ނ. މަނަދޫގައި ޒަޚަމްތަކަކާއެކު މަރައިލައިފައި އޮއްވާ ފެނުނު ނައީމާ މޫސާގެ މަރަށް މިއަދަށް ތިން ހަފުތާ އާއި ހަތަރު ދުވަސް ވީއެވެ. އަދިވެސް މަނަދޫގައި އޮތީ އެ ބިރުވެރިކަމެވެ. ރަށުތެރޭގައި އަދިވެސް މީހުން ކަންބޮޑުވުމާއެކު ދައްކާ ވާހަކައަކީ އެއީއެވެ.
ނައީމާ މަރުވެފައި އޮއްވާ ފެނުނީ މި މަހުގެ ފަސް ވަނަ ދުވަހުން ފެށިގެން ޚަބަރެއް ނުވެގެން ހޯދަމުން ދަނިކޮށް އޭގެ ދެ ދުވަސް ފަހުންނެވެ. އޭނާގެ ޚަބަރެއް ނުވެގެން އެކަން ފުލުހުންނަށް ރިޕޯޓުކުރީ ހުކުރު ދުވަހު އިރުއޮއްސި 6:13 ހާއިރެވެ. އޭނާއަކީ ރަށުތެރެ ކުނި ކެހުމުގެ މަސައްކަތް ކުރި އެ ރަށު ކައުންސިލްގެ މުވައްޒަފެކެވެ.
ފުލުހުން ނައީމާގެ ކޮޓަރީގެ ދޮރު ހަލާކުކޮށްލައިގެން ވަންއިރު، އޭނާ އޮތީ ބިންމަތީގައި މަރުވެފައެވެ. އެނގިފައިވާ ގޮތުގައި އޭނާ މަރުވެފައި އޮތީ ގިނަ އަދި ބައެއް ބޮޑެތި ޒަޚަމްތަކަކާއެކުއެވެ.
ނައީމާގެ މަރަށް މިހާ ދުވަސްވެފައިވާއިރު ވާހަކަތައް ވަނީ ތަފާތު ގޮތްގޮތަށް ދެކެވިފައެވެ. އެއީ ރޭޕްގެ މައްސަލައެއް ކަމާއި ނައީމާ މަރާލީ ޖިންސީ އަނިޔާ ދިނުމަށްފަހު ކަމަށް ވެސް ތުހުމަތު ކުރިއެވެ. އެ ކަމުގެ ތުުހުމަތު ބިދޭސީއަކަށް ވެސް ކުރިއެވެ. އެކަމަކު މިކަމަށް ބާރުލިބޭ އެއްވެސް ހެއްކެއް އޭރަކުވެސް ނުހޯދުނެވެ. އެ ވާހަކަތައް މިހާރު ރަށުތެރޭގައި ވަނީ އޮބިފައެވެ.
އޭގެ ފަހަށް، މަހެއް ވާން ކައިރިވެފައިވާއިރު އެ ރަށުތެރޭގައި އަނެއްކާ ވެސް އައު ވާހަކައެއް ވަނީ ދައުރުވާން ފަށައިފައެވެ.
މި ފަހަރު ނައީމާގެ މަރުގެ ތުހުމަތު ކުރަނީ އޭނާއާ އާއިލީ ގޮތުން ވަރަށް ގާތް ގުޅުމެއް އޮންނަ މީހަކަށެވެ. އެކަމަކު، އާއިލީ ގޮތުން ގުޅުން އޮތްކަމުގައި ވިޔަސް އޭނާއަކީ ނައީމާ ދެކެ އިންތިހާއަށް ރުޅިއަންނަ މީހެއް ކަމަށް އެރަށު މީހުން ބުނެއެވެ.
ނައީމާގެ މަރުގެ ތުހުމަތު އެ ރަށު މީހުން ކުރާ މީހާއަކީ މީގެ ކުރިން އެ ރަށުގެ ސަރުކާރުގެ ގިނަ މުއައްސަސާތަކެއްގައި ޒިންމާދާރު މަގާމުތަކެއް ވެސް ފުރައިފައިވާ މީހެކެވެ. އެއީ މީހުން ވަރަށް ގަދަރު ކުރި މީހެއް ވެސް މެއެވެ.
