ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ރާއްޖޭގެ ކުޑަކުދިންގެ ދުވަހާ ގުޅިގެން ޚާއްސަ ކުޑަކުދިންގެ ހަވީރެއް ބާއްވަން ނިންމައިފިއެވެ.
މިއަދު ހަވީރު އެސްޓީއޯ ޕީޕަލްސް ޗޮއިސް ގައި ބާއްވާ މި ކުޑަކުދިންގެ ހަވީރުގައި ރާއްޖޭގެ މަޝްހޫރު އަދި ކުޑަކުދިން އެންމެ ކަމުދާ ރޮބޮމޭންވެސް ބައިވެރިވާކަމަށް އެސްޓީއޯ އިން މައުލޫމާތު ދެއެވެ. މި އިވެންޓަށް ވަންނަ ކޮންމެ ކުއްޖަކަށް ވެސް ހަދިޔާއެއް ލިބޭނެ ކަމަށް އެސްޓީއޯއިން މައުލޫމާތު ދެއެވެ.
އެސްޓީއޯގެ ކުޑަކުދިން ހަވީރު
މި ހަރަކާތާ ގުޅިގެން އެސްޓީއޯގެ ކޯޕަރޭޓް ބްރޭންޑިން އޮފިސަރު ޔޫސުފް ޝާހު "ސަން" އަށް ވިދާޅުވީ މި ހަރަކާތަކީ އެސްޓީއޯ ޕީޕަލްސް ޗޮއިސްގެ ލީސިން ޕާޓްނަރުންނާ އެކު ކުރިއަށް ގެންދާ ހަރަކާތެއް ކަމަށެވެ.
މި އިވެންޓަށް ހާޒިރުވެގެން "ވިޒިޓް އެންޑް ވިން" ޕީކަބޫ ގެ ގިފްޓް ވައުޗާއެއް ވެސް 20 ކުދިންނަށް ލިބޭނެއެވެ. މީގެން ލިބޭ 300 ރުފިޔާގެ ވައުޗާ ޕީކަބޫގެ ކޮންމެ ފިހަރާޔަކުން ވެސް ބޭނުން ކުރެވޭނެއެވެ.
މި އިވެންޓުގައި އެސްޓީއޯ ޕީޕަލްސް ޗޮއިސްގެ ލީސިން ޕާޓްނަރުންގެ ފަރާތުން ހިލޭ ރަހަ ބެލުން، ހިލޭ ހަދިޔާ ދިނުން ފަދަ ތަފާތު ހަރަކާތްތައް ކުރިއަށްދާނެއެވެ. އަދި ހަމައެހެންމެ، މި އިވެންޓުން މިއަދަށް ޙާއްސަ ކޮށްގެން ޕޮއިސް އިން ކުޑަކުދިންގެ ސެންޓު ގަތުމުން ހިލޭ ގިފްޓެއް ވެސް ލިބޭނެއެވެ.
މީގެ އިތުރުން، އެސްޓީއޯއިން ކުޑަކުދިންގެ ދުވަހު ކުރިއަށް ގެންދިޔަ ކުރެހުމުގެ މުބާރާތާ ގުޅިގެން ޝާހު ވިދާޅުވީ އެ މުބާރާތަށް ވެސް ބޮޑު ތަރުހީބެއް ލިބުނުކަމަށެވެ. އަދި އެ މުބާރާތުގެ ނަތީޖާ ފާޅުކުރުން އޮންނަނީ މި އަންނަ ހޯމަ ދުވަހު ކަމަށް ވެސް އޭނާ ވިދާޅުވިއެވެ.
މި ހަރަކާތް ކުރިޔަށް ދާނީ މިއަދު ހަވީރު ހަތަރަކުން ހަޔަކަށެވެ.