ސްކޫލް ދައުރުގައި ހޯދި ރަންވަނަތަކާއެކު, ދިރިއުޅުމުގެ އަމަލީ މައިދާނުގައި ރަނގަޅުގޮތުގައި ކުރިއަށްދާން އެނގެންޖެހޭކަމަށް ދިވެހިބަހުގެ އެކެޑަމީގެ ރައީސް ޑރ. އަޝްރަފް ޢަބްދުއްރަޙީމް ވިދާޅުވެއްޖެއެވެ.
އިމާދުއްދީން ސްކޫލުގެ މިދިޔަ އަހަރުގެ އިނާމް ދިނުމުގެ ޖަލްސާ ޝަރަފުވެރިކޮށްދެއްވައި ވާހަކަދައްކަވަމުން ރޭ ޑރ. އަޝްރަފް ވިދާޅުވީ، ސްކޫލް ދައުރުގައި ދަރިވަރުން ހޯދާ މޮޅު ނަތީޖާގެ ބޭނުން އަމަލީ ދިރިއުޅުމުގައި ހިފެމުންދޭތޯ މިއަދު ވިސްނާލަންޖެހޭ ކަމަށެވެ.
ޑރ. އަޝްރަފް ވިދާޅުވީ އަމަލީ މައިދާނުގައި ދަރިވަރުންނަކީ ކާމިޔާބު ބައެއްކަމުގައި ހެދުމަށް ތައުލީމީ ނިޒާމަށް އިތުރު ކުރަން ޖެހޭ ކަންތައްތަކެއް އެބަހުރި ކަމަށެވެ. މިގޮތުން ދަރިވަރުންނަކީ ރަނގަޅު އާދަތަކެއް ލިބިފައިވާ ބައެއްކަމުގައި ހެދުން މުހިންމު ކަމަށާއި އޭގެ ތެރޭގައި ގަޑިއަށް ފަރުވާތެރިވާން ދަސްކުރުން ހިމެނޭ ކަމަށް ޑރ. އަޝްރަފް ވިދާޅުވިއެވެ.
"މާދަމާ ތީގެ ތެރެއިން ކޮން ކުއްޖެއް ކަމެއް ނޭނގެ މެޑިކަލް ޑޮކްޓަރަކަށް ވާނީ. ދެން ބަލިމީހަކު ބަލަންދާން އޮންނަ ގަޑިއަށް އެ ޑޮކްޓަރަށް ހާޒިރުނުވެވިއްޖެނަމަ ސްކޫލްގަ ކީއްކުރަން ހޯދި ރަން ވަނަތަކެއް،" މިސާލެއް ޖައްސަވަމުން ޑރ އަޝްރަފް ވިދާޅުވިއެވެ.
މި މައުޟޫއުގައި ވާހަކަދައްކަވަމުން ޑރ. އަޝްރަފް ވަނީ ދުނިޔޭގައި ފާހަގަކޮށްލެވޭ ބައެއް ސަހްޝިއްޔަތުންގެ ހަޔާތުން ލިބޭ އަގުހުރި ފިލާވަޅުތަކުގެ މައްޗަށް އަލިއަޅުއްވާލައްވާފައެވެ.
"ޕާކިސްތާނުގެ ބާނީ މުހައްމަދު އަލީ ޖަނާހް ޤާނޫނު ހަދާ މަޖިލީހަށް ވަދެ ވަޑައިގަންނަވާއިރު، މަޖިލީހުގައި ތިއްބަވާ ބޭފުޅުންގެ ގަޑި ހަމަކޮށްލާ ކަމަށްވަނީ. ކޮންފަދަ ވަރުގަދަ ޝަހުސިއްޔަތެއްތޯ،" ޑރ. އަޝްރަފް ވިދާޅުވިއެވެ.
ޕާކިސްތާނަކީ މިނިވަން ދައުލަތަކަށް ހެދުމުގައި އިސްކޮށް މަސައްކަތް ކުރެއްވި މުހައްމަދު އަލީ ޖިނާހަކީ ވަރަށް ގިނަ ބަޔަކު ނަމޫނާއަކަށް ބަލަމުން އަންނަ ޝަހުސިއްޔަތެކެވެ. ޚާއްޞަކޮށް ވަގުތަށް ކަމޭހިއްތެވުމުގައެވެ.
ޑރ. އަޝްރަފް ވިދާޅުވީ މުހައްމަދު އަލީ ޖިނާހް ޝަހްސިއްޔަތަކަށް ވުމުގެ އަސްލަކީ ގަޑިއަށް ފަރުވާތެރިވުމާއި، ކަންކަމަށް ސަމާލުކަންދިނުން ކަމަށެވެ.
އެ ޖަލްސާގައި ވާހަކަދައްކަވަމުން ޑރ. އަޝްރަފްވަނީ ޖަލްސާގައި އިނާމް ހާސިލް ނުކުރެވުނު ދަރިވަރުން ވެސް މާޔޫސްނުވެ، އަޒުމުގައި ކުރިއަށްދިއުމަށް އިލްތިމާސް ކުރައްވާފައެވެ.
"ވެއްޓޭ ކޮންމެ ފަހަރަކު ހިތްވަރުކޮށްފައި ތެދުވަންވާނެ. ދުނިޔެ އަހަރުމެންނަށް ދައްކައިދިނީ އެމަގުން ކަންކުރަން. އަލިބާބާގެ ކޯ ފައުންޑަރ ޖެކް މާ، މަޝްހޫރު ހަވަޑް ޔުނިވަސިޓީއަށް ވަނުމަށް 10 ފަހަރު ޓެސްޓް ހެދުމުންވެސް ވީ ފެއިލް. މި ނޫނަސް ވަރަށް ގިނަ ކަންކަމުގައި ނާކާމީޔާބީއާ ކުރިމަތިލާން ޖެހުނު. ނަމަވެސް މިއަދު އޭނާއަކީ އޭޝިއާގެ އެންމެ މުއްސަނދި އެކަކު،" ބިލިއަނަރު ޖެކްމާގެ މިސާލު ނަންގަވަމުން ޑރ. އަޝްރަފް ވިދާޅުވިއެވެ.
ޑރ. އަޝްރަފް ވިދާޅުވީ ކާމިޔާބީއަކީ މަސައްކަތްތެރިންގެ ހައްގެއް ކަމަށާއި، އެ ފުރުސަތު ހުރިހާ ދަރިވަރުންނަށްވެސް އެބައޮތް ކަމަށެވެ.