ބާސެލޯނާގެ ލެޖެންޑް އަންދްރޭސް އިނިއެސްޓާ، ޔުނައިޓެޑް އަރަބް އެމިރޭޓްސް (ޔޫއޭއީ)ގެ ކްލަބެއް ކަމަށްވާ އެމިރޭޓްސް ކްލަބު އެފްސީއާ ގުޅުމަށް ނިންމައިފިއެވެ.
ރިޕޯޓުތައް ބުނާގޮތުގައި އެމިރޭޓްސް ކްލަބު އެފްސީއަށް ސޮއިކުރުމަށް އިނިއެސްޓާ މިހާރު ވަނީ ނިންމައިފައެވެ. އިނިއެސްޓާ އެއް އަހަރަށް އެ ކްލަބަށް ސޮއިކުރާ އިރު، އެ ކޮންޓްރެކްޓުގެ ދަށުން އިތުރު އެއް އަހަރު މަޑުކުރުމުގެ ފުރުސަތު އޭނާއަށް ލިބޭނެ ކަމަށް ރިޕޯޓުތައް ބުނެއެވެ.
ޖަޕާނުގެ ލީގުގައި ވާދަކުރާ ވިސެލް ކޯބްއާއެކު އިނިއެސްޓާ ހަދާފައިވާ ކޮންޓްރެކްޓް، މިދިޔަ ސީޒަނަށްފަހު ވަނީ ނިމުމަކަށް އައިސްފައެވެ. ބާސެލޯނާގައި އެކުގައި ކުޅުނު އާޖެންޓީނާ ތަރި ލިއޮނެލް މެސީ އާއި ސްޕެއިން މިޑްފީލްޑަރު ސާޖިއޯ ބުސްކެޓް އަދި ސްޕެއިން ޑިފެންޑަރު ޖޯޑީ އަލްބާއާއެކު އިންޓަ މަޔާމީއަށް ކުޅުމުގެ ފުރުސަތު ވެސް އިނިއެސްޓާއަށް އޮތެވެ. ނަމަވެސް އޭނާ ނިންމާފައިވަނީ އޭޝިއާގައި މަޑުކުރުމަށެވެ.
އުމުރުން 39 އަހަރުގެ ތަޖުރިބާކާރު މިޑްފީލްޑަރު ތަމްރީނުވެގެން ގޮސްފައިވަނީ ވެސް ބާސާގެ ޔޫތު ސިސްޓަމްގެ ތެރެއިންނެވެ. އެއަށްފަހު އޭނާ ބާސާގެ ސީނިއާ ޓީމަށް 2000 ވަނަ އަހަރުން ފެށިގެން 18 އަހަރުވަންދެން ކުޅުނެވެ. ބާސާ ދޫކޮށްލުމަށްފަހު، ވިސެލް ކޯބްއާ އިނިއެސްޓާ ގުޅުނީ 2018 ވަނަ އަހަރުގެ ތެރޭގައެވެ.
އިނިއެސްޓާގެ ކެރިއަރުގައި އެންމެ ކާމިޔާބު ދުވަސްތަކެއް ހޭދަކޮށްފައިވަނީ ބާސާގައެވެ. އޭނާ ވަނީ ބާސާއާއެކު ނުވަ ސްޕެނިޝް ލަލީގާ އާއި ހަތަރު ޗެމްޕިއަންސް ލީގު ކާމިޔާބުކޮށްފައެވެ. އިނިއެސްޓާ އަކީ ސްޕެއިންގެ ރަން ޖީލުގެ ވެސް ކުޅުންތެރިއެކެވެ. އޭނާ ވަނީ ސްޕެއިން ގައުމީ ޓީމާއެކު ވޯލްޑް ކަޕަކާއި ދެ ޔޫރޯ ކާމިޔާބުކޮށްފައެވެ.