ވިންޑޯޒް ޑެސްކްޓޮޕަށް ޚާއްސަ ވަޓްސްއެޕް އެޕްލިކޭޝަންއިން އެއް ފަހަރާ އަށް މީހުންނަށް ވީޑިއޯ ކޯލް ކުރެވޭ ގޮތް ހަދައިފިއެވެ.
މެޓާގެ ވެރިޔާ މާކް ޒަކަބާގް ކުރި އިއުލާނެއްގައި ބުނީ އާ އެޕްގެ ސަބަބުން އެއްފަހަރާ އަށް މީހުންނަށް އެންޑް ޓު އެންޑް އެންކްރިޕްޓެޑް ވީޑިއޯ ކޯލްތައް ކުރެވޭނެ ކަމަށާއި 32 މީހުންނަށް އެއް ފަހަރާ އޯޑިއޯ ކޯލް ކުރެވޭނެ ކަމަށެވެ.
މެޓާއިން ވަނީ އެ ކުންފުނީގެ އެހެން އެޕްތަކަށް ދާދި ފަހުން ގެނައި ބައެއް އަޕްގްރޭޑްތައް ވެސް ފާހަގަކޮށްފައެވެ. އެގޮތުން މެސެންޖާއިން ވަނީ އާ ޑިވައިސްތައް ޔޫޒާ އެކައުންޓްތަކާ ގުޅުވައިލުމަށް ފަސޭހަ އަދި އަވަސް ގޮތެއް ތައާރަފުކޮށް، މަލްޓި ޑިވައިސް ކެޕޭސިޓީ އަޕްޑޭޓްކޮށްފައެވެ. އަދި ލިންކް ކޮށްފައިވާ ހަތަރު ޑިވައިސްއެއްގައި އެއްފަހަރާ ޗެޓްތަކަށް ވަދެވޭނެ ގޮތަށް ވެސް ވަޓްސްއެޕްއިން ވަނީ ހަދާފައެވެ.
ވަޓްސްއެޕްއިން ވިންޑޯޒް 10އަށް ޚާއްސަ އެޕް ނެރުނީ މިދިޔަ އަހަރު ކަމަށްވާއިރު، މެކްއަށް ޚާއްސަ އެޕްގެ ބީޓާ ވާޝަން ހުރިހާ ޔޫޒަރުންނަށް ދޫކުރީ މިދިޔަ ޖެނުއަރީ މަހުއެވެ.
ވަޓްސްއެޕްއަކީ ޔާހޫގެ ކުރީގެ ދެ މުވައްޒަފަކު ކަމަށްވާ ބްރަޔަން އެކްޓަން އާއި ޖާން ކޫމް 2009 ވަނަ އަހަރު އުފެއްދި މަޝްހޫރު މެސެޖިން އެޕްލިކޭޝަނެކެވެ. މި އެޕް ކުރު މުއްދަތެއްގެ ތެރޭގައި މީހުންގެ މެދުގައި މަގުބޫލުކަން ހޯދީ ޔޫޒާ ފްރެންޑްލީ އިންޓަފޭސްއެއް ހުރުމުންނާއި ހިލޭ މެސެޖު ކުރުމުގެ ޚިދުމަތް ދޭތީއެވެ.
ދެހާސް ސާދަ ވަނަ އަހަރު ފޭސްބުކުން 19 ބިލިއަން ޑޮލަރަށް ވަޓްސްއެޕް ގަތްއިރު، އެ އެޕްގެ ޚިދުމަތް ފުޅާކޮށް، ވޮއިސް އަދި ވީޑިއޯ ކޯލިން ފަދަ އިތުރު ފީޗާސްތައް އިތުރު ކުރަން އެހީތެރިވެދިނެވެ.