ރަމަޟާން މަހު ހެޔޮ އަމަލު ކުރާ ފަދައިން ހެޔޮ އަމަލު ކުރުން މަތީ ދެމިހުރެއްޖެނަމަ މާތްﷲ ގެ އިރާދަފުޅުން އެމީހެއްގެ ހަޔާތުގައި ބާކީ ދުވަސްތައް ރަނގަޅުކޮށްދެއްވާނެކަމަށް އިސްލާމިކް މިނިސްޓަރު ޑރ. އަޙުމަދު ޒާހިރު އަލީ ވިދާޅުވެއްޖެއެވެ.
ރަމަޟާން މަހުގެ ރޭތައް އިޙްޔާކުރުމަށް މިއަހަރު ބޭއްވި ފުރަތަމަ ފޯރަމް ރޭ ފައްޓަވައިދެއްވައި ތަޤުރީރުކުރައްވަމުން މިނިސްޓަރު ވިދާޅުވީ، ކީރިތި ރަސޫލާ ﷺގެ ޙަޔާތްޕުޅަށް ބަލާލުމުން، ރަމަޟާން މަހަށް އެކަލޭގެފާނު ޚާއްޞަ ސަމާލުކަމެއް ދެއްވި މަންޒަރު ފެންނާނެކަމަށެވެ. އެގޮތުން ރަމަޟާން މަހަށް ތައްޔާރު ވުމަށްޓަކައި ޝަޢުބާން މަހު ރޯދައަށް ހުންނެވުމާއި، ރަމަޟާން މަސް އައުމުން، ޞަޙާބީ ބޭކަލުންނަށް ދެއްވާ އިރުޝާދުތަކުން މި މައްސަރަކީ ޚާއްޞަ ގަދަރެއް ދެވިގެންވާ އަދި، ވަރަށް އަހައްމިއްޔަތުކަން ދެއްވި މައްސަރެއްކަން ފާހަގަވާ ކަމަށް މިނިސްޓަރު ވިދާޅުވިއެވެ.
ރަމަޟާންމަހުގެ ރޭތައް އިޙްޔާކުރުމަށް މިއަހަރު ބޭއްވި ފުރަތަމަ ފޯރަމް / ފޮޓޯ: އިސްލާމިކް މިނިސްޓްރީ
ރޭގެ މައުޟޫއެއްގެ ގޮތުގައި ކަނޑައަޅާފައިވަނީ ''ހެޔޮ ބަދަލަކަށް ރަމަޟާން'' މި މައުޟޫއެވެ. މިނިސްޓަރު ވިދާޅުވީ، ދޮގު ވާހަކަތައް ދެއްކުމާއި ދޭތެރެޖެއްސުމާއި، މީހުންގެ ގާތަށް ވާހަކަ ހިފައިގެން ދިޔުންފަދަ ކަންކަމުން ދުރުހެލިވާން ޖެހޭކަމަށެވެ. އަދި ރަމަޟާން މަހު ކުރާ އަމަލުތަކަކީ މާތްﷲ އަންގަވާފައިވާ ކަންތައްތަކާ އެއްގޮތަށް ކުރެވޭ އަމަލުތަކަކަށް ވާންޖެހޭ ކަމަށް ވިދާޅުވެ، ރޯދަ ހިފި ކަމުގައިވިޔަސް މާތްﷲގެ ހަޟްރަތުން ދަރުމައާއި ސަވާބަށް އެދިގެން އުންމީދާއެކު އެކަމެއް ކުރުމަށް މިނިސްޓަރު ނަސޭހަތްތެރިވެ ވަޑައިގެންނެވިއެވެ.
މީގެ އިތުރުން ފޯރަމްގައި ތަގްރީރު ކުރައްވަމުން އައްޝައިޚް ޙަސަން ލަޠީފް މޫސާ ވިދާޅުވީ އިންސާނުންނަކީ ވަރަށް ބޮޑެތި ގޮންޖެހުންތައް ކުރިމަތިވާ ބައެއް ކަމަށާއި އެންމެ ބޮޑު އަދާވާތްތެރިއަކީ ޝައިޠާނާކަމަށެވެ. އެހެންކަމުން ޝައިޠާނީ ވަސްވާސްތަކުން ސަލާމަތްވެ ތިބެގެން ނޫނީ ރަނގަޅު ހެޔޮ ބަދަލެއް ޙަޔާތަކަށް ނުގެނެވޭނެކަމަށާއި، އެކަމަށްޓަކައި އެންމެންވެސް ގަދައަޅައި މަސައްކަތް ކުރަން ޖެހޭނެ ކަން ފާހަގަކުރެއްވިއެވެ.
އައްޝައިޚް ޙަސަން ލަޠީފް މޫސާ ތަގްރީރުކުރައްވަނީ / ފޮޓޯ: އިސްލާމިކް މިނިސްޓްރީ
އަދި ރަމަޟާން މަސް އައުމުން މިގޮތަށް ޢަމަލުކުރުމަށް ފަހު ރަމަޟާން މަސް ފާއިތުވުމުން އަނެއްކާވެސް ކުރީގެ ދިރިއުޅުމަށް އެނބުރިދެވޭކަން ފާހަގަކުރައްވައި ޝައިޚް ވިދާޅުވީ ރަމަޟާން މަހަކީ ދިރިއުޅުމަށް ހެޔޮ ބަދަލެއް ގެނެވޭ މަހަކަށް ހަދަންޖެހޭކަމަށެވެ.
ޝައިޚްގެ ވާހަކަފުޅުގައި، ރަމަޟާން މަހަކީ ތަގުވާވެރިވުމުގެ ފުރުސަތު ލިބޭ މައްސަރެއްކަމާއި، ފާފަ ފޮހެވުމުގެ ފުރުސަތާއި، އެންމެ ރެއަކުން މުޅި އުމުރުގެ ދަރުމަ ލިބޭ މައްސަރެއްކަން ފާހަގަކުރެއްވިއެވެ. އެގޮތުން ހެޔޮބަދަލެއް ގެނައުމަށް ކުރެވިދާނެ ކަންތައްތަކަށް ވަރަށް ތަފުސީލުކޮށް ބައްލަވާލެއްވިއެވެ.
މިއަހަރު މާލޭގައި ޖުމްލަ 14 އިޙްޔާ ފޯރަމް ބޭއްވުމަށް އިސްލާމިކް މިނިސްޓްރީން ވަނީ ނިންމާފައެވެ. އެއީ އާންމުކޮށް ބާއްވާ، ޢިލްމުވެރިން ބައިވެރިވެވަޑައިގަންނަވާ ނުވަ ފޯރަމާއި ސްކޫލުތަކުން ބާއްވާ އިހްޔާ ފޯރަމްގެ ހަތަރު ޕްރޮގްރާމެވެ. އަތޮޅުތަކުގައި މިއަހަރު އަށް ފޯރަމް ބާއްވާއިރު އަތޮޅުތަކުގެ ފޯރަމްތައް މިރޭ ފެށޭނެއެވެ. އެންމެ ފުރަތަމަ އޮތީ އައްޑޫ ސިޓީގައި ބާއްވާ އިޙްޔާ ފޯރަމެވެ.