ޕާޓީން އިސް މެމްބަރުންތަކެއް ވަކިވި ކަމުގައިވީ ނަމަވެސް އޭގެ ސަބަބުން ޕާޓީގެ މެމްބާޝިޕުގެ އަދަދުތަކަށް މާ ބޮޑު ބަދަލެއް ނާންނާނެކަމަށާއި އެއްބުރުން ރިޔާސީ އިންތިޚާބު ކާމިޔާބުކުރެވޭނެ ކަމުގެ ފުރިހަމަ ޔަގީންކަން އަދިވެސް އެބައޮތްކަމަށް އެމްޑީޕީގެ ޗެއާޕާސަން ފައްޔާޒު އިސްމާއީލް މިއަދު ވިދާޅުވެއްޖެއެވެ.
އެމްޑީޕީގެ ރައީސް މުހައްމަދު ނަޝީދު ފިޔަވައި، އެ މަނިކުފާނުގެ ފިކުރެއްގެ ދިރުމަށް ތާއީދުކުރައްވާ ހުރިހާ މެމްބަރުންވަނީ އެ ޕާޓީން އިސްތިއުފާ ދެއްވައިފައެވެ.
އެ ކަމާ ގުޅިގެން އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަަކަދައްކަވަމުން ފައްޔާޒު ވިދާޅުވީ އިސްތިއުފާ ދެއްވި ކޮންމެ މެމްބަރެއްގެ ފަހަތުގައި ވެސް އެތައް އާންމު މެމްބަރުންތަކެއް ޕާޓީއަށްކުރާ ތާއީދު އޮންނާނެކަމަށެވެ.
18 މެއި 2023: އެމްޑީޕީން ބޭއްވި ނޫސްވެރިންގެ ބައްދަލުވުމުގައި ޕާޓީގެ އިސް މެމްބަރުން -- ސަން ފޮޓޯ/ މުހައްމަދު ޝާތިއު
އެ މެމްބަރުންނާއެކު އޭގެން ބައެއް އާންމު މެމްބަރުން ޕާޓީން ވަކިވާނެކަމަށް ވެސް ފައްޔާޒު ވިދާޅުވިއެވެ.
ނަމަވެސް ޕާޓީ އެއްބައިވަންތަކަމާއެކު އެކުގައި ކުރިއަށް ގެންދިއުމަށް ޓަކައި ޕާޓީގެ ސިޔާސަތާ ދެކޮޅު މެމްބަރުންނާމެދު ފިޔަވަޅު ނޭޅުމަށް މަސައްކަތްކުރަމުން އައި ކަމަށް އޭނާ ވިދާޅުވިއެވެ.
"މިއަދު ވެސް އަޅުގަނޑުމެންނެއް ނޫން ވަކިވެގެން މި ދިޔައީ. އެ ބޭފުޅުން ވަކިވެގެން އެ ދިޔައީ. އެ ބޭފުޅުން ވަކިނުވިނަމަ އަޅުގަނޑުމެންނެއް އެ ބޭފުޅުންނާ ދޭތެރޭ ޕާޓީން ވަކިކޮށް މި ދެންނެވި ކަހަލަ ކަންތައްތަކެއް ނުކުރާނަން މި ދެންނެވި ކަހަލަ ހާލަތެއް އައިސްގެން މެނުވީ،" ފައްޔާޒު ވިދާޅުވިއެވެ.
އޭނާ ވިދާޅުވީ އަދި ޕާޓީން މާ ގިނަ މެމްބަރުންތަކެއް ވަކިވެފައި ނުވާކަމަށެވެ.
"އެހެން ނަމަވެސް އަޅުގަނޑު ގަބޫލުކުރާ ގޮތުގަައި ހަމަ ރަނގަޅު އަދަދަކަށް ވަކިވާނެ،" އޭނާ ވިދާޅުވިއެވެ.
ފައްޔާޒު ވިދާޅުވީ މިހާރު ކުރަމުން އަންނަ މަސައްކަތާއެކު ވަކިވާ މެމްބަރުންގެ އަދަދަށްވުރެ އިތުރަށް ޕާޓީއާ މެމްބަރުން ގުޅޭނެކަމަށެވެ.
"އިރާދަފުޅުކުރެއްވިއްޔާ އަޅުގަނޑުމެންގެ މިހާރު ވެސް ކުރަމުންމިދާ މަސައްކަތުން އިތުރު ބައިވަރު މެންބަރުންތަކެއް ވައްދަމުން މިދަނީ އެހެންވީމަ ނަމްބަރަކަށް ވެސް މާ ބޮޑު ބަދަލެއް ނާންނާނެ އަދި ވަކިވެގެން ދާ ނަމްބަރަށް ވުރެ އިތުރު ނަމްބަރެއް އިރާދަފުޅުކުރެއްވިއްޔާ އަޅުގަނޑުމެންނަށް ހޯދެމުން މިދަނީ،" ފައްޔާޒު ވިދާޅުވިއެވެ.
އިތުރަށް ވާހަކަދައްކަވަމުން ފައްޔާޒު ވިދާޅުވީ އެއްބުރުން ރިޔާސީ އިންތިޚާބެއް ކާމިޔާބުކުރުމުގެ ފުރުސަތު ހަނި ނަމަވެސް އެ ފުރުސަތު އެމްޑީޕީއަށް ބޮޑުކަމަށެވެ.
އަދި އެއްބުރުން އިންތިޚާބު ކާމިޔާބުކުރެވޭނެކަމުގެ ފުރިހަމަ ޔަގީންކަން ވެސް އޮތްކަމަށެވެ. އަދި މާ ކުރިން ވެސް އެ ކަމުގެ ހިސާބުތައް ޖަހައި އެ ކަން ޔަގީންކޮށްފައިވާކަމަށެވެ.
"އިންތިޚާބު އިރާދަފުޅުކުރެއްވިޔާމުން ހަމަ ވަރަށް ސާފުކޮށް މި ދަންނަވަނީ، ﷲގެ އިރާދަފުޅާއެކު އެއްބުރުން އަޅުގަނޑުމެން ކާމިޔާބުކުރާނަން. އަޅުގަނޑުމެންނަށް އެ ކޮންފިޑެންސް ހަމަ ބޮޑުކޮށް އެބައޮތް،" ފައްޔާޒު ވިދާޅުވިއެވެ.
އެހެންނަމަވެސް އަދިވެސް ވަކިވި މެމްބަރުން އަލުން ގުޅިއްޖެނަމަ ތާއީދު އިތުރުވާނެކަމަށް ގަބޫލުކުރައްވާކަމަށް އޭނާ ވިދާޅުވިއެވެ.