ބެލަރޫސްގެ އިދިކޮޅު ލީޑަރު ސްވިތްލާނާ ސިޚަނޫސްކަޔާއަށް 15 އަހަރުގެ ޖަލު ހުކުމެއް އިއްވައިފިއެވެ.
ސްވިތްލާނާގެ މައްޗަށް މި ހުކުމް އިއްވާފައި ވަނީ އެ ގައުމުގެ ސަރުކާރު ވައްޓާލުމަށް ރާވާ، މަސައްކަތްކުރުމުގެ ކުށުގައެވެ. ބެލަރޫސްގެ ސަރުކާރުން ތުހުމަތުކުރާ ގޮތުގައި ސްވިތްލާނާ އަންނަނީ ޤާނޫނު އަސާސީ އާ ޚިލާފަށް ވެރިކަން ފުރޮޅާލައްވާ ބާރުތައް ހޯއްދެވުމަށް މަސައްކަތްކުރައްވަމުންނެވެ.
އުމުރުން 40 އަހަރުގެ ސްވިތްލާނާ ދިރިއުޅެމުން ގެންދަނީ ގައުމުން ބޭރުގައެވެ. އޭނާ ގައުމުން ބޭރަށް ވަޑައިގެންނެވީ 2020 ވަނަ އަހަރުގެ ރިޔާސީ އިންތިޚާބުގައި އޭރު ވެސް ރައީސްކަމުގައި ހުންނެވި އަލެކްސެންޑާ ލުކަޝެންކޯއާ ވާދަކޮށް ނާކާމިޔާބު ވުމުންނެވެ. އޭރުން ފެށިގެން އޭނާ ދިރިއުޅުއްވަމުން ގެންދަވަނީ އަވައްޓެރި ލިތުއޭނިޔާގައެވެ.
އިންތިހާބަށް ފަހު އިދިކޮޅުން ވަނީ، ނަތީޖާ އޮޅުވާލާފައިވާ ކަމަށް ތުހުމަތުކޮށް ލުކަޝެންކޯގެ ސަރުކާރާ ދެކޮޅަށް ވަރުގަދަ މުޒާހަރާތަކެއް ކޮށްފައެވެ. މި މުޒާހަރާތަކުން އިދިކޮޅުގެ އެތައް ބަޔަކު ހައްޔަރުކޮށް ޖަލަށްލާން ފެށުމުން އިދިކޮޅު ލީޑަރުންނަށް މަޖުބޫރުވީ ގައުމުން ފިއްލަވާށެވެ. އެފަހަރު 35،000 މީހުން ވަނީ ހައްޔަރުކޮށްފައެވެ.
ޖަލު ހުކުމާ ގުޅިގެން ސްވިތްލާނާ ވިދަޅުވީ އެ ހުކުމަކީ ޑިމޮކްރަސީ ކުރިއެރުވުމަށް މަސައްކަތް ކުރުމުގެ ސަބަބުން އޭނާގެ މައްޗަށް އައި ހުކުމެއް ކަމަށެވެ. ސްވިތްލާނާ ބުނީ އޭނާގެ މައްޗަށް ހުކުމް ކުރި ނަމަވެސް އެކަމާ ދޭތެރޭ އޭމާ ނުވިސްނާ ކަމަށެވެ.
"އަހަރެން ވިސްނަނީ އެތައް ހާސް މައުސޫމް މީހުންނާ މެދު. ނުހައްގުން ބަންދުކޮށްފައިވާ މީހުންނާ މެދު. އެއިން ކޮންމެ މީހަކު ދޫކޮށްލާންދެން އަހަރެން ހުއްޓާނުލާނަން." ސްވިތްލާނާ ބުންޏެވެ.
އަލެކްސެންޑާ، ބެލަރޫސްގެ ރައީސްކަން ކުރައްވަމުން ގެންދާތާ މިހާރު ވަނީ 30 އަހަރާ ގާތްވެފައެވެ.