ވެރިކަންކުރާ މައި ޕާޓީ އެމްޑީޕީއަށް ކުރިއަށް އޮތް ރިޔާސީ އިންތިޚާބު ކާމިޔާބު ނުކުރެވޭނެކަން ވަރަށް ސާފުކޮށް އެނގޭތީ އެންޓި-ކެމްޕޭން ކުރަމުންދާ ކަމަށް އިދިކޮޅު ކޯލިޝަންގެ ކެންޕޭނު ތަރުޖަމާނު މުހައްމަދު ތޮލާލް ތުހުމަތު ކުރައްވައިފިއެވެ.
ތޮލާލް މިގޮތަށް ވިދާޅުވީ، ޖަލު ހުކުމެއްގައި ހުންނެވި ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ ނުރުހުމުގެ ބަސްފުޅުތައް ޑރ. މުހައްމަދު މުއިއްޒަށް އަމާޒުވިކަމަށް ބުނެ މީޑީއާގައި ރިޕޯޓުކޮށްފައިވަނިކޮށް ވެސް މެއެވެ.
ސިލްސިލާކޮށް ބާއްވަމުންދާ ނޫސްވެރިންގެ ބައްދަލުވުމުގައި މިއަދު ވާހަކަދައްކަވަމުން އެ ކަމަށް ރައްދު ދެއްވާ ތޮލާލް ވިދާޅުވީ، މި ހުރިހާ ކަމަކީ ވެސް އެމްޑީޕީން ކުރަމުންދާ އެންޓި- ކެމްޕޭނުގެ ހަރަކާތްތައް ކަމަށެވެ.
އެގޮތުން ތޮލާލް ވަނީ މުއިއްޒާ ދެކޮޅު ވާހަކަތެއް ހިމެނޭ ގޮތަށް ބަހަމުންދާ ލިޔުންތަކަކީ ރައީސް އޮފީސް ތެރެއިން ތައްޔާރުކޮށްގެން ނެރެ ބަހަމުންދާ އެއްޗެއް ކަމަށް ތުހުމަތު ކުރައްވާފައެވެ.
"އެމްޑީޕީގެ ޕްރެސް ކޮންފަރެންސް ބާއްވާ ނިންމާފައި، އިއްޔެ މި ލިޔުންތައް ތައްޔާރުކުރީ ރައީސް އޮފީސް ތެރެއިން. ތައްޔާރުކޮށްގެން ނެރެ މި އެއްޗިސްތައް ބެހީ. މި ލެވެލަށް އެމްޑީޕީ ވެއްޓެން ޖެހުނީ އެ މީހުންނަށް އެބަ އެނގޭ މި ފަހަރުގެ އިންތިޚާބުގަ ބަލިވެއްޖެކަން،" ތޮލާލް ވިދާޅުވިއެވެ.
މި ހުރިހާ ކަމަކީ ވެސް އިދިކޮޅު ކޯލިޝަންތެރެ ބައިބައިކޮށް ހަމަނުޖެހުން އުފެއްދުމަށް އެމްޑީޕީން ކުރަމުން އަންނަ އަމަލުތަކެއް ކަމަށް ތޮލާލް ވިދާޅުވިއެވެ. އެގޮތުން ޕާޓީގެ އެހެނިހެން އިސް ފަރާތްތައް މުއިއްޒާ ދެކޮޅު ކަމަށް ބުނެ ބުނާ ބުނުމަކީ ވެސް ކަނޑައެޅިގެން ދޮގެއް ކަމަށް ތޮލާލް ވިދާޅުވިއެވެ.
"ރައީސް ޔާމީންގެ ތާއީދު ނެތްނަމަ، ރައީސް ޔާމީންގެ ލޯޔަރުން، އެ ލޯޔަރުން ނިސްބަތްވާ ދާއިރާތަކަށް ޑރ. މުއިއްޒު ކެމްޕޭން ދަތުރުފުޅުތަކުގައި ވަޑައިގަންނަވާއިރު އަރިހުގައި ވަޑައިގަންނަވާނެތޯ؟ އޭގެ އިތުރުން ވެސް އެހެނިހެން ބޭފުޅުން އެ އަންނަނީ އެކި ދިމަދިމާލުގައި މަސައްކަތް ކުރައްވާ ކެމްޕޭން ހަރަކާތްތައް ކުރިއަށް ގެންދަވަމުން،" ތޮލާލް ވިދާޅުވިއެވެ.
ތޮލާލް ވިދާޅުވީ ރައީސް ޔާމީން ކަނޑައެޅިގެން އެ ކަމެއް ނުކުރެއްވުމަށް އަންގަވައިފިނަމަ އެ ކަމެއް ނުކުރައްވާނެ ބޭބޭފުޅުން ވެސް ތިއްބަވާނެ ކަމަށެވެ. އެގޮތުން ޕީއެންސީގެ ރައީސް އަބްދުއްރަހީމް އަބްދުﷲއާއި ޕީއެންސީގެ ނައިބު ރައީސް އިބްރާހީމް ސުޖާއުއާއި މާވަށު ދާއިރާ މެންބަރު އަދި ކުރީގެ އިކޮނޮމިކް މިނިސްޓަރު މުހައްމަދު ސައީދުގެ އިތުރުން މަހިބަދޫ ދާއިރާގެ ޕީޕީއެމް މެންބަރު އަހްމަދު ތޯރިގު (ޓޮމް)ގެ ނަން ވަނީ ފާހަގަކުރައްވައިފައެވެ. އަދި، އެ ބޭފުޅުންނަކީ މުއިއްޒުގެ ކެމްޕެއިން ހަރަކާތްތަކުގައި އެންމެ އިސްކޮށް ހަރަކާތްތެރިވާ ބޭފުޅުންކަން ވަނީ ފާހަގަކުރައްވައިފައެވެ.
"މި ހުރިހާ ކަންކަމާއި މި ހުރިހާ އަޑުތަކަކީ ވެސް ހަމަ އެމްޑީޕީއަށް މި އިންތިޚާބުގައި ބަލިވާނެކަން އެނގޭތީ އަދި އެކަން މިހާރު ގަބޫލު ވެސް ކޮށްގެން ތިބެ ކުރަމުންދާ ކަންކަން،" ތޮލާލް ވިދާޅުވިއެވެ.
ތޮލާލް ވަނީ އެންޓި- ކެމްޕޭނުގެ އެންމެހާ ހަރަކާތްތައް ހުއްޓުވަން އީސީއަށް ވެސް ގޮވައިލާފައެވެ.