ގަލޮޅު އާސަހަރާ ޒަމާނީ ފެންވަރަށް ތަރައްގީކުރުމުގެ މަސައްކަތް އަންނަ ސެޕްޓެމްބަރު މަހުގެ ކުރިން ނިންމޭތޯ މަސައްކަތްކުރަމުން އަންނަކަމަށް މާލޭ ސިޓީ ކައުންސިލުން މިއަދު ބުނެފިއެވެ.
އާސަހަރާ ތަރައްގީކުރުމަށް ސަހަރާގައި ކަށުކަމާކެމީގެ ކަންކަން ވަގުތީ ގޮތުން ހުއްޓައިލީ މިދިޔަ މަހުގައެވެ. ނަމަވެސް ނަމާދު ވަގުތުތަކުގައި އާސަހަރާ މިސްކިތުގައި ނަމާދުކުރެވޭނެއެވެ.
އާސަހަރާ ތަރައްގީކުރުމުގެ މަސައްކަތާ ގުޅިގެން "ސަން"އާ ވާހަކަދައްކަވަމުން މާލޭ ސިޓީގެ ކައުންސިލަރު އާދަމް ރަމީޒް ވިދާޅުވީ ފެށުނީއްސުރެ އާސަހަރާ އޮތީ އެއްވެސް އާބާތުރަ ފިލުވުމެއްނެތި، ތަރައްގީނުކޮށް ދޫކޮށްލައިފައި އޮތް ތަނެއްގެ ގޮތުގައިކަަމަށެވެ.
ނަަމަވެސް މި ދައުރުގެ ސިޓީ ކައުންސިލުން، މޭޔަރު ޑރ. މުހައްމަދު މުއިއްޒުގެ އިސްނެންގެވުމާއެކު މާލޭގެ ތަރައްގީއަށް ކުރާ މަސައްކަތުގައި އާސަހަރާ ވެސް ތަރައްގީކުރަން ނިންމީކަމަށް ރަމީޒް ވިދާޅުވިއެވެ.
އާސަހަރާ ޒަމާނީ ފެންވަރަށް ތަރައްގީކުރުމުގެ މަސައްކަތް ކުރިއަށްދަނީ -- ސަން ފޮޓޯ/ ނާއިލް ހަފީޒް
"މި ކައުންސިލުން ޑރ. މުއިއްޒު އެ ތަން ތަރައްގީކުރަން ނިންމަވައި ކައުންސިލުން ފާސްކޮށް އެ ތަން ތަރައްގީ މި ކުރަނީ،" އޭނާ ވިދާޅުވިއެވެ.
ރަމީޒް ވިދާޅުވީ އާސަހަރާ ތަރައްގީކުރުމުގެ މަސައްކަތް ނިމޭއިރު އެ ތަނަށް ނަމާދުކުރަން އެއްފަހަރާ ވަދެވޭ މީހުންގެ އަދަދު 120 އިން 350 އަށް އިތުރުވާނެކަމަށެވެ.
އެ ތަން ތަރައްގީކޮށް އެ ތަނުގައި އަޅަނީ އިމާރާތެކެވެ. ތަރައްގީކޮށް ނިމޭއިރު:
- ފުރަތަމަ ފްލޯގައި އަންހެނުންނަށް ޚާއްސަ ނަމާދުކުރާ ޖާގައެއް ހުންނާނެ
- ސަހަރާއަށް އެމްބިއުލާންސް ވަނުން ސަހަރާގެ ފަހަތު ގޭޓަށް ބަދަލުކުރާނެ
- ދޮޅިދާންގޭގެ މައްޗަށް 35 މީހުންގެ ޖާގައިގެ ވީއަޕީ ފެންވަރުގެ ތިން ލައުންޖެއް ތަރައްގީކުރާނެ. ކޮންމެ ލައުންޖެއްގައި ދެ ފާޚާނާއާއި ގާތުންދޭ މައިންނަށް ޚާއްސަ ޖާގަ ހުންނާނެ. އަދި ޚާއްސަ އެހީއަށް ބޭނުންވާ މީހުންނަށް ބޭނުންކުރެވޭފަދަ ފާޚާނާއެއް ހުންނާނެ
މީގެ އިތުރުން އިސްލާމްދީނުގައި އަންހެނުންނަށް ގަބުރުސްތާނަށް ވަނުން މަނާކުރެވިފައިވާތީ، އެ މީހުންނަށް ފަހު ވަގުތު އާއިލާއިން ވަކިވާ މީހާގެ ކަށުކަމާކެމީގެ މަންޒަރުތައް ފެންނާނެ މަގުފަހިކުރުމަށް ވެސް ޚާއްސަ އިންތިޒާމެއް ހަމަޖެހޭނެކަމަށް ރަމީޒް ވިދާޅުވިއެވެ.
އެގޮތުން އެންމެ މަތީ ފްލޯއިން ވަޅުލާ ސަރަހައްދު ބެލުމުގެ އިންތިޒާމު ހަމަޖައްސާނެކަމަށް ވެސް ރަމީޒް ވިދާޅުވިއެވެ.
އޭނާ ވިދާޅުވީ މުޅި މަސައްކަތް ތިން މަސް ދުވަހުގެ ތެރޭ ނިންމަން މަސައްކަތްކުރާނެކަމަށެވެ. ނަމަވެސް އޭގެ ކުރިން ވެސް މަސައްކަތް ނިންމޭތޯ ބަލަމުން އަންނަކަމަށެވެ.
"ސެޕްޓެމްބަރުގެ ވެސް ކުރިން ނިންމޭތޯ އަޅުގަނޑުމެން މި ބަލަނީ،" ރަމީޒް ވިދާޅުވިއެވެ.