އަލަށް ފަށާ ވިޔަފާރިތަކަށް އެހީވާން ބީއެމްއެލްއިން ފެށި "ސްޓާޓްއަޕް ގްރާންޓް" ލިބުނު ނިރިސް އެމްބްރޮއިޑަރީގެ އައުޓްލެޓެއް މާލޭގައި ހުޅުވައިފިއެވެ.
ނިރިސް އެމްބްރޮއިޑަރީއަކީ ދެމަފިރިން ކަމުގައިވާ އައިޝަތު ޝައްމަ އާއި މުހައްމަދު ނަޒްލީގެ ވިޔަފާރިއެކެވެ.
މިއީ ކަސްޓަމް އެމްބްރޮއިޑަރީގެ މަސައްކަތް ކުރާ ނިރިސް އެމްބްރޮއިޑަރީގެ ފުރަތަމަ އައުޓްލެޓެވެ. ޑިޖިޓައިޒްޑް އާޓް އެމްބްރޮއިޑް ކުރާ ދެ މެޝިނާ އެކު ހުޅުވި މި އައުޓްލެޓުން އެމްބްރޮއިޑަރީގެ ގިނަ މަސައްކަތްތަކެއް ކުރެވެއެވެ.
ނިރިސް އެމްބްރޮއިޑަރަކީ ބީއެމްއެލްގެ ސްޓާޓްއަޕް ގްރާންޓު މިދިޔަ އަހަރު ލިބުނު ހަތަރު ވިޔަފާރީގެ ތެރެއިން ހުޅުވި ފުރަތަމަ ވިޔަފާރިއެވެ. ބީއެމްއެލްއިން ބުނީ ދެން ހުރި ވިޔަފާރިތައް ހުރީ ވެސް ހުޅުވުމުގެ މަގުމަތީގައި ކަމަށެވެ.
ބީއެމްއެލްއިން ވަނީ މި އަހަރު ވެސް ސްޓާޓްއަޕް ގްރާންޓަށް ހުށަހަޅަން ހުޅުވާލައި، ދެ ވިޔަފާރިއަކަށް 500،000ރ. ގެ ފައިސާގެ އެހީ ދޭން ނިންމާފައެވެ. ސްޓާޓްއަޕް ގްރާންޓަށް އެދި ހުށަހެޅުމުގެ އެންމެ ފަހު ތާރީހަކީ ޖުލައި މަހުގެ ދެވަނަ ދުވަހެވެ.