އެމްޑީޕީގެ ރައީސް މުހައްމަދު ނަޝީދު އިސްވެ ހުންނަވާ އުފައްދަވާ އާ ސިޔާސީ ޕާޓީއަށް ކިޔާނެ ނަމެއް ހުށަހަޅަން އެދިއްޖެއެެވެ.
މިދިޔަ އެމްޑީޕީގެ ރިޔާސީ ޕްރައިމަރީއަށް ފަހުގައި އެ މަނިކުފާނު ގެންދަވަނީ އެމްޑީޕީ ތެރޭގައި "ފިކުރެއްގެ ދިރުން" ނަމުގައި ވަކި ހަރަކާތެއް ހިންގަވަމުންނެވެ. ސަރުކާރާ މެދު އުފެދުނު ހިތްހަމަނުޖެހުންތަކަށް ފަހުގައި އެ ފެކްޝަންގެ ހުރިހާ ރައްޔިތުންގެ މަޖިލީހުގެ މެންބަރުން ވަނީ އިސްތިއުފާ ދެއްވައިފައެވެ.
ފިކުރެއްގެ ދިރުމަށް ތާއީދު ކުރައްވާ 13 މަޖިލިސް މެންބަރަކު މިދިޔަ ހަފުތާގައި އެމްޑީޕީން ވަނީ ވަކިވެފައެވެ. އަދި ބުދަ ދުވަހު ވަނީ އާ ޕާޓީއެއް އުފައްދާނެކަން އިއުލާން ކޮށްފައެވެ.
މަޖިލީހުގެ ނައިބު ރައީސް އަދި ފިކުރެއްގެ ދިރުމުގެ ހަރަކާތްތަކުގައި އެންމެ އިސްކޮށް އުޅުއްވާ އެއް ބޭފުޅެއްކަމަށްވާ އީވާ އަބްދުﷲ ވިދާޅުވީ އެމްޑީޕީއާ އެ ބޭފުޅުން އަމިއްލަފުޅަށް ވަކިވެވަޑައިގެން ސަަބަބު އެ ބޭފުޅުންނަށް އެނގިވަޑައިގަންނަވާ ކަމަށެވެ. އަދި އެމްޑީޕީން ވަކިވީ އައު ޕާޓީއެއް އުފައްދަން ކަމަށާއި އައު ޕާޓީއަކުން އެ ބޭފުޅުން ބޭނުންވާ އަސާސްތައް ވެސް އެނގިވަޑައިގަންނަވާ ކަމަށް އީވާ ވިދާޅުވިއެވެ.
"ކުރިއަށް އޮތް ރިޔާސީ އިންތިޚާބުގައި އެތައް ބަޔަކު ރާއްޖޭގެ ސިޔާސަތުތަކާއި ކުރިމަގު ބައްޓަންކުރަން އެބަ ބޭނުންވޭ. އެހެންވީމަ ވީ ވަރަކުން އެ މީހުން ދެކެން ބޭނުންވާ ތަސައްވަރެއް ޕާޓީއާމެދު ބަލަން ބޭނުންވޭ،" އީވާ ވިދާޅުވިއެވެ.
އީވާ ވިދާޅުވީ އެމްޑީޕީއާއި ރާއްޖޭގެ އެހެން ސިޔާސީ ޕާޓީތަކުން ވެސް ޒުވާނުންނަށް ވީ ވައުދުތަކާ ވަރަށް ދުރަށް ދެވިއްޖެ ކަމަށާއި އާ ޕާޓީ އުފެއްދުމުގެ ކުރިން ޒުވާނުންގެ ޚިޔާލު ހޯދަން ބޭނުންވާ ކަމަށެވެ.
"އަޅުގަނޑުމެން އަލަށް އުފައްދާ ޕާޓީއާ ދޭތެރޭ ކޮބާތޯ އެ މީހުން [ޒުވާނުންގެ] ތަސައްވަރަކީ އަޅުގަނޑުމެން ބަލަން ބޭނުންވަނީ،" އީވާ ވިދާޅުވިއެވެ.
"ފުރަތަމަ ސްޓެޕަކީ ޕާޓީގެ ނަމާއި ލޯގޯއާއި ސިފަ. އެ ހިސާބުން ފެށިގެން އަޅުގަނޑުމެން ބޭނުން މީހުންގެ ބައިވެރިވުން މި ކަމުގައި،" އޭނާ ވިދާޅުވިއެވެ.
ފިކުރެއްގެ ދިރުމުގެ ފަރާތުން ހެދުމަށް ގަސްތުކުރާ ޕާޓީއަށް ނަން ހުށަހެޅުމުގެ ފުރުސަތު ވަނީ ހުކުރު ދުވަހު ހެނދުނު 06:00ގެ ނިޔަލަށް ހުޅުވާލައިފައެވެ. ޕާޓީ އަށް ކިޔާނެ ނަމަކާއި، ނަމުގެ ތަފްސީލު ކުލަ އަދި ލޯގޯ އޮންލައިންކޮށް ހުށަހެޅުމުގެ ފުރުސަތު ވަނީ ހުޅުވައިލައިފައެވެ.