ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް އާއި ފިރިކަލުން ކިނބިދޫ ދާއިރާގެ މެންބަރު މުހައްމަދު ނާޝިޒް ހިމެނޭހެން ޖުމްލަ 10 މެންބަރަކަށް މާލޭން ގޯތި ލިބިވަޑައިގަންނަވާކަން ހާމަވެއްޖެއެވެ.
ސަރުކާރުން ފެށި ބިންވެރިޔާ ސްކީމްގެ ދަށުން 5،000 ގޯތި ލިބޭ ފަރާތްތަކުގެ ލިސްޓު މިއަދު އާންމު ކޮށްފައިވާއިރު، ރައްޔިތުންގެ މަޖިލީހުގެ މާލޭގެ ދާއިރާތައް ތަމްސީލް ކުރައްވާ 15 މެންބަރުންގެ ތެރެއިން އަށް މެންބަރަކަށް ގޯތި ލިބިފައިވެއެވެ. އޭގެ އިތުރުން ދެން ލިބިވަޑައިގެންނެވީ ރޮޒައިނާ އަދި އޭނާގެ ފިރިކަލުންނަށެވެ.
އެއީ އެމްޑީޕީގެ ފަސް މެމްބަރަކާއި، ރައީސް މުހައްމަދު ނަޝީދަށް ތާއިދު ކުރައްވާ މެންބަރުން އުފައްދަން މަސައްކަތް ކުރާ "ދަ ޑިމޮކްރެޓްސް" އަށް ނިސްބަތްވާ ހަތަރު މެންބަރެއްގެ އިތުރުން އެމްއެންޕީގެ މެންބަރެކެވެ.
ގޯތި ލިބުނު މެންބަރުންގެ ތަފްސީލް:
- މާފަންނު ހުޅަނގު ދާއިރާގެ މެމްބަރު މުހައްމަދު ފަލާހް (އެމްޑީޕީ) - އޭނާއާ އެކު ޖޮއިންޓް ފޯމް ހުށަހެޅި ދެ މީހުންގެ ތެރެއިން އެކަކު ޝަރުތު ހަމަނުވޭ. ފަލާހުއަށް އެހެން މީހަކާ ބައިވެރިވެގެން ގޯތި ހޯދުމުގެ ފުރުސަތު އޮންނާނެ.
- ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒު (އެމްޑީޕީ) - އޭނާ އެކަނި ހުށަހެޅުއްވި ފޯމަށް 69.16 ޕޮއިންޓް ލިބިފައިވޭ.
- މައްޗަންގޯޅި ދެކުނު ދާއިރާގެ މެމްބަރު އަހުމަދު ހައިތަމް (އެމްޑީޕީ) – ތިން މީހަކު ހިމެނޭހެން ހުށަހެޅުއްވި ޖޮއިންޓް ފޯމުގައި އެންމެންގެ ޝަރުތު ހަމަވޭ. ލިބިފައިވަނީ 79.69 ޕޮއިންޓް.
- ހެންވޭރު ހުޅަނގު ދާއިރާގެ މެމްބަރު ހަސަން ލަތީފް (ޑިމޮކްރެޓްސް) - ތިން މީހަކު ހިމެނޭހެން ހުށަހެޅުއްވި ޖޮއިންޓް ފޯމުގައި އެންމެންގެ ޝަރުތު ހަމަވޭ. ލިބިފައިވަނީ 100.26 ޕޮއިންޓް.
- މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (ޑިމޮކްރެޓްސް) – ޖުމްލަ ހަ މީހަކު ހިމެނޭހެން ފޯމު ހުށަހެޅި މީހުންގެ ތެރެއިން ދެ މީހަކު ޝަރުތު ހަމަނުވޭ. ލިބިފައިވަނީ 76.18 ޕޮއިންޓް
- މައްޗަންގޯޅި އުތުރު ދާއިރާގެ މެމްބަރު މުހައްމަދު ރަޝީދު (ޑިމޮކްރެޓްސް) - ޖުމްލަ ހަ މީހަކު ހިމެނޭހެން ފޯމު ހުށަހެޅި އެންމެންގެ ޝަރުތުހަމަވޭ. ލިބިވަޑައިގެންނެވީ 91.07 ޕޮއިންޓް.
