އެމްޓީޑީސީން ބޮޑު ތިލަދުއްމަތީގައި ރިސޯޓެއްގެ ގޮތުގައި ތަރައްޤީކުރަމުންދާ ނާގޯށީގެ އަމަލީ އެއްވެސް މަސައްކަތެއް މިއަހަރުގެ މިހާތަނަށް ކުރިއަށް ގެންދެވިފައި ނުވާކަމަށް އެ ކުންފުނީގެ ފުރަތަމަ ކުއާޓަރުގެ މާލީބަޔާނުން ދައްކައިފިއެވެ.
ސަރުކާރާއި ރައްޔިތުން ހިއްސާވާ ކުންފުނި، އެމްޓީޑީސީން ނެރެފައިވާ މިއަހަރުގެ ފުރަތަމަ ކުއާޓަރުގެ މާލީބަޔާނުގައިވާގޮތުން މިދިޔަ ކުއާޓަރާއި ހިސާބަށް ނިމިފައިވަނީ ހދ ނާގޯށީގެ 40 އިންސައްތަ މަސައްކަތެވެ. މިއީ 2022 ވަނަ އަހަރުގެ އެންމެ ފަހު ކުއާޓަރުގައި ވެސް މަސައްކަތް ގޮސްފައިވާ ހިސާބެވެ.
އެމްޓީޑީސީން ނާގޯށި ތަރައްގީކުރުމަށް މަސައްކަތްކުރަމުން އަންނަތާ 15 އަހަރަށް ވުރެ ގިނަ ދުވަސްވެފައިވާއިރު، އެކުންފުނިން އެންމެ ފުރަތަމަ ނާގޯށި ތަރައްޤީކުރުމުގެ މަސައްކަތް ފަށާފައިވަނީ 2007 ވަނަ އަހަރެވެ. އެމްޓީޑީސީއަށް ނާގޯށި ތަރައްގީ ނުކުރެވިގެން މީގެ ކުރިން އެތައް ފަހަރަކު ސަރުކާރުން އެރަށް ނަގާފައިވެއެވެ. ސަރުކާރުން އެންމެ ފަހުން އެމްޓީޑީސީއަށް ނާގޯށި ދީފައިވަނީ 2020 ވަނަ އަހަރެވެ.
ހދ. ނާގޯށި ތަރައްގީކުރުމަށް އެމްޓީޑީސީއާ އަލުން ހަވާލުކުރުމުގެ ތެރެއިން -- ފޮޓޯ/ ޓޫރިޒަމް މިނިސްޓްރީ
އެމްޓީޑީސީގެ މިއަހަރުގެ ފުރަތަމަ ކުއާޓަރުގެ މާލީ ބަޔާނަށް ބަލާއިރު، މި މުއްދަތުގެ ތެރޭގައި ކުންފުންނަށް އާމްދަނީގެ ގޮތުގައި 28.6 މިލިއަން ރުފިޔާ ވަނީ ލިބިފައެވެ.
މި ކުއާޓަރުގައި ޓެކްސްއަށް ކެނޑުމުގެ ކުރިން އެކުންފުނީގެ ފައިދާ 11.8 މިލިއަން ރުފިޔާގައި އުޅޭއިރު، ޓެކްސްއަށް ކެނޑުމަށްފަހު ކުންފުނީގެ މިއަހަރުގެ ފުރަތަމަ ކުއާޓަރުގެ ސާފްފައިދާގެ ގޮތުގައި ލިބިފައިވަނީ 10.1 މިލިއަން ރުފިޔާއެވެ.
އެމްޓީޑީސީ ހިމެނިފައިވަނީ ސަރުކާރާއި ރައްޔިތުން ހިއްސާވާ ކުންފުނިތަކުގެ ތެރެއިން މާލީގޮތުން އެންމެ ދަށް ނަތީޖާ ހޯދި ކުންފުންޏަށެވެ.
އެމްޓީޑީސީގެ ބެލެންޝީޓަށް ބަލާއިރު، ކުންފުނީގެ ދިގު މުއްދަތުގެ ދަރަނި އަދިވެސް ވަރަށް ބޮޑެވެ. ތިންވަނަ ކުއާޓަރު ނިމުނުއިރު ރިސޯޓް ހެދުމަށް ނަގާފައިވާ ރަށްތަކުގެ ކުލީގެ ގޮތުގައި ދައްކަންޖެހޭ ދަރަނި 383.4 މިލިއަން ރުފިޔާއަށް އަރައެވެ. ދިގު މުއްދަތުގެ ދަރަނީގެ ގޮތުގައި ސަރުކާރަށް ދައްކަންޖެހޭ 188.5 މިލިއަން ރުފިޔާ އޮތްކަމަށް ބެލެންޝީޓުން ދައްކާއިރު، ސަރުކާރާއި އަމިއްލަ ފަރާތްތަކަށް ކުރުމުއްދަތުގެ ދަރަނީގެ ގޮތުގައި 112 މިލިއަނަށްވުރެ ގިނަ ރުފިޔާ ދައްކަންޖެހެއެވެ.
އެމްޓީޑީސީއަކީ ފަތުރުވެރިކަމުގެ މަންފާ ދިވެހި ރައްޔިތުންނަށް ސީދާ ގޮތެއްގައި ހޯދައިދިނުމުގެ ގޮތުން ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި 2006 ވަނަ އަހަރު އުފެއްދި ކުންފުންޏެކެވެ.
އެމްޓީޑީސީ ވުޖޫދަށް އައިތާ 16 އަހަރު ފާއިތުވެގެންދިޔައިރު، ސަރުކާރުން އެ ކުންފުނި އުފެއްދި ހަގީގީ މަގުސަދު ހާސިލްވަމުން ނުދާކަމުގެ ވާހަކަ ކޮންމެ އަހަރެއްގެ އަހަރީ އާއްމު ޖަލްސާގައި އާއްމު ހިއްސާދާރުން ފާހަގަކުރެއެވެ.