އެހެން މީހެއްގެ ހަޔާތަށް އުފާވެރިކަން ގެނެސްދިނުމަށް ޓަކައި ލޭ ހަދިޔާކުރުމަކީ ކޮންމެ މީހަކު ވެސް ކުރަން ވަރަށް މުހިންމުކަމެއް ކަމަށް ސަންސިޔާމް ގުރޫޕްގެ ޑިރެކްޓަރު ޑރ. އާއިޝަތު ރަފިއްޔާ މިއަދު ވިދާޅުވެއްޖެއެވެ.
ސަން ސިޔާމް ރިސޯޓްސްގެ 33ވަނަ އަހަރީ ދުވަހުގެ މުނާސަބަތުގައި އެ ކުންފުނީގެ މުވައްޒަފުން ލޭ ހަދިޔާކުރުމުގެ އިވެންޓެއް މިއަދު ވަނީ ފަށައިފައެވެ.
އެ އިވެންޓުގެ ތެރެއިން ލޭ ހަދިޔާކުރެއްވުމަށްފަހު ރަފިއްޔާ ވިދާޅުވީ ރާއްޖޭގައި 950އަށްވުރެ ގިނަ ތެލެސީމިއާ ކުދިން ރަޖިސްޓާ ކޮށްފައި އެބަތިބި ކަމަށާއި އެހެންކަމުން ލޭ ހަދިޔާކުރުމަކީ ވަރަށް މުހިންމު ކަމެއް ކަމަށެވެ.
"ލޭ ހަދިޔާކުރުމުން ބައިވަރު ސިއްހީ ބެނެފިޓްސްތަކެއް ވެސް ލިބޭކަމަށް ވެސްް ސިއްހީ މާހިރުން ވިދާޅުވޭ. ހުރިހާ ގޮތަކުން ބަލާއިރު ވެސް ފުރިހަމަ ސިއްހަތެއްގައި ހުންނަ ކޮންމެ އިންސާނަކު ވެސް ކުރަން ވަރަށް ރަނގަޅުކަމެއް މިއީ ލޭ ހަދިޔާކުރުން،" ރަފިއްޔާ ވިދާޅުވިއެވެ.
ރަފިއްޔާ ވަނީ މިފަދަ ބޮޑު އިވެންޓެއް ބާއްވާތީ ސަން ސިޔާމް ގުރޫޕްގެ ބާނީ އަހްމަދު ސިޔާމް މުހައްމަދާއި އެ ކުންފުނީގެ އިސްވެރިންނަށް މަރުހަބާ އާއި ޝުކުރު ދަންނަވާފައެވެ.