މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ސެކްރެޓަރީ ޖެނެރަލްގެ މަގާމަށް ޝާހު އިސްމާޢިލް އައްޔަންކޮށްފިއެވެ.
ޝާހު އެ މަގާމަށް އައްޔަންކުރީ އެމްޑީއޭގެ ގައުމީ މަޖިލީހުން މިއަދު ހަވީރު ބޭއްވި ބައްދަލުވުމުގެ ތެރެއިންނެވެ. މީގެ ކުރިން އެ މަގާމުގައި ހުންނެވީ އިސްމާޢިލް ސަޢީދެވެ.
"ސަން"އާ ވާހަކަދައްކަވަމުން ޝާހު ވިދާޅުވީ ޕާޓީގެ ސެކްރެޓަރީ ޖެނެރަލްގެ މަގާމު ލިބުމަކީ ވަރަށް ބޮޑު ޝަރަފެއް ކަމަށާއި އެހާމެ ބޮޑު މަސްއޫލިއްޔަތެއް ކަމަށެވެ.
އޭނާއަށް އިތުބާރުކުރައްވައި، އެފަދަ ބުރަ މަސްއޫލިއްޔަތެއް ހަވާލުކޮށްދެއްވި ކަމަށްޓަކައި އެމްޑީއޭގެ ރައީސް އަޙްމަދު ސިޔާމް މުޙައްމަދަށް ޝުކުރު އަދާކުރައްވައި ޝާހު ވިދާޅުވީ އެ މަސްއޫލިއްޔަތަކީ ވަރަށް ގޮންޖެހުންތައް ގިނަ މަސައްކަތަކަށް ވާނެ ކަމަށެވެ.
ކުރިއަށް އޮތް ތަނުގައި މި ޕާޓީ ތައްޔާރުވެފަ އޮތް ޕްލެޓްފޯމް އިތުރަށް ހަރުދަނާކޮށް ވަރުގަދަކޮށް، ކުރިމަގުގައި އަޅުގަނޑުމެން ހާސިލްކުރަން ބޭނުންވާ މަގްސަދު ހާސިލްކޮށް އަދި ގިރާކުރަން ޖެހޭ ކޮންމެ ކަމެއް ގިރާކޮށް އަދި އިދާރީގޮތުން ވެސް ކުރަންޖެހޭ ހުރިހާ މަސައްކަތެއް އަޅުގަނޑު އަވަދިނެތި ކުރާނަން ޝާހު އިސްމާއިލް
މީގެ ކުރިން ގައުމީ ފުޓްބޯޅަ ޓީމުގައި ކުޅުއްވާފައިވާ ޝާހު، ސްޕޯޓްސް މިނިސްޓްރީ އާއި ފިޝަރީސް މިނިސްޓްރީގެ ވެސް ޑެޕިއުޓީ މިނިސްޓަރުކަން ކުރައްވާފައިވެއެވެ. އަދި ދިވެހި ޕްރިމިއާ ލީގް (ޑީޕީއެލް)ގެ ޑިރެކްޓާ އޮފް އެޑްމިނިސްޓްރޭޝަންގެ މަގާމާއި ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ޖެނެރަލް ސެކްރެޓަރީގެ މަގާމު ވެސް ފުރުއްވާފައިވެއެވެ.
ފުޓްބޯޅަ ކުޅުއްވި ދުވަސްވަރު ވެސް ގިނަ ކާމިޔާބީތަކެއް ހޯއްދަވާފައިވާ ޝާހަކީ އޭނާގެ ރަން ދުވަސްވަރު ގިނަ ޑިފެންޑަރުން އެންމެ ޖެހިލުންވާ އެއްފޯވާޑެވެ. އަދި އޭނާ ވަނީ ރާއްޖޭގެ ގައުމީ ފުޓްބޯޅަ ޓީމުގެ ކެޕްޓަންގެ މަގާމު ވެސް އަދާކުރައްވާފައެވެ.