އެމްޑީޕީ 'ރޫޅާލާނެ' ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ކުރީގެ ރައީސް މުހައްމަދު ނަޝީދު, ވަރަށް ކޯފާ އިސް ކުރައްވާ މިރޭ ވިދާޅުވެއްޖެއެވެ.
އެ މަނިކުފާނު "ދަ ޑިމޮކްރެޓްސް"އަށް ސޮއިކުރެއްވުމަށް މިރޭ އާޓިފިޝަލް ބީޗުގައި ބޭއްވި ޖަލްސާގައި ވާހަކަފުޅު ދައްކަވަމުން ވިދާޅުވީ މިދިޔަ މަހުގެ 21 ވަނަ ދުވަހު އެމްޑީޕީން ވަކިވީ ވަރަށް ހިތްދަތިކަމާ އެކު ކަމަށެވެ.
"ޕާޓީ ދޫކޮށްލީ ވަރަށް ހިތްދަތިކަމާ އެކު. އެހެންނަމަވެސް ވަކި ފިކުރެއް ދިރުވުމަށް އެ ޕާޓީ ވެސް ދޫކޮށްލަންޖެހުނީ" ނަޝީދު ވިދާޅުވިއެވެ.
އެ މަނިކުފާނު ވިދާޅުވީ އެ ފިކުރު ދިރުވުމަށްޓަަކައި ކުރިއަށް އޮތް އިންތިޚާބުގައި އެ ޕާޓީއިން ވާދަކޮށް އެމްޑީޕީ ރޫޅާލާނެ ކަމަށެވެ.
"ކުރިއަށް އޮތް ތަނުގައި އެމްޑީޕީ އެއްކޮށް ރޫޅާލާނަން، ރޫޅާލާނަން، ރޫޅާލާނަން!" ނަޝީދު ވިދާޅުވިއެވެ.
ނަޝީދު ވިދާޅުވީ ޑިމޮކްރެޓްސް ޕާޓީއާއި ގުޅުނު ބޭފުޅުންނަކީ އެއްވެސް ޝައްކެއް ނެތް ގޮތުގައި ވަރަށް ހިތްވަރުގަދަ ބޭފުޅުން ކަމަށެވެ. އަދި، އެއީ ތަބީއަތު ހަރުދަނާ، އަހުލާގީ ބޭފުޅުން ކަމަށް އެމަނިކުފާނު ވިދާޅުވިއެވެ. އެ މަނިކުފާނު ވިދާޅުވީ ޑިމޮކްރެޓްސް ޕާޓީ އުފެއްދީ ވަކި ފިކުރެއް ދިރުވަން ކަމަށެވެ. އެގޮތުން އެ މަނިކުފާނުގެ އަބަދުވެސް އަމާޒަކަށްވީ ވަކި އުސޫލެއް ހޯދުމަށް ނުވަތަ ގޮތެއް ހޯދުމަށް ކަމަށް ވިދާޅުވިއެވެ.
"ވަކި ޕާޓީއެއް އަޅުގަނޑުމެން މި ހެދީ މި ބޭނުމަށްޓަކައި. ރައްޔިތުންގެ ބޭނުންތައް ފުއްދައި ދިނުމަށްޓަކައި. ރައްޔިތުންގެ ހާލަތު އިރާދަކުރެއްވިއްޔާ ރަނގަޅު ކޮށްދޭނަން" ނަޝީދު ވިދާޅުވިއެވެ.
ނަޝީދު ވަނީ ކަށިކެޔޮގަނޑެއްގެ ގޮތުގައި އެމްޑީޕީ ސިފަކުރައްވާ ވާހަކަފުޅު ނިންމާލައްވަމުން، ވަރަށް ބޮޑަށް ކޯފާ އިސްކުރައްވާ ހަތް ފަހަރު އެމްޑީފީ ރޫޅާލާނެ ކަމަށް ވިދާޅުވެފައެވެ.
"ތި ކެޔޮގަނޑުގެ ފޫވައް ވެއްޓިއްޖެ. އިރާދަކުރެއްވިއްޔާ އަޅުގަނޑުމެން ތި ޕާޓީ ރޫޅާލާނަން،" ނަޝީދު ވިދާޅުވިއެވެ.
ދަ ޑިމޮކްރެޓްސް އުފެއްދުމުގައި އިސްކޮށް ހަރަކާތްތެރި ވަނީ އެމްޑީޕީގައި ނަޝީދު ހިންގެވި "ފިކުރެއްގެ ދިރުން" ގޮތްޕަށް އޭރު ތާއީދު ކުރެއްވި މެންބަރުންނެވެ. އެ ޕާޓީ އުފެއްދުމަށްޓަކައި ނަޝީދަށް ތާއިދު ކުރައްވާ ގިނަ މެންބަރުންތަކެއް މިދިޔަ މެއި މަހު އެއް ފަހަރާ އެމްޑީޕީން ވަކިވިއެވެ.
ނަމަވެސް އެމްޑީޕީގެ ކޮންޓްރޯލް ހޯއްދަވާނެ ކަމަށް ވިދާޅުވެ ނަޝީދު އެ ޕާޓީގައި މަޑުކުރެއްވިއެވެ. އެއަށް ފަހު މިދިޔަ މަހުގެ 21 ވަނަ ދުވަހު ނަޝީދު ވަނީ އެ ޕާޓީގައި ހުރުމަކީ އެންމެ ރަނގަޅު ގޮތް ކަމަށް ދެކިވަޑައިނުގަންނަވާ ކަމަށް ވިދާޅުވެ، ޕާޓީން ވަކިވެވަޑައިގެންފައެވެ.
މިހާރު ޑިމޮކްރެޓްސްއިން އަތޮޅު ތެރޭގައާއި މާލޭގައި ސިޔާސީ ހަރަކާތް ހިންގަމުން އަންނައިރު ސަރުކާރު ބަދަލުކުރުމަށް އެކުގައި ގުޅިގެން މަސައްކަތް ކުރުމަށް ޑިމޮކްރެޓްސްއިން އަންނަނީ އިދިކޮޅު ޕީޕީއެމާ އެކު މަސައްކަތް ކުރަމުންނެވެ.