ހިޔާގެ ބައެއް ޓަވަރުތަކަށް ކަރަންޓް ދޭން ތިން ގަޑިއިރު ނަގާނެ ކަމަށް ސްޓެލްކޯ އިން ބުނެފިއެވެ.
ހިޔާގެ ބައެއް ޓަވަރުތަކުން ކަރަންޓް ކެނޑުނީ މިއަދު އިރުއޮއްސެން ކައިރިވެފައި ވަނިކޮށެވެ.
އެޗްޑީސީން ބުނީ ކަރަންޓް ކެނޑުނީ ހިޔާގެ އެޗް 1 އިން އެޗް 8 އަށް ދިމާވި ޓެކްނިކަލް މައްސަލައަކާ ގުޅިގެން ކަމަށެވެ. ކަރަންޓް ކެނޑުނު ބައެއް ޓަވަރުތަކަށް މިހާރު ވަނީ އަލުން ކަރަންޓް ދީފައެވެ.
ދިމާވި ޓެކްނިކަލް މައްސަލަ ހައްލުކޮށް ކަރަންޓް ނުދެވިވާ ޓަވަރުތަކަށް ކަރަންޓް ދިނުމުގެ މަސައްކަތް ސްޓެލްކޯއިން އަންނަނީ ކުރަމުންނެވެ.
ސްޓެލްކޯއިން ބުނީ ހިޔާގެ ބައެއް ޓަވަރުތަކުން ކަރަންޓްގެ ޚިދުމަތް މެދުކެނޑެން މެދުވެރިވި، ހިޔާގެ ފުރަތަމަ ޓަވަރުގެ ސަބްސްޓޭޝަންގެ ސްވިޗްގިއާ ބަދަލުކުރުމުގެ މަސައްކަތް ކުރިއަށްދާ ކަމަށެވެ.
"މި މަސައްކަތަކަށް ތިން ގަޑިއިރު ހޭދަވާނެ ކަމަށް ލަފާކުރެވޭ. ދިމާވާނެ ދަތިތަކަށް މައާފަށް އެދެން،" ސްޓެލްކޯއިން ބުންޏެވެ.
ކަރަންޓް ދިޔަ ޓަވަރުތަކުގައި ދިރިއުޅުނު މީހުން ރޯދަ ވީއްލީ އަނދިރީގައެވެ. ކޮންމެ ޓަވަރެއްގައި ދެހާހެއްހާ މީހުން ދިރިއުޅޭއިރު ކަރަންޓް ކެނޑި ގިނައިރުތަކެއް ވުމަކީ އެތަކެއްގޮތަކުން އެ ރައްޔިތުންނަށް ދަތިތަކާ ކުރިމަތިލާންޖެހޭނެ ކަމެކެވެ.
މީގެކުރިން ވެސް ހިޔާގެ ބައެއް ޓަވަރުތަކުން ކަރަންޓް ކެނޑިފައިވެއެވެ. އެފަހަރު ކަރަންޓް ކެނޑުނީ މަގު ކޮނުމުގެ ތެރޭގައި ކޭބަލެއް ބުރިވެގެންނެވެ.