އެކަމަކު، މި ފަހުން އޭނާ ވަނީ މަސްތުވާތަކެތީގެ ވަބާގެ ތެރެއަށް ގޮސް ހުސްވެފައިކަމަށްް އެ ރަށުން ވާހަކަ ދެއްކި މީހުން ކިޔައިދިނެވެ.
ނައީމާގެ މަރަށް އޭނާއަށް ތުހުމަތު ކުރެވޭއިރު، މީގެ ކުރިން ވެސް އެންމެ ބާރަށް ދެކެވުނު އެއް ވާހަަކައަކީ ނައީމާއަކީ ސިހުރު ހަދާ މީހެއް ކަމެވެ. އެ ވާހަކަ ހިފައިގެން އެންމެ ބާރަށް ދުއްވާ ވެހިކަލަކީ މިހާރު ނައީމާގެ މަރުގެ ތުހުމަތު މި ކުރާ މީހާއެވެ.
"ރަށުން ބޭރު މީހަކާ ކައިވެނިކޮށްގެން އުޅޭނީ. ރަށުތެރޭގައި ކިޔަނީ އޭނާގެ އަންހެނުންނަށާ ދަރިއަކަށް ނައީމާ ސިހުރު ހެދީއޭ. ދެން އެ ކަން އެނގުނީއޭނާ މާލެ ގޮސް އެ ކަން ބެލީމައޭ،" އެ ރަށުން ވާހަކަދެއްކި މީހަކު ބުންޏެވެ.
ތުހުމަތު އޮތް މީހާ ވަރަށް ފަހުން މާލެ އައި ކަން ވެސް އެ ރަށުގެ ބައެއް މީހުން ކަށަވަރު ކޮށްދެއެވެ. ނައީމާ މަރުވީ އޭނާ ރަށަށް ދިޔަތާ މާ ގިނަ ދުވަހެއް ނުވެއެވެ. އަދި އެ ފަހުން ވެސް ނައީމާ ދެކެ ވަރަށް "ރުޅިއަރައިގެން" އޭނާ އުޅުންކަމަށް ވެސް ބައެއް މީހުން ބުނެއެވެ.
އޭނާއަށް ރައްޔިތުން ތުހުމަތު ކުރާ އިތުރު ސަބަބެއް ވެސް އެބައޮތެވެ. ނައީމާގެ މަރަށް ފަހު އޭނާ މީހުންގެ ކައިރީގައި ދައްކައިފައިވާ ވާހަކަތަކެވެ. އަދި އޭނާގެ ސިފައަށް ވެސް އައިސްފައިވާ ބަދަލެވެ.
"އޭނާ ގޮސް މީހުން ކައިރީގައި ކިޔަނީ ނައީމާ މަރާލީ ޖިންނިއެކޭ،" މަނަދޫން ވާހަކަދެއްކި މީހަކު ބުންޏެވެ.
އެ ރަށު މީހުން ބުނާ ގޮތުގައި އޭނާ ވަނީ ނައީމާގެ މަރަށްފަހު އޭނާ ދިގުކޮށްފައިހުރި ނިޔަފަތިތައް ކަނޑައި، ބޯ ވެސް ބާލައިފައެެވެ. މި ކަންކަން ވެސް އެ ރަށު މީހުން ގުޅުވަނީ މި ތުހުމަތާއެވެ.
މި ކަން ހިނގި ފަހުން މާ ގިނައިން ބޭރުތެރެއިން ވެސް އޭނާއެއް ނުފެނެއެވެ. އަދި އޭނާގެ އުޅުމަށް ވެސް ބަދަލުތަކެއް އައިސްފައިވާކަަމަށް ބުނެއެވެ.
