ވެރިކަން ކުރާ މައި ޕާޓީ އެމްޑީޕީގެ ތެރޭ، ޕާޓީގައި ތިބެ ވަކިން މަސައްކަތްކުރާ ފިކުރެއްގެ ދިރުމުގެ މެމްބަރުން ޗާގޯސް މައްސަލައިގައި އެ ޕާޓީގެ ރަސްމީ ނިންމުމާ ޚިލާފަށް ވަޒީރުންގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ވައްދަން ސޮއިކުރިކަން ޔަގީންވާ ހިސާބުން އެ މެމްބަރުންނާ މެދު ފިޔަވަޅު އަޅާނެކަމަށް އެ ޕާޓީގެ ޑެޕިއުޓީ ޗެއާޕާސަން އިބްރާހީމް ވަހީދު (އިބްރޭ) މިއަދު ވިދާޅުވެއްޖެއެވެ.
އެމްޑީޕީގެ ރައީސް މުހައްމަދު ނަޝީދު އިސްވެ ކުރިއަށް ގެންދަވާ ފިކުރެއްގެ ދިރުމުގެ މެމްބަރުން އަންނަނީ ސަރުކާރާ ދެކޮޅަށް، އެހެން ސިޔާސީ ޕާޓީތަކާ ގުޅިގެން މަސައްކަތްކުރަމުންނެވެ.
އަދި މި މައްސަލައިގައި ސަރުކާރުގެ ފަރާތުން ވަކާލާތުކުރި އިސް ވަޒީރުންގެ އިތުބާރު ނެތްކަމުގެ މައްސަލަ މަޖިލިސް ހުޅުވުމާއެކު ވެއްދުމަށް ވެސް އަންނަނީ މަސައްކަތްކުރަމުންނެވެ.
މި ކަމާ ގުޅިގެން ރޭ ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ކުރީގެ ޕީޖީ ލީޑަރު އަލީ އާޒިމް ވަނީ އެ މައްސަލައިގައި ޕާޓީން ވަކިކުރިއަސް އެއްވެސް ފަރުވާލެއް ނެތްކަމަށް ވިދާޅުވެފައެވެ.
މި ކަމާ ގުޅިގެން މިއަދު "ސަން"އާ ވާހަކަދައްކަވަމުން އިބްރޭ ވިދާޅުވީ އެމްޑީޕީގެ ރަސްމީ ނިންމުން ހާމަކޮށްފައިވާކަމަށެވެ. އެގޮތުން މަޖިލީހަށް ވައްދާ އިތުބާރު ނެތްކަމުގެ މައްސަލައާ ދެކޮޅަށް ވޯޓު ދިނުމަށް ތްރީލައިން ވިޕެއް ނެރެ އެއަށް އަމަލުކުރުމަކީ ޕާޓީގެ ރަސްމީ ނިންމުންކަމަށް އޭނާ ވިދާޅުވިއެވެ.
އޭނާ ވިދާޅުވީ ފިޔަވަޅު އެޅުމަށް ވަކި މަރުހަލާތަކެއް ފުރިހަމަކުރަން ޖެހޭކަމަށެވެ. އެ ކަން ލަސްވަނީ އެ ސަބަބާ ހުރެކަމަށް އިބުރޭ ވިދާޅުވިއެވެ.
"ހަމަ ކުއްލިކުއްލިއަކަށް ނިންމާ ނުލެވޭނެ އިނގޭތޯ. އަޅުގަނޑަށް ހީވަނީ މާ ލަހެއް ނުވާނެހެން،" އޭނާ ވިދާޅުވިއެވެ.
އިބުރޭ ވިދާޅުވީ މިހާރު ދެކެވޭ ވާހަކަތަކުން އަދި އެނގެނީ މައްސަލައެއް ވެއްދިކަން ކަމަށެވެ. އޭގައި އެމްޑީޕީގެ މެމްބަރަކު ސޮއިކުރިކަން ޔަގީންނުވާކަމަށް ވެސް އޭނާ ވިދާޅުވިއެވެ.
"ސޮއިކޮށްފައި އޮވެގެން އަޅުގަނޑުމެންނަށް ކަމެއް ކުރެވޭނީ. ފިޔަވަޅު އަޅާނަން ސޮއިކޮށްފައި އޮވެގެން. މަޖިލީހަށް ލާންވެގެން ސޮއި ހަމަކުރަން ސޮއިކޮށްފައި އޮތްކަން އެނގޭ ހިސާބުން ފިޔަވަޅު އަޅާނަން،" އޭނާ ވިދާޅުވިއެވެ.
އާޒިމްގެ ވާހަކަތަކާ ގުޅިގެން އިބްރޭ ވިދާޅުވީ އެ ކަމަށް ޕާޓީގެ ރަސްމީ އުސޫލުތަކުން ޖަވާބު ދެއްވާނެކަމަށެވެ.
"އެއަށް އަޅުގަނޑުމެން ދެން ޖަވާބު ދޭނީ ޕާޓީގެ ރަސްމީ އުސޫލުގެ ތެރެއިން. ޕާޓީގެ އަސާސީ ގަވައިދުގެ 20ވަނަ މާއްދާއާއި 21ވަނަ މާއްދާގެ ދަށުން އެ ކަން ކުރެވޭނީ،" އޭނާ ވިދާޅުވިއެވެ.
އިމުގެ މައްސަލައިގައި ސަރުކާރު ގޯސްކޮށް، އިދިކޮޅު އިއްތިހާދުން ވަނީ ބަންޑާރަ ނައިބު އިބްރާހިމް ރިއްފަތުގެ އިތުބާރު ނެތް ކަމުގެ މައްސަލައެއް ވެސް ވައްދައިފައެވެ. އިތުރަށް ވެސް ކުރެވޭނެ ކަންކަމާ މެދު އެ ޕާޓީތަކުން އަންނަނީ މަޝްވަރާ ކުރަމުންނެވެ.