ރާއްޖޭގައި މިހާރު ބިނާ ކުރާ މިސްކިތްތަކުގެ އައު ޑަޒައިން ތަފާތު ވާނެ ކަމަށާއި އެއީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ބޭނުންފުޅުވާ ގޮތަށް އެމަނިކުފާނުގެ ލަފާފުޅާއެކު، އިމާރާތްކުރާ މިސްކިތްތައް ކަމަށް އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވެއްޖެއެވެ.
މިނިސްޓަރު މިމޭރުމުން ވިދާޅުވީ އައްޑޫ ސިޓީ މީދޫގައި އިމާރާތްކުރާ މިސްކިތުގެ ޢަމަލީ މަސައްކަތް ފެށުމަށް މިއަދު އެ ރަށުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
އައްޑޫ ސިޓީ މީދޫ އަވަށުގައި އިމާރާތް ކުރާ މިސްކިތުގެ ޢަމަލީ މަސައްކަތް ފެށުން -- ފޮޓޯ/ މިނިސްޓްރީ
ޒާހިރު ވިދާޅުވީ ރައީސް ޞާލިޙް ވެރިކަމާ ހަވާލުވެ ވަޑައިގެންނެވި ފަހުން ރާއްޖެއަށް ވަރަށް ގިނަ އުމްރާނީ ތަރައްގީ ގެންނަވާފައިވާ ކަމަށެވެ. އަދި މި ހުރިހާ ކަމެއްގެ ތެރެއިން، ދީނީ ޝިއާރުގެގޮތުގައި މިފެންނަ މިސްކިތްތަކުން ވެސް އެ ތަރައްގީގެ އަސަރުތައް ފެންނަކަން ފާހަގަ ކުރެއްވިއެވެ.
"ކުރިއާ އަޅާބަލާއިރު މިހާރުގެ މިސްކިތްތަކުގެ ޑިޒައިން ތަފާތުވާނެ. މިއީ ރައީސުލްޖުމްހޫރިއްޔާ ބޭނުންފުޅުވާ ގޮތަށް ރައީސުލްޖުމްހޫރިއްޔާގެ ލަފާފުޅާއެކު، އައު ޑިޒައިންތަކަށް އިމާރާތްކުރާ މިސްކިތްތައް،" މިނިސްޓަރު ވިދާޅުވިއެވެ.
މިހާތަނަށް 12 މިސްކިތެއްގެ މަސައްކަތް ނިމިފައިވާއިރު 19 މިސްކިތެއްގެ މަސައްކަތް ކުރިއަށްދާކަން ފާހަގަކުރައްވައި މިނިސްޓަރު ވިދާޅުވީ އެގްރީމަންޓް ހަދައި ކޮންމެ މިސްކިތަކީ އެއް އަހަރު ދުވަހުގެ ތެރޭގައި ނިންމުމަށް ހަވާލުކޮށްފައިވާ މިސްކިތްތައް ކަމަށެވެ.
ޒާހިރު ވިދާޅުވީ މިހާރު މަސައްކަތް ކުރަމުންދާ 19 މިސްކިތުގެ މަސައްކަތް ނިންމުމަށް ވެސް ދީފައި ވަނީ ހަމަ އެ މުއްދަތު ކަމަށާއި މުއްދަތުގެ ތެރޭގައި މިސްކިތްތަކުގެ މަސައްކަތް ނިންމި ނަމަ އެ މިސްކިތްތައް ވެސް މިއަދު މިހާ ހިސާބަށް ހުންނާނީ ނިމި، ރައްޔިތުންނަށް ބޭނުންކުރެވޭ ވަރުވެފައި ކަމަށެވެ.
"ސަރުކާރުން މި ކުރާ މަސައްކަތްކުރިއަށް ގެންދިޔުމަށް ޓަކައި، މަސައްކަތުގެ ކޮންޓްރެކްޓަރުން ވެސް އެހީތެރިކަންދީ، އެއްބަސްވެފައިވާ މުއްދަތަށް އެ މަސައްކަތް ނިންމަންޖެހޭނެ،" މިނިސްޓަރު ވިދާޅުވިއެވެ.
މިސްކިތްތަކަކީ ރަށެއްގެ ރައްޔިތުންގެ ވަރަށް ބޮޑު އުންމީދެއް އެކަމުގައި އެކުލެވިގެންވާ ބިނާއަކަށްވާއިރު މިސްކިތްތައް ބިނާކުރުމަށް ދެވޭ މުއްދަތަކީވެސް ވަކިގޮތަކަށް ބަލައިގެންދެވޭ މުއްދަތެއްކަން މިނިސްޓަރު ފާހަގަކުރެއްވިއެވެ.
އެގޮތުން ކަނޑައަޅާފައިވާ މުއްދަތުގައި މަސައްކަތް ނުނިމި ދިގުލައިގެން ދިޔުމުގެ ސަބަބުން އެރަށެއްގައި ބިނާކުރުމަށް ކަނޑައެޅޭ މިސްކިތުގެ ޖާގަ ކުޑަވުމުގެ މައްސަލަ ދިމާވާކަން ފާހަގަ ކުރައްވާ މިނިސްޓަރު ވިދާޅުވީ އެހެންވެ، ކަނޑައަޅާފައިވާ މުއްދަތަށް މިސްކިތްތަކުގެ މަސައްކަތް ނިންމުމަކީ ވަރަށް މުހިންމު ކަމެއް ކަމަށެވެ.
އައްޑޫ ސިޓީ މީދޫގައި ބިނާކުރުމަށް ހަމަޖެހިފައިވަނީ 700 މީހުންގެ ޖާގައިގެ މިސްކިތެކެވެ. ސަރުކާރުގެ ޕީއެސްއައިޕީ ބަޖެޓުން ޚަރަދުކޮށްގެން ކުރިއަށް ގެންދިޔުމަށް ހަމަޖެހިފައިވާ، މި މަޝްރޫއުގެ އަގަކީ 13,947,943.70 ރުފިޔާއެވެ.
އަންހެނުންނާއި ފިރިހެނުންނަށްވެސް ނަމާދުކުރެވޭ ގޮތަށް ބިނާކުރާ މި މިސްކިތުގެ މަސައްކަތް ނިންމަންޖެހެނީ 365 ދުވަހުގެ ތެރޭގައެވެ.