މި ތުހުމަތުތައް އޮތް ނަމަވެސް، މި ކަން ކުރީ އޭނާކަން ސާބިތުވާނެ ހެއްކެއް ނެތެވެ. އެެހެންވެ، ފުލުހުންނަށް ވެސް އޭނާގެ އެއްވެސް ކަމެއް އަދި ބަލާ ފާސްކުރެވިފައެއް ވެސް ނުވެއެވެ.
"ގާތިލު މި ރަށުގައި އުޅޭކަމަށް ގިނަ ބަޔަކު ގަބޫލުކުރަނީ. ރަށު ތެރެ އަދިވެސް ވަރަށް ބިރުވެރި،" އެ ރަށުން ވާހަކަދެއްކި މީހަކު ކިޔައިދިނެވެ.
އެ ނޫނަސް އެ ރަށުގައި ދެކެވޭ ވާހަކައެއް އެބައޮތެވެ. އެއީ ނައީމާގެ މަރަކީ ވަރަށް ސްމާޓް ބަޔަކު ވަރަށް ސްމާޓްކޮށް ކޮށްފައިވާ ކަމެއް ކަމެވެ. އޭގެ ހެކިތައް ބޭރު ނުވާގޮތަށް ކޮށްފައިވާ ކަމެއް ކަމެވެ.
"ކިޔާ އުޅޭ ޕީޕީއީ ކިޓު ލައިގެން ކުރި ކަމެކޭ. އަތަށް އަންގިއާ އެއްޗެހި އަރުވައިގެންނޭ،" ރަށުގައި ފެތުރޭ ވާހަކަތަކަކީ މިއެވެ.
ނައީމާއަށް ސިހުރުގެ ތުހުމަތުތައް އެ ރަށުގެ ބައެއް މީހުން ކުރެއެވެ. އޭނާގެ ތިން ދަރިން ވެސް ތިބޭއިރު، އާއިލާއާ އޮންނަ ގުޅުން ވެސް ކުޑައީ އެހެންވެ ކަމަަށް ބުނެއެވެ. އެކަމަކު، ނައީމާއަށް ކުރާ މި ތުހުމަތުތައް ދޮގުކުރާ މީހުން ވެސް އެބަ އުޅެއެވެ.
ނައީމާގެ މަރަށް މަހެއްވާން ކައިރިވެފައިވާއިރު، ފުލުހުން މި ކަމާ ގުޅިގެން މާ ގިނަ ވާހަކައެއް ނުދައްކައެވެ. މީހަކު ހައްޔަރުކޮށްފައި ނުވާއިރު، ތުހުމަތު އޮތް މީހެއްގެ ވާހަކައެއް ވެސް ނުދައްކައެވެ.
މީގެ 10 ވަރަކަށް ދުވަސްކުރިން، މަނަދޫގެ ގޭގެއަށް ގޮސް، މައުލޫމާތު ނަގައި ބައެއް މީހުންގެ ފިންގާޕްރިންޓް ފަދަ ސާމްޕަލްތައް ވަނީ ނަގައިފައެވެ.
ޕޮލިސް ކޮމިޝަނަރު މުހައްމަދު ހަމީދު ވަނީ ނައީމާގެ މަރުގެ ތަހުގީގު ޓީމަށް ފުރިހަމަ އިތުބާރު އޮތް ކަމަށް ވިދާޅުވެފައެވެ.
އެކަމަކު، މި ކަމާ ގުޅިގެން، މަނަދޫ ރައްޔިތުންގެ ކަންބޮޑުވުންތައް ބޮޑެވެ. އެ މީހުން ބުނާ ގޮތުގައި، ނައީމާގެ މަރުގެ ތަހުގީގު ކުރިއަށް ދަނީ "ފިނިހަކަ ދުވެލީގަ"އެވެ.
ގާތިލު ވީ ތަނެއް ވެސް ނޭނގި އެ ރަށު ތެރޭގައި އަދިވެސް ވަނީ ބިރުވެރިކަމާއި ނާމާން ކަމެވެ.