އިދިކޮޅު ޕީއެންސީގެ ފަރާތުން ރިޔާސީ ރޭހަށް ނުކުންނަވަން ސެނެޓުގައި ވާދަކުރައްވަން ޝައުގުވެރިކަން ފާޅު ކުރެއްވީ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފު އުމަރާއި މާލޭގެ މޭޔަރު ޑރ. މުހައްމަދު މުއިއްޒު އެކަނިކަން، "ސަން"އަށް ކަށަވަރު ވެއްޖެއެވެ.
ވ. އާރަށް ކުއްޔަށް ދޫކުރުމުގައި ހިޔާނާތްވެ، އެ ފައިސާ ލޯންޑާ ކޮށްފައިވާކަން ސާބިތުވެ ކްރިމިނަލް ކޯޓުން އިއްވާފައިވާ 11 އަހަރުގެ ޖަލު ހުކުމުގެ ސަބަބުން ކުރީގެ ރައީސް އަދި ޕީޕީއެމްގެ ރިޔާސީ ކެންޑިޑޭޓު އަބްދުﷲ ޔާމީން އަބްދުލްގައްޔޫމަށް ވާދަ ނުކުރެވޭނެ ކަަމަށް އިލެކްޝަންސް ކޮމިޝަނުން ވަނީ ނިންމައިފައެވެ. އެ ނިންމުން، އެ މަނިކުފާނުގެ ފަރާތުން މިހާރު ވަނީ ސުޕްރީމް ކޯޓުގައި އިސްތިއުނާފު ކޮށްފައެވެ.
އެކަމަކު، ސުޕްރީމް ކޯޓުން ވެސް ޔާމީނާ ދެކޮޅަށް ނިންމައިފާނެ ހާލަތެއްގައި ބެކަޕް ކެންޑިޑޭޓެއް ނެރުމަށް ޔާމީން ވަނީ ޕީއެންސީއަށް އަންގައިފައެވެ.
އެ މަނިކުފާނު ވަކި ބޭފުޅަކު ދައްކަވަން ވަނީ ތަަކުރާރުކޮށް ދެކޮޅު ހައްދަވަައިފައެވެ. ތިންވަނަ ފަހަރަށް ދެންނެވުމުން ވެސް ޔާމީން ނަމެއް ނުދައްކައި ސެނެޓުން ކެންޑިޑޭޓަކު ކަނޑައަޅަން ނިންމުމުން، މިރޭ ވަނީ ސެނެޓު ބައްދަލުވުމެއް ބާއްވައިފައެވެ.
އެ ބައްދަލުވުމުގައި ރިޔާސީ ޓިކެޓަށް ވާދަކުރައްވަން ނިންމަވާފައިވަނީ ޔާމީން ދައުރުގެ ޑިފެންސް މިނިސްޓަރުކަން ވެސް ކުރެއްވި އާދަމް ޝަރީފާއި އެ ދައުރުގެ ހައުސިން މިނިސްޓަރުކަން ކުރެއްވި މުއިއްޒެވެ. އެހެން ބޭފުޅަކު ވާދަކުރައްވާކަށް ނުނިންމަވައެވެ.
އެކަމަކު، ވާދަ ކުރައްވާ ކެންޑިޑޭޓުން މުޅިން ޔަގީން ވާނީ މާދަމާ ބާއްވާ ސެނެޓު ބައްދަލުވުމުގައެވެ. އަދި، ކެންޑިޑޭޓު ކަނޑައެޅުމަށް މާދަމާގެ ވަގުތެއްގައި އިތުރު ސެނެޓު ބައްދަލުވުމެއް ބާއްވަން ވެސް އެ ކޯލިޝަނުން ވަނީ ނިންމައިފައެވެ.
ދެ ޕާޓީއެއް ނަމަވެސް ޕީޕީއެމް/ޕީއެންސީ ހިންގަނީ އެއް ލީޑާޝިޕަކުންނެވެ. އެހެންވެ، ދެ ޕާޓީގެ ބޭފުޅުންނަށް ވެސް ޕީއެންސީގެ ޓިކެޓަށް ވާދަ ކުރެވޭނެ ކަމަށް އެ ކޯލިޝަނުން ވަނީ ނިންމައިފައެވެ. އާދަމް ޝަރީފަކީ ޕީއެންސީގެ ނައިބު ރައީސް އަދި ޕީޖީ ލީޑަރެވެ. މުއިއްޒަކީ ޕީޕީއެމްގެ ނައިބު ރައީސެވެ.
ކެންޑިޑޭޓަކު ކަނޑައެޅުމުގެ ކަންކަން ދިގު ދެމިގެންދާތީ ޕީޕީއެމުން މިއަދު ވަނީ އެ ކޯލިޝަންގެ މުޅި ލީޑާޝިޕުގެ ކުށުގެ ރެކޯޑު ސާފު ކުރަން ވެސް ނިންމައިފައެވެ. އެނގިފައިވާ ގޮތުގައި ޕީޕީއެމް/ޕީއެންސީގެ ސެނެޓުން ކެންޑިޑޭޓަކު ކަނޑައެޅުން ފަސްކޮށްފައިވަނީ ޕާޓީގެ މަސްލަހަތަށް ބަލައިފައެވެ. އަދި، ލީޑާޝިޕުގެ ގިނަ ބޭފުޅުންތަކެއް ކެންޑިޑޭޓު ކަމަށް ވާދަ ކުރައްވާފާނެތީއެވެ.