ބޮޑީބިލްޑިން އެސޯސިއޭޝަން އޮފް މޯލްޑިވްސް (ބީބީއޭއެމް)ގެ ރައީސްގެ މަގާމަށް އަނެއްކާ ވެސް އިބްރާހިމް ހަމީދު (އިއްބެ) އިންތިހާބުވެއްޖެއެވެ.
އިއްބެ އަކީ މިހިނގާ ދައުރުގެ ބީބީއެމްގެ ރައީސް ވެސްމެއެވެ. ކުރިއަށް އޮތް ދައުރަށް އޭނާ އިންތިހާބުވުމާއެކު އޭނާއަށް ޖެހިޖިހިގެން ތިން ދައުރު އެ އެސޯސިއޭޝަންގެ ރައީސްގެ ދައުރު އަދާކުރެވޭނެއެވެ.
އޭނާއާއެކު 2023-2027 ގެ ދައުރަށް ހިންގާ ކޮމިޓީ އަށް އިންތިހާބުވި މެންބަރުންގެ ތެރޭގައި ހިމެނެނީ ވައިސް ޕްރެޒިޑެންޓް/ޓްރެޝަރާ އަހުމަދު އައިމަން، އެގްޒެކްޓިވް މެމްބަރު އަހުމަދު ލިޒާމް، އެގްޒެކްޓިވް މެމްބަރު މުހައްމަދު ނަޒީހު އަދި އެގްޒެކްޓިވް މެމްބަރު މުހައްމަދު ނާޝިދުއެވެ.
އިއްބެ އަކީ ރާއްޖޭގައި މި ކުޅިވަރު ކުރިއަރުވަން ނުހަނު ގިނަ މަސަައްކަތްތަކެއް ކޮށްފައިވާ އަދި މިއަދު ވެސް އެފަދަ ގިނަ މަސައްކަތްތަކެއް ކުރަމުން އަންނަ ފަރާތެކެވެ.
އިއްބެ އަކީ ބޮޑީބިލްޑިންގެ ބައިނަލްއަގުވާމީ ފެންވަރުގެ ޖަޖެއްވެސް މެއެވެ. އެކި ގިންތިތަކުގެ މުބާރާތްތަކުގައި ޖަޖެއްގެ ގޮތުގައި އިއްބެ އިންސާފުކޮށްފައިވެއެވެ. މީގެއިތުރުން އޭނާ އަކީ ބޮޑީބިލްޑިންގެ ދުނިޔޭގެ ފެޑެރޭޝަން، ވޯލްޑް ބޮޑީބިލްޑިން އެންޑް ފިޒީކް ފެޑެރޭޝަން (ޑަބްލިއުބީޕީއެފް)ގެ ނައިބު ރައީސްއެވެ. އޭނާ އެ މަގާމަށް އިންތިހާބުކޮށްފައި ވަނީ މިދިޔަ ޑިސެމްބަރު މަހުގެ އަށްވަނަ ދުވަހުގައެވެ.
އެގޮތުން އިއްބެ ހަރަކާތްތެރިވި މުބާރާތްތަކަށް ބަލާއިރު، ވޯލްޑް ޗެމްޕިއަންޝިޕް، އޭޝިއަން ޗެމްޕިއަންޝިޕް، ސައުތު އޭޝިއަން ޗެމްޕިއަންޝިޕްގެ އިތުރުން ފާއިތުވި އަހަރު ބޭއްވި ސައުތު އީސްޓް އޭޝިއަން ގޭމްސް ހިމެނެއެވެ. ރާއްޖޭގެ އިތުރުން ބައިނަލްއަގްވާމީ ފެންވަރުގައިވެސް އިއްބެ އަކީ ގިނަބައެއްގެ އިތުބާރު ހޯދާފައިވާ ޝަހްސިއްޔަތެކެވެ.