ރައީސް އިބްރާހީމް މުޙައްމަދު ޞާލިޙުގެ ނައިބަކަށް ރައްޔިތުން މަޖިލީހުގެ މެޖޯރިޓީ ލީޑަރު އަދި ހިތަދޫ އުތުރު ދާއިރާގެ މެމްބަރު މުޙައްމަދު އަސްލަމް ފަދަ ބޭފުޅަކު ލިބުމަކީ އަގުބޮޑު ޖަވާހިރެއް ލިބުން ފަދަ ކަމެއްގެ ގޮތުގައި އެމްޑީއޭގެ ނާއިބު ލީޑަރު އަލީ މައުރޫފް ސިފަ ކުރައްވައިފިއެވެ.
މިއަހަރުގެ ރިޔާސީ އިންތިޚާބުގައި އެމްޑީޕީ އިން ވާދަ ކުރައްވާ ރައީސް އިބްރާހީމް މުޙައްމަދު ޞާލިޙްގެ ކެންޑިޑެސީ ފޯމު އިލެކްޝަންސް ކޮމިޝަނަށް ހުށައެޅުއްވުމަށް މިއަދު ވަޑައިގަތުމަށްފަހު "ސަން"އަށް ދެއްވި އިންޓަވިއުއެއްގައި މައުރޫފް ވަނީ އަސްލަމްއަށް ވަރަށް ބޮޑަށް ތައުރީފް ކުރައްވާ ވާހަކަދައްކަވާފައެވެ.
އޭނާ ވިދާޅުވީ އަސްލަމް އަކީ ވަރަށް އަޚުލާގު ރަނގަޅު އަދި އެހާމެ، ތަޖުރިބާކާރު ބޭފުޅެއް ކަމަށާއި އެހެންވެ، އަސްލަމް އަކީ އެމްޑީޕީގެ ތެރެއިން ރަނިންމޭޓަކަށް ނެގެން މިވަގުތު ހުރި އެންމެ ފުރިހަމަ ބޭފުޅާ ކަމަށެވެ. ސަބަބެއްގެ ގޮތުގައި ވިދާޅުވީ އޭނާ އަކީ ހަތަރު ދައުރު މަޖިލީހުގައި އިންނަވައި އެ ތަޖުރިބާ ވެސް ހުރި ބޭފުޅެއް ކަމަށްވުމެވެ.
"އެހެންވީމަ އަޅުގަނޑުމެންނަަށް އެބަ އެނގޭ އެމަނިކުފާނުގެ ސްޓްރެންތް، އެމަނިކުފާނަކީ ވަރުގަދަ ބޭފުޅެއް އިނގޭތޯ. ރަނިން މޭޓަކަށް އެފަދަ ބޭފުޅެއް ލިބުމަކީ އަޅުގަނޑު ބުނާނީ ހަމަ އަގޮބޮޑު ޖަވާހިރެއް ލިބުން ފަދަ ކަމެކޭ،" މައުރޫފް ވިދާޅުވިއެވެ.
އަސްލަމް އަކީ އައްޑޫގައި ވަރަށް ސަޕޯޓް ބޮޑު، އަދި އެހާމެ، ގަދަރުވެރި އާއިލާއަކުން ވަޑައިގެން ހުންނެވި ބޭފުޅެއްކަން ފާހަގަ ކުރައްވާ މައުރޫފް ވިދާޅުވީ އެހެންވެ، ރައީސް ޞާލިޙުގެ ނައިބަކަށް އަސްލަމް އައުމާއި ގުޅިގެން އެ އަތޮޅު ރައްޔިތުންގެ ވޯޓް އެތައް ގުނައަކުން އިތުރުވެގެން ދާނެ ކަމަށެވެ.
"އަޅުގަނޑު ދަންނަވާނީ މިއީ މި އިންތިޚާބު ކާމިޔާބު ކުރުމަށް ރައީސް ޞާލިޙް ނިންމެވި ވަރަށް ފުރިހަމަ ނިންމެވުމެއް. އެމްޑީއޭ އާއި އަދާލުގެ ނަމުގައި އެމަނިކުފާނަށް ވަރަށް ބޮޑަށް ޝުކުރުވެސް ދަންނަވަން. އެއީ އަޅުގަނޑުމެން އުއްމީދު ކޮށްގެން ހުރި ވަރަށް ރަނގަޅު ނިންމުމެއްގެ ގޮތުގައި ދެކެނީ،" މައުރޫފް ވިދާޅުވިއެވެ.
ރާއްޖޭގެ ސިޔާސީ މަޝްރަހު މިއަދު ބަދަލުވަމުން މިދާ ގޮތަށް އަލިއަޅުއްވާލައްވާ މައުރޫފް ވިދާޅުވީ މިހެން ކަންތައް ވާނަމަ ރިޔާސީ އިންތިޚާބު އެއްބުރުން ކާމިޔާބު ކުރުމުގެ ފުރުސަތު ރައީސް ޞާލިޙްއަށް ބޮޑުވާނެ ކަމަށެވެ.
އޭނާ ވިދާޅުވީ ކެންޕެއިން ކުރުމަށް މިލިބޭ 30 ދުވަހުގެ ތެރޭގައި މެކުހަށް ޖަހައިގެން ކުރިއަށް ދާނެ ކަމަށާއި އެގޮތުން އެމްޑީޕީއާއި އެމްޑީއޭ އާއި އަދާލަތުން ހަދާފައިވާ ކޯލިޝަނާ އިތުރަށް ގުޅޭ މީހުންނާއިއެކު ރިޔާސީ އިންތިޚާބު އެއްބުރުން ކާމިޔާބު ކުރެވޭނެކަމުގެ ޔަގީންކަން އެބައޮތް ކަމަށެވެ.
"އެހެންވީމަ އަމާން، އުފާވެރި ދިވެހި ރާއްޖެއަކަށް އަޅުގަނޑުމެން އިރާދަކުރެއްވިއްޔާ ވާސިލު ވާނަން،" މައުރޫފް ވިދާޅުވިއެވެ.
ސެޕްޓެމްބަރު ނުވަ ވަނަ ދުވަހު ބާއްވާ ރިޔާސީ އިންތިޚާބުގައި ވާދަ ކުރަން ބޭނުންވާ ފަރާތްތަކުން ނަން ހުށައެޅުމަށް ހުޅުވާލާފައިވާ ފުރުސަތު މާދަމާއަށް ހަމަވާއިރު، ނަން ހުށަހެޅި ކެންޑިޑޭޓުންގެ ނަންތައް ތަރުތީބުކުރުން އަންނަ ބުދަ ދުވަހު އޮންނާނެ ކަމަށް އިލެކްޝަންސް ކޮމިޝަން (އީސީ) އިން ބުނެފައިވެއެވެ.
މައުރޫފް ހިމެނިވަޑައިގަންނަވާ އެމްޑީއޭގެ އިތުރުން، އަދާލަތު ޕާޓީން ވެސް އެ އިންތިހާބަށް އެމްޑީޕީއާއެކު ކޯލިޝަން ހަދާފައެވެ.