ސަން ސިޔާމް ރިސޯޓްސްގެ 33ވަނަ އަހަރީ ދުވަހާ ގުޅިގެން މިދިޔަ މަހުގެ ދެވަނަ ދުވަހު ފެށި ލޭ ހަދިޔާ ކުރުމުގެ އިތުރު ކޭމްޕެއް މިއަދު ބާއްވައިފިއެވެ.
ލޭ ހަދިޔާ ކުރުމުގެ މި ކޭމްޕް ބާއްވާފައި ވަނީ ސަން ސިޔާމް އިރުވެލި ރިސޯޓުގައެވެ.
މި ކޭމްޕާ ގުޅިގެން 'ސަން' އާ ވާހަކަ ދައްކަވަމުން ސަން ސިޔާމް ހެޑް އޮފީހުގެ އެގްރިކަލްޗާ ޑިޕާޓްމަންޓުގެ މެނޭޖަރު އައްޒަ ހަމީދު ވިދާޅުވީ، މިއީ މިގޮތަށް ބޭއްވޭ ފަސްވަނަ ކޭމްޕު ކަމަށެވެ. އަދި، މި ކޭމްޕްގައި އިރުވެލި ރިސޯޓްގެ 80 އަށް ވުރެ ގިނަ މުވައްޒަފުން ބައިވެރިވެފައިވާ ކަމަށް އައްޒަ ވިދާޅުވިއެވެ.
މި ހަރަކާތުގެ އެންމެ ބޮޑު މަގުސަދަކީ ތެލެސީމިއާ ކުދިންނަށް އެހީތެރިކަން ފޯރު ކޮށްދިނުން ކަމަށް އޭނާ ވިދާޅުވިއެވެ.
ސަން ސިޔާމް ރިސޯޓްސްގެ 33ވަނަ އަހަރީ ދުވަހާ ގުޅިގެން މިދިޔަ މަހުގެ ދެވަނަ ދުވަހު ފެށި ލޭ ހަދިޔާ ކުރުމުގެ އިތުރު ކޭމްޕެއް ސަން ސިޔާމް އިރުވެލި ރިސޯޓުގައި -- ފޮޓޯ/ ސަން ސިޔާމް ރިސޯޓްސް
އެއް ދުވަހަށް ކުރިއަށްދާ މި ކޭމްޕްގައި މޯލްޑިވިއަން ބްލަޑް ސާވިސަސްގެ ޓީމަކުން އައިސް ހަރަކާތްތެރިވާއިރު އޭގެ ތެރޭގައި ޑޮކްޓަރަކު ވެސް ހިމެނޭ ކަމަށް އައްޒަ ވިދާޅުވިއެވެ.
މީގެ އިތުރުން ލޭ ހަދިޔާ ކުރުމުގެ މި ކޭމްޕުގައި ރިސޯޓްގެ މެނޭޖްމަންޓާއި ހުރިހާ މުވައްޒަފުންގެ ފުރިހަމަ އެއްބާރުލުން ލިބިގެންދިޔަ ކަމަށް އޭނާ ވިދާޅުވިއެވެ.
މި އިވެންޓުގެ ދަށުން ސަން ސިޔާމް ހެޑް އޮފީހާއި ސަން ސިޔާމް އޮޅުވެލި މޯލްޑިވްސްގެ އިތުރުން ސިޔާމް ވޯލްޑުގައާއި އިރުފުށީގައި ވެސް ވަނީ ލޭ ހަދިޔާކުރުމުގެ ކޭމްޕު ބާއްވާފައެވެ.
އެގޮތުން މިހާތަނަށް 400 އަށް ވުރެ ގިނަ ސްޓާފުން ލޭ ހަދިޔާ ކޮށްފައިވާ ކަމަށް އައްޒަ ވިދާޅުވިއެވެ.
ސަން ސިޔާމް ރިސޯޓްސްގެ 33 ވަނަ އަހަރީ ދުވަހާއި ގުޅިގެން މިދިޔަ މަހުގެ ދެވަނަ ދުވަހު ފެށި ލޭ ހަދިޔާ ކުރުމުގެ އިތުރު ކޭމްޕެއް ސަން ސިޔާމް އިރުވެލި ރިސޯޓުގަ -- ފޮޓޯ/ ސަން ސިޔާމް ރިސޯޓްސް
މި އިވެންޓު ފުރަަތަމަ ފެށީ ސަން ސިޔާމް ރިސޯޓްސްގެ އަހަރީ ދުވަހާ ދިމާކޮށް ރިސޯޓުތަކުގައި 2015ވަނަ އަހަރެވެ. ކޮންމެ އަހަރަކު ވެސް ކޮންމެ ވެސް އެއް ރިސޯޓެއްގައި މި ހަރަކާތް ވަނީ ކުރިއަށް ގެންގޮސްފައެވެ. ނަމަަވެސް ކޮވިޑާ ގުޅިގެން އައި މަޑުޖެހުމަކަށް ފަހު މިހާރު މި އިވެންޓު ކުރިއަށް ގެންދަނީ އޭރަށް ވުރެ ފުޅާކޮށެވެ.
މި އިވެންޓުގެ ދަށުން އެކި ދުވަސްތަކަށް ބަހާލައިގެން ޖޫން މަހުގެ ނުވަވަނަ ދުވަހާ ހަމައަށް އެކި ރިސޯޓްތަކުގައި ލޭ ހަދިޔާކުރުން ކުރިއަށް ދާނެއެވެ. އެކި ރިސޯޓުތަކުގައި ކޭމްޕު ބާއްވާނީ އެކި ދުވަހުއެވެ.