ސިޔާސަތަށް ފާޑު ވިދާޅުވެފައެވެ.
އޭނާ ވިދާޅުވީ ކުދި އާބާދީތަކުގައި ސަރުކާރުން ޚަރަދު ކޮށްގެން ތަރައްގީގެ ބޮޑެތި މަޝްރޫތައް ހިންގުމުން މީހުންނަށް އެ ދެވެނީ ދޮގު އުއްމީދެއް ކަމަށެވެ. އަދި ވިދާޅުވީ ރަށްރަށުގައި ރީތި ބަނދަރާއި ހޮސްޕިޓަލާއި ސުކޫލްތައް އަޅާފައި ބެހެއްޓިޔަސް އެތަންނަށް ދާނެ މީހުންނެއް ނުތިބޭ ކަމަށެވެ.
ވެރިކަން ލިބިއްޖެ ނަމަ ގެންގުޅުއްވާނެ ޚާރިޖީ ސިޔާތުގެ މައްޗަށް އަލިއަޅުވާލާ ޒަމީލް ވިދާޅުވީ ހުރިހާ ގައުމަކާއެކު ރަނގަޅު ގުޅުމެއް ބާއްވާނެ ކަމަށާއި ޚާއްޞަ ގޮތެއްގައި އަވަށްޓެރި ގައުމުތަކާއެކު އޮންނަ ގުޅުން އިތުރަށް ހަރުދަނާ ކުރާނެ ކަމަށެވެ.
އޭނާ ވިދާޅުވީ ވަކި ގައުމަކާއެކު ޚާއްޞަ ގުޅުމެއް ބޭއްވުމުގެ ވިސްނުމެއް ނެތް ކަމަށެވެ.
""އަވަށްޓެރި ގައުމުތަކާ މިހާރުވެސް ގުޅުން ބާއްވަންޖެހޭ ސަބަބު އެންމެންނަށް އެބަ އެނގޭ. އެކި ހާލަތްތަކުގައި އަވަށްޓެރި ގައުމުތަކުގެ ބޭނުން އެބަޖެހޭ، ކޮވިޑުގެ ހާލަތުގައްޔާއި ފެނަށް ޖެހުނު ވަގުތު އެހީއަށް އެދެން ޖެހުނު،" ޒަމީލް ވިދާޅުވިއެވެ.
އޭނާ ވިދާޅުވީ މިފަދަ ކުޑަ ގައުމަކުން އެހެން ގައުމުތަކުގެ އެހީތެރިކަން ހޯދަން ޖެހޭނެ ކަމަށެވެ. އަދި ގައުމުތަކުގެ ނުޒޫފު ރާއްޖެއަށް ފޯރަނީ ދަރަނި ބޮޑުވެގެން ކަމަށާއި އެހެންކަމުން ވެރިކަން ލިބިއްޖެ ނަމަ އެންމެ ބޮޑު އިސްކަމެއް ދޭނީ ދަރަނިތައް ދައްކާ ޚަލާސްކޮށް ރާއްޖޭގެ އިގުތިސާދު ހަމައަކަށް އެޅުވުމަށް ކަމަށެވެ.
މި ސަރުކާރުގައި 2019 ވަނަ އަހަރުގެ ފެބްރުއަރީ މަހު ޒަމީލް ޑިފެންސް މިނިސްޓްރީގެ ނައިބަކަށް ހަމަޖެއްސިއެވެ. ނަމަވެސް މިދިޔަ ޖުލައި މަހު އޭނާ ވަނީ މަގާމުން އިސްތިއުފާ ދެއްވާފައެވެ. އޭގެ ކުރިން އޭނާ ވަނީ ޓޫރިޒަމް މިނިސްޓްރީގެ ޑިރެކްޓަރު ޖެނެރަލް ކަމާއި އެ މިނިސްޓްރީގެ ޑެޕިއުޓީ ޑިރެކްޓަރުކަން ވެސް ކުރައްވާފައެވެ.
މިއަހަރުގެ ރިޔާސީ އިންތިޚާބުގައި އަށް ކެންޑިޑޭޓުން ވާދަ ކުރައްވާއިރު ރަނިން މޭޓެއްގެ ގޮތުގައި އަންހެން ބޭފުޅެއް ކަނޑައަޅުއްވާފައިވާ ހަމައެކަނި ކެންޑިޑޭޓަކީ ޒަމީލްއެވެ.
އޭނާގެ ރަނިންމޭޓަކީ އަނބިކަނބަލުން މަރިޔަމް އަލީމްއެވެ.