މ. ރަތްމަންދޫން، މުޙައްމަދު ނާއިލް ހަފީޒްް
ކުދިކުދި އާބާދީތަކުން ވޯޓަކީ ސިޔާސީ މީހުންނަށް މާ މުހިންމު އެއްޗަކަށް ނުވެދާނެ ކަމަށާއި އެހެން ވިސްނި ނަމަވެސް މި ސަރުކާރުން ވިސްނުން ގެންގުޅުނީ އެ ފަދަ މަދު އާބާދީތަކަށް ވެސް ތަރައްގީ ގެނެސްދިނުމަށް ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
މ. އަތޮޅަށް ކުރައްވާ ކެމްޕޭން ދަތުރުފުޅުގައި ރަތްމަންދޫއަށް ވަޑައިގެން ވާހަކަދައްކަވަަމުން ރައީސް ވިދާޅުވީ 'ރިޔާސީ ރޭހަށް' ނުކުންނަ ސިޔާސީ ފަރާތްތަކަށް ރަތްމަންދޫފަދަ ކުދިކުދި އާބާދީތަކަކީ މުހިންމު ރަށްތަކަކަށް ނުވެދާނެ ކަމަށެވެ.
"118 ވޯޓު ނުވެދާނެ އެއީ އެއްޗަކަށް. އެހެންނަމަވެސް މި ސަރުކާރުން އަޅުގަނޑުމެން ވިސްނީ މާ ބޮޑަށް ރައްޔިތުންނަށް ޚިދުމަތްކޮށްދިނުމަށް،" ރައީސް ވިދާޅުވިއެވެ.
މ. ރަތްމަންދޫގައި ރައީސްގެ ކެމްޕެއިން ޖަލްސާގެ ތެރެއިން -- ފޮޓޯ/ އެމްޑީޕީ ކެމްޕޭން ޓީމް
އެހެންވެ، މި ރަށަކީ އާބާދީ ކުޑަވުމުން އެހެން ސަަރުކާރުތަކުން ވަރަށް ބޮޑަށް އިހުމާލުވެފައި އޮތް ރަށެއް ކަމަށް ރައީސް ވިދާޅުވިއެވެ.
"ސަރުކާރުތަކުން މި ފަދަ ކުދިކުދި އާބާދީތަކަށް އިހުމާލުވެ ތަރައްގީގެ މަޝްރޫތައް، ޚާއްސަކޮށް އަސާސީ ޚިދުމަތްތައް ފޯރުކޮށްދިނުމުގައި އަޅުގަނޑު ދަންނަވާނީ ވަނީ އިހުމާލުވެފައޭ،" ރައީސް ވިދާޅުވިއެވެ.
އެ މަނިކުފާނު ވިދާޅުވީ ރާއްޖޭގައި ގައުމީ ނިސްބަތުން ބޮލަކަށް ޖެހޭ އާމްދަނީ (ޖީޑީޕީ)އަށް ބަލައިއިރު ކޮންމެ މީހަކަށް 12،000 އަށްވުރެ ގިނަ ޑޮލަރު ޖެހޭ ކަމަށެވެ.
އެހެންކަމަށްވާނަމަ އެއްވެސް ރައްޔިތަކީ އަސާސީ ޚިދުމަތްތަކުން މަހުރޫމްވެފައި ހުންނަންޖެހޭ ރައްޔިތަކަށް ވެގެންނުވާނެ ކަމަށެވެ.
"އަސާސީ ޚިދުމަތްތައް ނުލިބިހުރި ރަށްރަށަށް، ރައްޔިތުންނަށް އެ ކަންކަން ކޮށްދިނުން. ރަތްމަންދޫއަކީ ވެސް އެ ގޮތަށް އަޅުގަނޑުމެން އިސްކަންދިން ރަށެއް،" ރައީސް ވިދާޅުވިއެވެ.
އެއާ އެކު އެ މަނިކުފާނު ވިދާޅުވީ ފާއިތުވި ދިގު ތާރީޚުގައި ވެސް ރަތްމަންދޫގައި ނުހިނގާހާ ގިނަ މަޝްރޫއު މި ސަރުކާރުން މި ރަށުގައި ހިންގަމުން އަންނަ ކަމަށެވެ.
އިތުރަށް ވާހަކަދައްކަވަމުން އެ މަނިކުފާނު ވިދާޅުވީ 2018 ވަނަ އަހަރު ޖަޒީރާ ރާއްޖޭގެ މެނިފެސްޓޯ ގެންގުޅުއްވި އެއް ސަބަބަކީ ސަރުކާރަށް ލިބޭ އާމްދަނީ ހަމަހަމަ ގޮތެއްގައި ރައްޔިތުންނަށް ފޯރުކޮށްދިނުމަށް ކަމަށެވެ.
"އަޅުގަނޑުމެން އަބަދު ވެސް ބުނަމުން އަންނަ ވާހަކައެއް ތަރައްގީގެ ވާހަކަދައްކަން ފައްޓަން ވާނީ ގައިން ތާހިރުވެ ތިބެގެންނޭ. ފުރަތަމަ މީހާއަށް ސާފު ބޯފެނާއި ނަރުދަމާގެ ޚިދުމަތާއި، ލަފައިފުރުމުގެ ފަސޭހަކަމާއި، ސިއްހީ ޚިދުމަތާއި، ދަރިންނަށް ތައުލީމް ދެވޭނެ ގޮތެއް ނެތި ދެން ކޮން ތަރައްގީގެ ވާހަކައެއް ދައްކާކަށްތޯ،" އެ މަނިކުފާނު ވިދާޅުވިއެވެ.
ރައީސް ވިދާޅުވީ މި ސަރުކާރުން ފަށައިގަތީ ކުދި އާބާދީތަކަށް އެ ފަދަ އަސާސީ ޚިދުމަތްތައް ކަށަވަރުކޮށްދިނުމުގެ މަސައްކަތް ކަމަށެވެ.
ރައްޔިތުންގެ ކަންބޮޑުވުންތައް އެއްސެވުމަށްފަހު ރައީސްވަނީ ރަތްމަންދޫގައި ސެޓެލައިޓް ސްކޫލު ފެށުމަށް ޓަކައި އިންތިޒާމުތައް ހަމަޖެހިގެން އަންނާނެކަމަށް ވިދާޅުވެފައެެވެ. އަދި ރަށްގިރުމުގެ މައްސަލަ ބަނދަރަކާއެކު ވަރަށް އަވަހަށް ހައްލުވާނެކަމަށް ވިދާޅުވެފައެވެ.