ސައުތު އޭޝިއަން ފުޓްބޯލް ފެޑެރޭޝަން (ސާފް) ގެ ނައިބު ރައީސަކަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ނައިބު ރައީސަކަށް ވެސް ހުންނެވި އަލީ އުމަރު އިންތިހާބުކޮށްފިއެވެ.
ބަންގުލަދޭޝްގެ ޑާކާގެ އިންޓަކޮންޓިނެންޓަލް ހޮޓެލްގައި އިއްޔެ ކުރިއަށްގެންދިޔަ ސާފް އޯޑިނަރީ ކޮންގްރެސްގައި ސާފްގެ ނައިބު ރައީސްކަމުގެ މަގާމަށް ދެ ބޭފުޅަކު އިންތިހާބުކުރިއެވެ. އެއީ އަލީ އުމަރުގެ އިތުރުން އޯލް ނޭޕާލް ފުޓްބޯލް އެސޯސިއޭޝަންގެ ސުންދަރު ނަރްސިންހް ޖޯޝީއެވެ.
އަލީ އުމަރާއި ޖޯޝީގެ ދައުރު ނިމުމަކަށް އަންނާނީ 2027 ވަނަ އަހަރުއެވެ. ސާފްގެ ނައިބު ރައީސުންގެ މަގާމުތައް ހުސްވެފައިވަނީ މިދިޔަ އަހަރުގެ ޖުލައި މަހުގެ ތެރޭގައެވެ.
ނައިބު ރައީސުންގެ އިތުރުން އިތުރުން ސާފްގެ ރެޕްރެޒެންޓޭޓިވްގެ މަގާމަށް ވެސް ބޭފުޅަކު އިންތިހާބުކުރިއެވެ. އެ މަގާމަށް އިއްޔެ އިންތިހާބުކޮށްފައިވަނީ އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް) ގެ ޖެނެރަލް ސެކްރެޓަރީ ޑރ. ޝާޖީ ޕްރަބާކަރަންއެވެ.
ސާފްގެ ހިންގާ ކޮމިޓީން ވަނީ ކުރިއަށްއޮތް ސާފް ޗެމްޕިއަންޝިޕާ ގުޅޭގޮތުން ވެސް މަޝްވަރާތަކެއް ކޮށްފައެވެ. އިންޑިއާގެ ބެންގަލޫރުގައި ބާއްވާ 14 ވަނަ ސާފް ޗެމްޕިއަންޝިޕް ކުރިއަށްގެންދިއުމަށް ނިންމާފައިވަނީ އަންނަ މަހުގެ 21 އިން ޖުލައި މަހުގެ ހަތަރުވަނަ ދުވަހުގެ ނިޔަލަށެވެ.
ސާފްގެ ހިންގާ ކޮމިޓީން ވަނީ ސާފް ޗެމްޕިއަންޝިޕްގައި އިތުރު ޓީމެއް ބައިވެރިވޭތޯ ބެލުމަށް މިމަހުގެ ފަސްވަނަ ދުވަހުގެ ނިޔަލަށް ފުރުސަތު އިތުރުކޮށްފައެވެ. ދެކުނު އޭޝިއާގެ ސަރަހައްދުގެ ޓީމުތަކުގެ އިތުރުން އެހެން ސަރަހައްދުތަކުގެ ޓީމުތަކަށް ވެސް ދައުވަތު ދީގެން ބާއްވާ އެ މުބާރާތުގައި މިހާތަނަށް ހަތް ޓީމަކުން ވަނީ ބައިވެރިވެފައެވެ. އެއީ ރާއްޖެ، އިންޑިއާ، ބަންގުލަދޭޟް، ބޫޓާން، ނޭޕާލް، ޕާކިސްތާނުގެ އަދި ކެވެއިތެވެ.
އެންމެ ފަހުން ސާފް ޗެމްޕިއަންޝިޕް ބާއްވާފައިވަނީ 2021 ވަނަ އަހަރު ރާއްޖޭގައެވެ. ފައިނަލުގައި ނޭޕާލް ބަލިކޮށް، އެފަހަރުގެ މުބާރާތުގެ ޗެމްޕިއަންކަން ހޯދީ އިންޑިއާ އިންނެވެ. މިހާތަނަށް އެންމެ ކާމިޔާބު ޓީމުގެ ގޮތުގައި ފާހަގަކޮށްލެވޭ އިންޑިއާ އިން ވަނީ ޖުމުލަ އަށް ފަހަރަކު ސާފްގެ ޗެމްޕިއަންކަން ހޯދައިފައެވެ.