ރައީސް އިބްރާހީމް މުހައްމަދު ޞާލިހު، ޕީޕީއެމް، ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ވައުދުތަކުގެ "ފަހަތުން އުޅުއްވާ" ކަމަށް އެ ކޯލިޝަނުގެ ކެންޕޭނު ތަރުޖަމާނު މުހައްމަދު ތޮލާލް ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ތޮލާލް ވިދާޅުވީ، ރައީސް އިބްރާހީމް މުޙައްމަދު ޞާލިޙު ގދ. ތިނަދޫއަކީ ސިޓީއަކަށް ހެދުމަށް ރޭ ނިންމެވި ނިންމެވުމަކީ އެފަދަ ކަމެއް ކަމަށެވެ.
މިދިޔަ އާދީއްތަ ދުވަހު ތިނަދޫއަށް ވަޑައިގެން ޑރ. މުއިއްޒު ވަނީ އެރަށް ސިޓީއަކަށް ހަދައިދިނުމަށް ވައުދުވެވަޑައިގެންފައެވެ.
ތޮލާލް ވިދާޅުވީ، މުއިއްޒު ވައުދުވެވަޑައިގަތީ، ތިނަދޫ ތަރައްގީ ކުރައްވާ، ގާނޫނު އިސްލާހުކުރުމަށް ފަހު، ތިނަދޫ ސިޓީއަކަށް ހައްދަވައިދެއްވާނެ ކަމަށް ކަމަށެވެ.
ނަމަވެސް، އެރަށަށް ސިޓީއެއްގެ ދަރަޖަދެއްވީ ގާނޫނާ ޚިލާފަށް ކަމަށް އޭނާ ވިދާޅުވިއެވެ.
"ތިނަދޫގައި [ސިޓީއެއްގެ] އެންމެ އަސާސީ ޝަރުތުކަމުގައިވާ، އާބާދީ 10،000 މީހުން ހަމަ ނުވަނީސް ގާނޫނާ ޚިލާފަށް ތިނަދޫއަށް ސިޓީއެއްގެ ދަރަޖަ ދެއްވި ދެއްވުން އެއީ ވަރަށް ބޮޑަށް ރައްޔިތުންނަށް އޮޅުވާލައިގެން ވަރަށް ބޮޑު މަކަރާ ހީލަތުގެ ތެރެއިން ކޮށްފައި އޮތް ކަމަކަށް ވާތީ، އެވާހަކަ ހަމަ އަޅުގަނޑު ދަންނަވާލީ" ތޮލާލް ވިދާޅުވިއެވެ.
އޭނާ ވިދާޅުވީ ތިނަދޫގައި އަދި 8،000 މީހުން ހަމަ ނުވާ ކަމަށެވެ. އެގޮތުން ތިނަދޫ ކައުންސިލް މެދުވެރިކޮށް 10،000 މީހުންގެ ލިސްޓެއް ގެނައި އިރު، އެ ލިސްޓުގައި ގިނަ ބަޔަކު ރިޕީޓުވެފައި ތިބިކަމަށާއި، އަދި ރަށުގައި ނޫޅޭ ގިނަ މީހުން ތިބިކަމަށެވެ.
އެ ލިސްޓު ސައްހަ ނޫންކަން އެލްޖީއޭއާއި، ޑީއެންއާރާއި، ސްޓެޓިސްޓިކްސް ބިއުރޯއިން ވެސް ބުނެފައިވާ ކަމަށް ތޮލާލް ވިދާޅުވިއެވެ. އަދި ހޯމް މިނިސްޓަރު އިމްރާން އަބްދުﷲގެ އެންގެވުމަށް އެ ލިސްޓު ޖެމްސްއިން ނަގާފައިވާ ކަމަށް ވެސް އޭނާ ތުހުމަތު ކުރެއްވިއެވެ.
ތޮލާލް ވިދާޅުވީ އޭގެ އިތުރުން، ޖުޑީޝަރީ ދާއިރާގެ މުސާރަތައް ބޮޑު ކުރުމަށް މުއިއްޒު ވައުދުވެ ވަޑައިގެންނެވުމުން، އެކަން ކުރެއްވުމަށް ރައީސް އުޅުއްވާ ކަމަށް މައުލޫމާތު ލިބިފައިވާ ކަމަށެވެ.
"ކުރިއަށް މިއޮތް ނުވަ ދުވަހަކީ ވަރަށް އާދަޔާ ޚިލާފު ކަންތައްތަކެއް ވާނެ ނުވަ ދުވަސް. [ރައީސް] އިބްރާހީމް މުޙައްމަދު ޞާލިޙު މި ނުވަ ދުވަސްތެރޭގައި އެކަން އިއުލާނުކުރައްވާނެ ކަމަށް އަޅުގަނޑުމެންނަށް އޮތީ މައުލޫމާތު ލިބިފައި" އޭނާ ވިދާޅުވިއެވެ.
މި ތުހުމަތުތައް ތޮލާލް ކުރެއްވި އިރު، ރައީސްގެ ކެންޕޭނު ތަރުޖަމާނު، ޑިފެންސް މިނިސްޓަރު މާރިޔާ އަހްމަދު ދީދީ އަންނަނީ އިދިކޮޅުގެ މެނިފެސްޓޯއަކީ އެމްޑީޕީގެ މެނިފެސްޓޯ ކޮޕީކޮށްގެން ހަދާފައިވާ އެއްޗެއް ކަމަށް ތަކުރާރުކޮށް ތުހުމަތުކުރައްވަމުންނެވެ.