ހުޅުމާލޭގައި ގޭޭންގަކުން ފުލުހަކަށް ހަމަލާދިން މައްސަލައިގައި ހައްޔަރުކުރި އެންމެންނަށް ބަންދުގެ މުއްދަތު މިއަދު ޖަހައިފިއެވެ.
އެ މައްސަލައާ ގުޅިގެން ހަތަރު މީހަކު ވަނީ ހައްޔަރުކޮށްފައެވެ.
އޭގެ ތެރެއިން އުމުރުން 21 އަހަރުގެ ޒުވާނާއަށް ކްރިމިނަލް ކޯޓުން ޖަހައިފައިވަނީ 15 ދުވަހުގެ ބަންދުގެ މުއްދަތެކެވެ. 33 އަހަރުގެ މީހާއަށް ޖެހީ ފަސް ދުވަހެވެ. އަދި 44 އަހަރާއި 42 އަހަރުގެ ދެ މީހުންގެ ބަންދަށް ޖެހީ ހަތް ދުވަހެވެ.
މި ހާދިސާގައި ފުލުސް މީހާއަށް މާ ބޮޑެތި އަނިޔާތަކެއް ނުލިބުނު ނަމަވެސް ހޮސްޕިޓަލުގައި ފަރުވާދީފައިވެއެވެ.
ފުލުސް މީހާއަށް ދިން ހަމަލާއާ ގުޅިގެން ކޮމިޝަނާ އޮފް ޕޮލިސް މުހައްމަދު ހަމީދު ރޭ ކުރެއްވި ޓްވީޓެއްގައި، އަނިޔާ ލިބެމުން ދިޔަ ފުލުސް މީހާ ސަލާމަތްކުރުމަށް އެ ހާދިސާ ހިނގި ވަގުތު އެ ތަނުގައި ހުރި ގަލޮޅު ޕޮލިސް ސްޓޭޝަނުގެ ފުލުހަކު އަމަލުކުރި ގޮތަށް ތައުރީފްކުރައްވައިފައިވެއެެވެ.
ރާއްޖޭގައި ގޭންގުތަކުގެ ނުރައްކާތެރިކަން ދުވަހެއް ދުވަހަކަށް އަންނަނީ ބޮޑުވަމުންނެވެ. ގޭންގު ހަމަނުޖެހުންތަކުގައި މީގެކުރިން އެތައް ބަޔަކު މަރާލާފައިވާއިރު، މި އަހަރު ވެސް ގޭންގު މާރާމާރީއެއްގައި އަނިޔާ ލިބުނު ޒުވާނަކު ވަނީ މަރުވެފައެވެ.