- މާފަންނު މެދު ދާއިރާގެ މެމްބަރު އިބްރާހިމް ރަޝީދު (ޑިމޮކްރެޓްސް) - ޖުމްލަ ތިން މީހަކު ހިމެނޭހެން ފޯމު ހުށަހެޅި އެންމެންގެ ޝަރުތުހަމަވޭ. ލިބިވަޑައިގެންނެވީ 72 ޕޮއިންޓް.
- ވިލިމާލޭ ދާއިރާގެ މެމްބަރު އަހުމަދު އުޝާމް (އެމްއެންޕީ) - ޖުމްލަ ފަސް މީހަކު ހިމެނޭހެން ފޯމު ހުށަހެޅި އެންމެންގެ ޝަރުތުހަމަވޭ. ލިބިވަޑައިގެންނެވީ 82.72 ޕޮއިންޓް.
- އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އަދި ފިރިކަލުން، ކިނބިދޫ ދާއިރާގެ މެމްބަރު މުހައްމަދު ނާޝިޒް (އެމްޑީޕީ) - ދަރިކަނބަލުން ހިމެނޭހެން ހުށަހެޅި ފޯމަށް އެންމެންގެ ޝަރުތު ހަމަވޭ ލިބިވަޑައިގެންނެވީ 71.59 ޕޮއިންޓް.
މި ސަރުކާރުން ބޯހިޔާވަހިކަން ފޯރުކޮށްދިނުމަށް ހިންގާ 'ބިންވެރިޔާ ސްކީމް' އާއި 'ގެދޮރުވެރިޔާ ސްކީމް'ގެ ދަށުން ހުޅުމާލެއާއި ގުޅީފަޅު ހިއްކައިގެން ދޫކުރާ ގޯއްޗާއި، ހުޅުމާލޭގައި މިހާރު އިމާރާތް ކުރަމުން އަންނަ 4،000 ފްލެޓަށް އެދުމަށް ސަރުކާރުން ހުޅުވާލީ މިދިޔަ އަހަރުގެ ޖޫން މަހު އެވެ.
މިދިޔަ އަހަރުގެ އޮކްޓޯބަރު މަހުގެ 15 ވަނަ ދުވަހާ ހަމައަށް އެ ދެ ސްކީމުގެ ދަށުން ގޯއްޗާއި ފްލެޓަށް އެދި ކުރިމަތިލުމުގެ ފުރުސަތު ހަމަވި އިރު، ޖުމްލަ 36،000 އާ ގާތްކުރާ އަދަދަކަށް ފޯމު ހުށަހަޅާފައިވެއެވެ. އޭގެ ތެރޭގައި ގޯއްޗަށް އެދި 15،164 ފޯމާއި، ތިން ކޮޓަރީގެ އެޕާޓްމަންޓަށް އެދި 14،489 ފޯމުގެ އިތުރުން ދެ ކޮޓަރީގެ އެޕާޓްމަންޓަށް އެދި 6،208 ފޯމު ހުށަހަޅާފައިވެއެވެ.
ބިންވެރިޔާ ސްކީމްގައި ބައިވެރިވުމަށް 15،164 ފޯމް ހުށަހަޅާފައިވާއިރު، އެ ފޯމްތަކުގައި 23،088 މީހެއްގެ ނަން ހިމެނޭ ކަމަށް އޭނާ ވިދާޅުވިއެވެ. އޭގެ ތެރެއިން އަސާސީ ޝަރުތުތައް 12،794 ފޯމެއްގައި ހަމަވާއިރު، ޝަރުތު ހަމަވާ މީހުންގެ އަދަދު 19،857 އަށް އަރައެވެ.
މިއަދު އާންމު ކުރި ލިސްޓުގައި 10،314 މީހުންގެ ނަން ހިމެނޭއިރު، އެ ލިސްޓުގައި ނުހިމެނޭ ނަމަވެސް ޝަރުތު ހަމަވާ 9،500އަށް ވުރެ ގިނަ މީހުންނަށް ވެސް ގޯތި ދޭން ނިންމާފައިވާ ކަމަށް ޕްލޭނިން މިނިސްޓްރީން ބުނެފައިވެއެވެ.