ޑރ. މުސްތަފާ ލުތުފީއަށް ނިޝާން ދިޔަމިގިލީގެ ޝަރަފުގެ އިއްޒަތް އަރުވައިފިއެވެ.
ޑރ. މުސްތަފާ ލުތުފީއަށް މި އިއްޒަތް އެރުވުމަށް ރައީސް ނިންމެވީ އޭނާ ރާއްޖޭގެ ތައުލީމީ ދާއިރާއަށް ކޮށްދެއްވަމުން ގެންދަވާ ޚިދުމަތްތަކުގެ އަގުވަޒަން ކުރުމުގެ ގޮތުންނެވެ.
ދައުލަތަަށް ޚިދުމަތްކުރައްވަމުން ގެންދަވާތާ 34 އަހަރަށްވުރެ ދިގު މުއްދަތެއްވެފައިވާއިރު އެންމެ ފުރަތަމަ ޑރ. މުސްތަފާ މަސައްކަތް ފެއްޓެވީ އެޑިއުކޭޝަނަލް ޕްރޮޖެކްޓް އޮފީހުގެ ޓީޗަރެއްގެ ގޮތުގައި 1977ވަނަ އަހަރުގެ ޖެނުއަރީ 31ގައެވެ.
އެ ދުވަހުން ފެށިގެން އޭނާ ގެންދެވީ މީހުން ބިނާކުރުމުގެ ދާއިރާގައި މުހިންމު މަސައްކަތްތަކެއް ކުރައްވަމުންނެވެ. ތާނަ ޓައިޕް ރައިޓަރު އުފެއްދުމުގެ މަސައްކަތާއި ޓީޗަރުން ތަމްރީނުކޮށްދިނުމުގައި ވެސް ޑރ. މުސްތަފާ ވަނީ މުހިންމު މަސައްކަތްތަކެއް ކުރައްވައިފައެވެ.
ޑރ. މުސްތަފާ ލުތުފީއަށް ނިޝާން ވަނީ ދިޔަމިގިލީގެ ޝަރަފުގެ އިއްޒަތް އަރުވާފައި --- ފޮޓޯ/ ރައީސް އޮފީސް
"ޓީޗަރުންނެއް ނެތް އެއްގޮތަކަށް ވެސް. ޓީޗަރުން ތަމްރީނުކުރަން ދެން އެ ކަމަށް ޓަކައި އަޅުގަނޑުމެން އަތޮޅު ތެރެއިން ކިޔަވައިދޭން އުޅުނު މީހުން ގެނައީ. ގެނެސްގެން ދެން މާލޭގައި އެ ކަން ކުރަން ތަނެއް ވެސް ނެތް. އެ ކަން ކުރާނެ ގޮތެއް ވެސް ނޭނގެ،" އޭރުގެ ހާލަތު ކިޔައިދެއްވަމުން މުސްތަފާ ކިޔައިދެއްވިއެވެ.
ނަމަވެސް ރާއްޖެއިން ބޭރުގެ އެޑްވައިޒަރުންނާއި، ރާއްޖޭގައި އޭރު ތިބި ފަންނީ މީހުންނާއެކު އެ މަސައްކަތްކުރެއްވީކަމަށް މުސްތަފާ ވިދާޅުވިއެވެ.
ތައުލީމީ ދާއިރާގެ ތެރެއިން އެކި ސަރުކާރުތަކުގައި މުސްތަފާ މުހިންމު މަސައްކަތްތައް ކުރެއްވިއެވެ. އެގޮތުން ތައުލީމީ ދާއިރާއާ ގުޅުންހުރި ސިޔާސަތުތައް އެކުލަވައިލުމުގައި އިސް ދައުރެއްވަނީ އަދާކުރައްވައިފައެވެ.
ތައުލީމީ ދާއިރާގެ އިތުރުން ވާހަކަ ފޮތް ވެސް ޑރ. މުސްތަފާ ލިޔުއްވިއެވެ. އޭގެ ތެރޭގައި 'ސަރިޔަތް' ފޮތާއި، 'ރާއްޖޭގެ ސްކޫލު މަންހަޖާއި ތައުލީމް' ފޮތުގެ އިތުރުން 'ޝާމް'ގެ ނަމުގައި ލިޔުއްވި ފޮތް ފާހަގަކޮށްލެވެއެވެ.
ރައީސް މައުމޫން އަބްދުލްގައްޔޫމުގެ ދައުރުގައި ޓޫރިޒަމް މިނިސްޓަރުކަން ވެސް ކުރެއްވިއިރު، ރައީސް މުހަައްމަދު ނަޝީދުގެ ދައުރުގައި މުސްތަފާވަނީ އެޑިއުކޭޝަން މިނިސްޓަރުކަން އަދާކުރައްވައިފައެވެ.
މިހާރު އޭނާ ހުންނެވީ ރައީސުލްޖުމްހޫރިއްޔާގެ އޮފީހުގައި ސްޕެޝަލް އެޑްވައިޒާ އޮން ސޯޝަލް ޕޮލިސީގެ މަގާމުގައެވެ.
"ޝުކުރު އަދާކުރާނީ އަޅުގަނޑުމެންނަށް މި ފުރުސަތު، މި ވަގުތު މި މަގާމް ދެއްވިކަމަށް ޓަކައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް. އަޅުގަނޑު މަސައްކަތްކުރަނީ، ވަޒީފާ އަދައިކުރަނީ. އަބަދުވެސް އަޅުގަނޑު ހިތުގައި އޮންނަނީ ވަޒީފާ އަދައިކުރަން،" މި އިއްޒަތް ލިބުމާ ގުޅިގެން ޑރ. މުސްތަފާ ވިދާޅުވިއެވެ.