ހޭންޑްބޯޅައިން ހޯދި ފުރަތަމަ މެޑަލްއާއެކު ރާއްޖޭގެ ޒުވާން ދެ ޓީމު އެނބުރި ރާއްޖެ އަތުވެއްޖެއެވެ.
ބަންގުލަދޭޝްގެ ޑާކާގައި ކުރިއަށްގެންދިޔަ އައިއެޗްއެފް ޓްރޮފީގެ ޒޯން ދޭއްގައި ރާއްޖޭގެ 17 އަހަރުން ދަށުގެ ގައުމީ އަންހެން ޓީމާއި 19 އަހަރުން ދަށުގެ ގައުމީ އަންހެން ޓީމު ވެސް ވަނީ ލޯ މެޑެލް ހޯދައިފައެވެ. އެ ދެ ޓީމު ރާއްޖެ އައިސްފައިވަނީ މިއަދު މެންދުރުގެ ވަގުތެއްގައެވެ.
މިދިޔަ އާދީއްތަ ދުވަހުން ފެށިގެން ފަސް ދުވަހުގެ މުއްދަތަކަށް ކުރިއަށްގެންދިޔަ އެ މުބާރާތުގައި ރާއްޖޭގެ ދެ ޓީމުން ވެސް ލޯ މެޑަލް ހޯދީ ތިންވަނަ ހޮވުމަށް ކުޅުނު މެޗުގައި ނޭޕާލް ބަލިކޮށްގެންނެވެ.
އައިއެޗްއެފް ޓްރޮފީގެ ޒޯން ދޭއްގައި ލޯ މެޑަލް ހޯދި ރާއްޖޭގެ 17 އަހަރުން ދަށުގެ ގައުމީ އަންހެން ޓީމާއި 19 އަހަރުން ދަށުގެ ގައުމީ އަންހެން ޓީމު ރާއްޖެ އައުން -- ފޮޓޯ/ ޔޫތު މިނިސްޓްރީ
ރާއްޖެއިން ވަނީ މުބާރާތުގައި ވަރުގަދަ ކުޅުމެއް ދައްކަމުންދާ ބަންގުލަދޭޝް އާއި އިންޑިއާއާ ދެކޮޅަށް ވެސް ނުކުމެފައެވެ. ނަމަވެސް އެޓީމުތަކާ ދެކޮޅަށް ކުޅުނު މެޗުތަކުން ވަނީ ބަލިވެފައެވެ. ތިންވަނަ ހޮވުމަށް ކުޅުނު މެޗުގެ ކުރިން ނޭޕާލްއާ ދެކޮޅަށް ރާއްޖޭގެ ޓީމުތައް ކުޅުނު މެޗުތަކުން ވަނީ މޮޅުވެފައެވެ.
އައިއެޗްއެފް ޓްރޮފީ އޭޝިއާގެ ސައުތު ސެންޓްރަލް އޭޝިއާ ޒޯންގެ ޔޫތު އެންޑް ޖޫނިއާ މުބާރާތަކީ އަންހެނުންގެ އައިއެޗްއެފް ޓްރޮފީ އޭޝިއާގެ ކޮލިފިކޭޝަން މުބާރާތެކެވެ.