ސިއްހީ ދާއިރާގެ މުސާރަތަކަށް ގެނައި ބަދަލަކީ، އެ ދާއިރާއިން ކިޔެވުމަށް ލިބޭ އިތުރު ހިތްވަރަކަށް ވެގެންދާނެ ކަމުގައި ނައިބު ރައީސް ފައިސަލް ނަސީމް މިއަދު ވިދާޅުވެއްޖެއެވެ.
ނައިބު ރައީސް ފައިސަލް ނަސީމް ވަނީ ބަންގްލަދޭޝްގައި ތިބި ދިވެހި ކިޔަވާކުދިންނާއި ދިވެހި އާއިލާތަކާ މިއަދު ބައްދަލުކުރައްވާފައެވެ. މި ބައްދަލުކުރެއްވުން އޮތީ، ބަންގްލަދޭޝްގައި ހުންނަ ދިވެހި ރާއްޖޭގެ ހައިކޮމިޝަންގައެވެ.
މި ބައްދަލުކުރެއްވުމުގައި ނައިބު ރައީސް ވިދާޅުވީ، ސިއްހީ ދާއިރާގެ މުސާރައަށް ގެނައި ބަދަލުގެ އިތުރުން، އެ ދާއިރާގެ ތަރައްގީއަށް ކުރަން ޖެހޭ އެހެން ކަންތައްތައް ވެސް ސަރުކާރުން މިހާރު ދަނީ ކުރަމުން ކަމަށެވެ. އަދި ޓީޗަރުންނާއި ޑޮކްޓަރުންނަކީ، ގައުމަށާއި މުޖުތަމައަށް މުހިންމު ޚިދުމަތެއް ކޮށްދޭ ބައެއްގެ ގޮތުގައި ސަރުކާރުން ދެކޭ ކަމުގައި އެމަނިކުފާނު ވިދާޅުވިއެވެ.
ބަންގްލަދޭޝްގައި ތިބި ދިވެހި ދަރިވަރުންނާ ނައިބު ރައީސް ފައިސަލް ނަސީމް، ބައްދަލުކުރެއްވުމުގެ ތެރެއިން --- ފޮޓޯ/ ރައީސް އޮފީސް
އެގޮތުން ރާއްޖޭގެ ސިއްހީ ދާއިރާގައި މަސައްކަތްކުރާ ދިވެހިންގެ އަދަދު އިތުރުކުރުމުގެ މުހިންމުކަމުގެ މައްޗަށް ނައިބު ރައީސް ފައިސަލް ނަސީމް އަލިއަޅުއްވާލައްވައި، ވިދާޅުވީ، ގިނަ އަދަދެއްގެ ދިވެހި ދަރިވަރުން ޑޮކްޓަރުކަން ކިޔެވުމަށާއި، ހާއްސަ އެކި ދާއިރާތަކުން ސްޕެޝަލައިޒްވުމަށް ބަންގްލަދޭޝް ޚިޔާރުކުރާކަން ފާހަގަކުރެއްވޭ ކަމަށެވެ.
ހަމައެއާ އެކު، ބަންގްލަދޭޝް ސަރުކާރާއި ދިވެހި ސަރުކާރުގެ މެދުގައި އޮތް އެކުވެރި ގާތްގުޅުން ފާހަގަކުރައްވައި ނައިބު ރައީސް ވިދާޅުވީ، ދިވެހި ދަރިވަރުންނަށް ވިސާ ހޯދުމުގައި ދިމާވި ދަތިތަކަށް ވެސް މިހާރު ހައްލެއް ހޯދިފައިވާކަމަށެވެ.
ބަންގްލަދޭޝްގައި ތިބި ދިވެހި ދަރިވަރުންނާ ނައިބު ރައީސް ފައިސަލް ނަސީމް، ބައްދަލުކުރެއްވުމުގެ ތެރެއިން --- ފޮޓޯ/ ރައީސް އޮފީސް
މީގެ އިތުރުން އެމަނިކުފާނު ވިދާޅުވީ، ދުނިޔޭގެ ކޮންމެ ގައުމެއްގައި ދިވެހިން ދިރިއުޅުނު ނަމަވެސް އެ ފަރާތްތަކަށް ދޭންޖެހޭ ޚިދުމަތްތަކުގައި ސަރުކާރުން ތަފާތެއް ނުގެންގުޅޭނެ ކަމަށެވެ. އަދި ރާއްޖެއިން ބޭރުގައި ވަޒީފާ އަދާކުރާ ދިވެހިންނާއި ކިޔަވާ ކުދިންގެ ކަންކަން އަބަދުވެސް ޚާރިޖިއްޔާއިން ގާތުން ބައްލަވަމުން ގެންދަވާ ކަމަށް ފައިސަލް ވިދާޅުވިއެވެ.
ނައިބު ރައީސް ފައިސަލް ނަސީމް ބަންގްލަދޭޝްއަށް ވަޑައިގެންނެވީ، ހަ ވަނަ އިންޑިއަން އޯޝަން ކޮންފަރެންސްގައި ބައިވެރިވެ ވަޑައިގެންނެވުމަށް ކުރައްވާ ރަސްމީ ދަތުރުފުޅެއްގައެވެ.