މެންޗެސްޓާ ސިޓީ އަދި ސްޕެއިންގެ ފުޓުބޯޅަ ލެޖެންޑް ޑޭވިޑް ސިލްވާ, އުމުރުން 37 އަހަރުގައި ރިޓަޔާކޮށްފިއެވެ.
ޕްރީ ސީޒަން ތަމްރީނުތަކުގެ ތެރެއިން ފައިގެ ލިގަމެންޓަށް ލިބުނު ސީރިއަސް އަނިޔާއަކަށް ފަހު ސިލްވާ ވަނީ ރިޓަޔަމަންޓް އިއުލާންކުރުމަށް އަސަރުގަދަ މެސެޖެއް ދީފައެވެ. އޭނާ ބުނެފައިވާ ގޮތުގައި 20 އަހަރަށް ފަހު ފުޓުބޯޅައާ ދުރަށް ދާން ޖެހުމަކީ ވަރަށް ހިތާމަ ހުރި ކަމެކެވެ.
ސިލްވާގެ ކެރިއަރުގައި އޭނާގެ ޖާދުވީ ހުނަރުތަކުގެ ސަބަބުން މަޝްހޫރުކަން ހޯދާފައިވަނީ "އެލް މަގޯ"ގެ ނަމުންނެވެ. ސިޓީއާ ގުޅުމުގެ ކުރިން ސިލްވާ ތަމްރީނުވެފައި ވަނީ ވެލެންސިއާގެ ޔޫތު ސިސްޓަމްގެ ތެރެއިންނެވެ. ސިޓީގައި ސިލްވާ ހޭދަކުރި މުއްދަތުގެ ތެރޭގައި އޭނާ ވަނީ އެ ކްލަބާ އެކު ހަތަރު ފަހަރު އިނގިރޭސި ޕްރިމިއާ ލީގާއި ދެ ފަހަރު އެފްއޭ ކަޕް ކާމިޔާބުކޮށްފައެވެ.
ސިޓީއަށް 436 މެޗު ކުޅުމަށް ފަހު އޭނާ ވަނީ ރެއާލް ސޮސިއެޑާޑްއާ ގުޅި، އެ ކްލަބާއެކު ހޭދަކުރި ފުރަތަމަ ސީޒަނުގައި ވެސް ކޮޕާ ޑެލްރޭ ކާމިޔާބު ކޮށްފައެވެ. ސިލްވާ އަކީ ވޯލްޑް ކަޕް 2010 ގެ އިތުރުން 2008 އަދި 2012 ގެ ޔޫރޯ ކާމިޔާބުކުރި ސްޕެއިންގެ ރަން ޖީލުގެ މުހިންމު ހިއްސާދާރެކެވެެ.
"މިއަދަކީ އަހަރެންނަށް ހިތާމަވެރި ދުވަހެއް. މިއަދަކީ އަހަރެން އެ ކަމަކަށް އެންމެ ހާއްސަ ކަމެއް ދީފައިވާ މަސައްކަތާ އަލްވަދާއު ކިޔަން ޖެހޭ ދުވަސް. މިއަދު އަހަރެން އަލްވަދާއު މި ކިޔަނީ އަހަރެންގެ އެކުވެރިން، އަހަރެންގެ އާއިލާއެއްގެ ގޮތުގައި ދެކެމުން އައި މީހުންނާ. ވެލެންސިއާ، އައިބާ، ސެލްޓާ ވިގޯ، މެންޗެސްޓާ ސިޓީ އަދި ރެއާލް ސޮސިއެޑާޑަށް ހާއްސަ ޝުކުރެއް އަދާކުރަން. އެ ކްލަބުތަކުން އަހަރެންނަށް އަމިއްލަ ގެއެއްގެ އިހުސާސް ގެނެސްދިން،" ސޯޝަލް މީޑިއާގައި ސިލްވާ ހިއްސާކުރި ވީޑިއޯ މެސެޖުގައި ބުންޏެވެ.
ފުޓުބޯޅަ ކުޅުން ހުއްޓާލުމަށް ފަހު ސިލްވާ ދެން ފެނިގެންދާނީ ކޮން ދާއިރާއަކުން ކަމެއް އޭނާ އަދި އިއުލާންކޮށްފައެއް ނުވެއެވެ. ނަމަވެސް މީގެ ކުރިން ސިލްވާ ބުނެފައިވާ ގޮތުގައި ރިޓަޔާކުރުމަށް ފަހު، ކޯޗެއްގެ ގޮތުގައި އޭނާ ފެނުމަކީ އެކަށީގެންވާ ކަމެކެވެ.