މާލޭގެ ތިން މާރުކޭޓު އެއް އިމާރާތަކަށް ބަދަލުކޮށް، ޒަމާނީ މާރުކޭޓެއް އަޅަން ތައްޔާރުވަމުންދާ ކަމަށް މާލޭ ސިޓީ ކައުންސިލުން ބުނެފިއެވެ.
އެ އިމާރާތް އަޅަނީ މަސް މާރުކޭޓާއި ލޯކަލް މާރުކޭޓު ހުންނަ ސަރަހައްދުގައެވެ.
މާލޭ ސިޓީގެ މޭޔަރު ޑރ. މުހައްމަދު މުއިއްޒު މިއަދު "ސަން"އަށް ވިދާޅުވީ އެ މަސައްކަތުގެ ދަށުން މާލޭ ދަތުރުވެރިންގެ މާރުކޭޓާއި ލޯކަލް މާރުކޭޓުގެ އިތުރުން މަސް މާރުކޭޓު އެއް އިމާރާތަކަށް ބަދަލުކުރާނެ ކަމަށާއި އެ އިމާރާތް ވެގެން ދާނީ ހަތަރު ފަންގިފިލާގެ އިމާރާތަކަށް ކަމަށެވެ.
"އެ މާރުކޭޓުގެތަކުގެ އިތުރުން، އިތުރު މަސައްކަތަކަށް ވެސް އެ އިމާރާތުގައި ޖާގަ ހުންނާނެ، އެހެންވީމަ މިހާރު މާރުކޭޓުތައް ހުންނަ އެ ސަހަރައްދަށް ވެސް ވާނެ ލިބޭ ވަރަށް ބޮޑު ލުޔަކަށް،" އޭނާ ވިދާޅުވިއެވެ.
މޭޔަރު ވިދާޅުވީ އަލަށް އިމާރާތްކުރާ އެ މާރުކޭޓުގައި ޕާކް ކުރެވޭނެ އިންތިޒާމުވެސް ހަމަޖައްސާނެ ކަމަށާއި އެއީ އާއްމުންނަށް ފަސޭހަކޮށްދިނުމުގެ ގޮތުން ކަމަށެވެ.
މި މަސައްކަތް ފެށޭނީ ލޯކަލް މާރުކޭޓު އެހެން ސަރަހައްދަކަށް ބަދަލުކޮށްގެން ކަމަށާއި، އެކަމަށް މަޝްވަރާތައް މިހާރު ކުރަމުންދާ ކަމަށް ވެސް އޭނާ ވިދާޅުވިއެވެ. އެކަން ކުރަން ބޭނުންވަނީ ވިޔަފާރިވެރިންނަށް ގެއްލުން ނުވާ ގޮތަށް ކަމަށާއި، އެމީހުންގެ ވިޔަފާރި ނުހުއްޓޭ ގޮތަކަށް އެ މަސައްކަތް ކުރަން ބޭނުންވާ ކަމަށް އޭނާ ވިދާޅުވިއެވެ.
ޑރ. މުއިއްޒު ވިދާޅުވީ، މިހާރު އެކަމަށް މާލީ ގޮތުން ކުރަން ޖެހޭ ކަންކަން ކޮށް ނިމިފައިވާ ކަމަށާއި އެތަނުގެ ކުރެހުމުގެ މަސައްކަތް މިހާރު ކުރިއަށްދާ ކަމަށެވެ. އަދި އެ މަސައްކަތް ނިމި މި މަސައްކަތް ފެށޭނެ ކަމަށް ވެސް އޭނާ ވިދާޅުވިއެވެ.
މާލޭގައި އިމާރާތްކުރާ ހަތަރު ފަންގިފިލާގެ މި އިމާރާތުގެ މަސައްކަތް ކުރަން ހަމަޖެހިފައި ވަނީ މާލޭ ސިޓީ ކައުންސިލުގެ އަމިއްލަ ބަޖެޓުންނެވެ.