އިނގިރޭސިވިލާތުގެ ރަސްގެފާނު ޗާލްސް ތިނެއް، ދެއްވި ރަސްމީ ޖާފަތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ބައިވެރިވެވަޑައިގެންފިއެވެ.
ރަސްގެފާނު ޗާލްސް ތިނެއް ރަސްމީގޮތުން ރަސްކަމާ ހަވާލުވުމަށް ބާއްވާ ރަސްމިއްޔާތުގައި ބައިވެރިވެވަޑައިގަތުމަށް ރައީސް ޞާލިޙް މި ވަގުތު ހުންނެވީ އިނގިރޭސިވިލާތުގައެވެ.
އެކި ޤައުމުތަކުން ޒިޔާރާތްކުރެއްވި އިސްވެރިންގެ ޝަރަފުގައި ރަސްގެފާނު، ޗާލްސް ތިން ވަނަ އާއި ރާނީ ކެމީލާ، ދެއްވި ރަސްމީ ޖާފަތުގައި ރައީސް ޞާލިޙާއި ފަޒްނާ އަޙްމަދު ބައިވެރިވެވަޑައިގަންނަވާފައި ވަނީ ރޭގައެވެ.
ބަކިންހަމް ޕެލަސްގައި ކުރިއަށް ގެންދިޔަ އެ ޙަފުލާގައި ކޮމަންވެލްތުގެ ޤައުމުތަކުގެ އިސްވެރިން ވެސް ބައިވެރިވެވަޑައިގަންނަވާފައިވެއެވެ.
ރަސްގެފާނު ޗާލްސް ތިނެއް ރަސްމީގޮތުން ރަސްކަމާ ހަވާލުވުމަށް ބާއްވާ ރަސްމިއްޔާތު އޮންނާނީ މިއަދު ވެސްޓްމިންސްޓަރ އެބީގައެވެ.
ރައީސްގެ މި ދަތުރުފުޅުގައި، ކޮމަންވެލްތުގެ ލީޑަރުނާ، އިއްޒަތްތެރިންނަށް ބާއްވާ ޚާއްސަ އިވެންޓެއްގައި ވެސް ބައިވެރިވެވަޑައިގަތުމަށް ހަމަޖެހިފައިވާ ކަމަށް ރައީސް އޮފީހުން ވަނީ ބުނެފައެވެ.
އިނގިރޭސި ތަޚްތަށް ރަސްގެފާނު ޗާލްސް އިސްވެވަޑައިގެންފައި ވަނީ މަންމާފުޅު ރާނީ އެލިޒަބަތު އަވަހާރަވުމުންނެވެ. ރާނީ އެލިޒަބަތު ދެ ވަނަ އަވަހާރަވީ މިދިޔަ އަހަރުގެ ސެޕްޓެމްބަރު މަހުގައެވެ. އަވަހާރަވިއިރު އުމުރުފުޅަކީ 96 އަހަރެވެ.
ރާނީ އަވަހާރަވުމާ ގުޅިގެން ރައީސްގެ ދެކަނބަލުން ވަނީ ރާނީގެ ޖަނާޒާގައި ބައިވެރިވެވަޑައިގެން، ރާނީއަށް އެންމެފަހުގެ އިހްތިރާމް އަދާކުރައްވާފައެވެ.