ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ވަކިކުރަން ސަރުކާރުގެ މެމްބަރުންނަށް ނުކެރޭނެ ކަމަށް މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
އެސްއެސް ޓިވީގެ "ބާރު ހަތަރެއް"ގައި ވާހަކަދައްކަވަމުން ވައްޑެ ވިދާޅުވީ ރައީސް ނަޝީދު މަގާމުން ދުރުކުރުމަށް ވާހަކަދައްކަމުން އަންނަތާ ދެ އަހަރު ދުވަސްވެއްޖެ ކަމަށެވެ. އަދި އެއީ ކުރަން އުޅޭ ކަމެއްކަމަށް ގަބޫލުނުކުރައްވާ ކަމަށް ވައްޑެ ވިދާޅުވިއެވެ.
"ރައީސް ނަޝީދުގެ އިތުބާރު ނެތްކަމުގެ ވާހަކަ ދައްކައި ދައްކައި އެ ދިގުލައިގެން އެނގިވަޑައިގަންނަވާނެ، މި ސަރުކާރުން ހިންގާ މަޝްރޫއެކޭ އެއްގޮތް، ހަމަ އަންނަނީ އަންނަނީގައި މިދިޔައީ ގާތްގަނޑަކަށް ދެ އަހަރެއްހާ ދުވަސް. އެހެންވީމާ އަޅުގަނޑެއް ގަބޫލެއް ނުކުރަން އެ ކަން ވެސް ކުރެވޭނެ ކަމަކަށް. ކުރަން ކެރޭނެ ކަމަކަށް،" ވައްޑެ ވިދާޅުވިއެވެ.
އޭނާ ވިދާޅުވީ އެކަން ކުރައްވަން މަސައްކަތް ކުރާ މެމްބަރުން އެކަން ކުރައްވަން އުޅެނީ ރައީސް އިބްރާހީމް މުހައްމަދު ޞާލިހުގެ ވިސްނުންފުޅު ރަނގަޅަށް އެނގިނުލައްވާތީ 'ޖަޒުބާތުގައި' ޖެހިގެން ކަމަށެވެ.
ވައްޑެ ވިދާޅުވީ ސޮއި ހަމަވެފައިވާނަމަ އިއްޔެ އެމްޑީޕީ ޕާލިމަންޓަރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި އެ މައްސަަލަ ހުށަނޭޅުއްވީ ކީއްވެތޯ ސުވާލު އުފައްދަވައިފައެވެ. އޭނާ ވިދާޅުވީ ރައީސް ނަޝީދަށް ކުރާ އިހްތިރާމެއްގެ ސަބަބުން އެމަނިކުފާނު އެ މަގާމުން ވަކިނުކުރަން ތިބި ކަމަށް ބުނުމަކީ ބޮޑު ޖޯކެއް ކަމަށެވެ.
"ރައީސް ނަޝީދު މަރައިލަން މަޖީދީ މަގުން ބޮން ގޮއްވައިލީމާ ރައީސް ނަޝީދަށް ނުކުރި ގަދަރެއް ނުކުރި ރަހުމެއް އޯގާތެރި ކަމެއް ނެތް ބަޔަކު ކުރާ އިހްތިރާމަކުން ވަކިނުކުރަން ބުނީމާ ހަމަޖެހޭ ވާހަކައެއް ނޫން އެއީ،" ވައްޑެ ވިދާޅުވިއެވެ.
ވައްޑެ ވިދާޅުވީ ރައީސް ނަޝީދުގެ ސަބަބުން މަޖިލިސް ކުރިއަށް ގެންދިއުމަށް ހުރަސް އެޅޭ ކަމަށް ބުނެ ދައްކާ ވާހަކައަކީ ހަގީގަތާ ޚިލާފު ވާހަކަތަކެއް ކަމަށެވެ.
މަޖިލީހުގެ ފުރިހަމަ ކޮންޓްރޯލް ސަރުކާރަށް އޮތް ކަމަށް ބުނާއިރު މަޖިލިސް ހިންގަން ރައީސް ނަޝީދު ހުރަސް އަޅުއްވައި ކަމަށް ބުނާ ވާހަކަ ދިމާނުވާ ކަމަށް ވެސް ވައްޑެ ވިދާޅުވިއެވެ. އެގޮތުން މަޖިލީހުގެ ކޮމިޓީތަކުގެ މުގައްރިރުންނަކީ ވެސް ސަރުކާރު މެމްބަރުންކަން އޭނާ ފާހަގަކުރެއްވިއެވެ.
"މި ކޮމިޓީތަކަކީ ހަގީގަތަށް ދަންނަވަންޏާމުން ސަރުކާރުގެ ފުލް ކޮންޓްރޯލް އޮވެގެން ހިނގަމުންދާ ކޮމިޓީތަކެއް. އެންމެނަށް ސާފުވާނެ އެ ކަން. އެހެންވީމާ އެ ކޮމިޓީތަކުގައި މަޑުޖެހިފައި ހުރި މަސައްކަތްތައް..،" ވައްޑެ ވިދާޅުވިއެވެ.
ރައީސް ނަޝީދު މަގާމުން ވަކިކުރުމަށް ރައްޔިތުންގެ މަޖިލީހުގެ 54 މެމްބަރުންގެ ސޮއި ހަމަކޮށްފައި ވާކަމަށް މައުލޫމާތު ލިބިއެވެ. އެ މައްސަލަ މިއަދު މަޖިލީހަށް ހުށަަހަޅާނެ ކަމަށް ވެސް މައުލޫމާތު ލިބެއެވެ.
މަޖިލިސް ރައީސްކަމުން ނަޝީދު ދުރުކުރަން އެމްޑީޕީ ޕީޖީ ގްރޫޕުން ނިންމީ މަޖިލީހުގެ މަސައްކަތް ކުރިއަށް ގެންދިއުމަށް އެމަނިކުފާނު ހުރަސް އަޅުއްވައި ކަމަށް ތުހުމަތުކުރަމުންނެވެ.