ގޯލްޑެން ފުޓްސަލް ޗެލެންޖު 2023 ގެ ޒޯނު ބުރުގައި ކ. އަތޮޅުގެ ޗެމްޕިއަން ދިއްފުށި ކަޓުވާލުމަށްފަހު ބޮޑުފޮޅުދޫން ޒޯނު ތިނެއްގެ ފައިނަލަށް ދަތުރުކޮށްފިއެވެ.
ހުޅުމާލެ ރެހެންދި ފުޓްސަލް ދަނޑުގައި ކުޅުނު އެ މެޗު ބޮޑުފޮޅަދޫން ކާމިޔާބުކުރީ 6-1 ގެ ނަތީޖާއަކުންނެވެ. އެ މެޗުގައި ބޮޑުފޮޅުދޫގެ ގޯލުތައް ޖަހައިދިނީ ރުޙުޝާން ޖަމީލާއި، މުހައްމަދު ޝިރުހާންއާއި، ޖާދުﷲ އަހުމަދުގެ އިތުރުން އަލީ ޝަނީޒްއެވެ. މެޗުގައި ޖާދުﷲ ވަނީ ހެޓްރިކު ހަދައިފައެވެ. އަދި މެޗުގައި ދިއްފުށިން ޖެހި ހަމައެކަނި ގޯލު ޖަހައިފައިވަނީ ރިލްވާން ރަޝީދެވެ.
އެ މެޗަށް ދިއްފުށި ނިކުތުމުގެ ކުރިން މެޗު އެއްވަރު ކޮށްލައިގެން ވެސް ފައިނަލަށް ދެވެން އޮތެވެ.
އެ ޒޯނުގެ ފުރަތަމަ މެޗުން ގާފަރު ވަނީ 4-2 ނަތީޖާއަކުން ބޮޑުފޮޅަދޫ ބަލިކޮށްފައެވެ. އެހެންކަމުން ދެ މެޗު ކުޅެ ލިބުނު ހަ ޕޮއިންޓާއެކު ގާފަރު ވަނީ ޒޯނު ފައިނަލަށް ދަތުރުކޮށްފައެވެ.
އަށް ޒޯނަކަށް ބަހާލައިގެން ކުރިއަށް ގެންދާ އެ މުބާރާތުގެ ޒޯން ތިނެއްގައި ހިމެނެނީ ކ. އަތޮޅުގެ ޗެމްޕިއަން ދިއްފުއްޓާއި، އެ އަތޮޅުގެ ރަނަރަޕް ގާފަރާއި، ޅ. އަތޮޅުގެ ޗެމްޕިއަން ކުރެންދޫގެ އިތުރުން އއ. އަތޮޅުގެ ޗެމްޕިއަން ބޮޑުފޮޅަދޫއެވެ.
ދިއްފުށި ޒޯނުގެ ފުރަތަމަ މެޗުގައި ކުރެންދޫއާއި ވާދަކޮށް ވަނީ 5-1 ގެ ނަތީޖާއަކުން އެ ޓީމު މޮޅުވެފައެވެ. އަދި ޒޯނު ބުރުގެ ދެވަނަ މެޗުގައި ބޮޑުފޮޅުދޫއާއި ކުރެންދޫ ބައްދަލުކުރި މެޗު ވަނީ 3-3 ގެ ނަތީޖާއަކުން އެއްވަރުވެފައެވެ. އަދި ގާފަރާއި ދިއްފުށި ބައްދަލުކުރި މެޗު 3-1 ގެ ނަތީޖާއަކުން ވަނީ ގާފަރު ކާމިޔާބުކޮށް ޒޯނު ފައިނަލްގެ ޖާގައެއް ކަށަވަރުކޮށްފައެވެ.
އެހެންކަމުން މި މެޗާ ކުރިމަތިލިއިރު ގްރޫޕްގެ ދެވަނައިގައި ދިއްފުށި އޮތީ ތިން ޕޮއިންޓު ހޯދައިގެންނެވެ. އަދި ބޮޑުފޮޅުދޫއާއި ކުރެންދޫއަށް ލިބިފައިވަނީ އެންމެ ޕޮއިންޓެކެވެ.
އެ ޒޯނުގެ ފައިނަލް މެޗުގައި ބޮޑުފޮޅުދޫއާއި ގާފަރު ބައްދަލުކުރާ މެޗު ކުޅޭނީ މާދަމާރޭ 9:00 ގައެވެ.
ގޯލްޑަން ފުޓްސަލް ޗެލެންޖަކީ މީހުން ދިރިއުޅޭ ކޮންމެ ރަށަކުން ވެސް އެ ރަށަކަށް ނިސްބަތްވާ އެއް ޓީމަށް ހުޅުވާލައިގެން ކުރިއަށްގެންދާ މުބާރާތެކެވެ. ނަމަވެސް މާލެއާއި ފުވައްމުލަކުގެ ކޮންމެ އަވަށަކުން ޓީމެއް ބައިވެރިކުރުމުގެ ފުރުސަތު ވެސް ވަނީ ހުޅުވާލައިފައެވެ.
މިއަހަރުގެ ގޯލްޑެން ފުޓްސަލް ޗެލެންޖުގައި 102 ޓީމު ވަނީ ބައިވެރިވެފައެވެ. އެ މުބާރާތުގައި މި އަހަރު 242 މެޗު ކުޅުމަށް ވަނީ ހަމަޖެހިފައެވެ.
ގޯލްޑެން ފުޓްސަލް ޗެލެންޖުގެ މި އަހަރުގެ ބްރޯޑްކާސްޓިން ޕާޓްނަރެއްގެ ގޮތުގައި ހަމަޖައްސާފައި ވަނީ ސަން ސިޔާމް މީޑިއާއެވެ. ގޯލްޑެން ފުޓްސަލް ޗެލެންޖު 2023 ގެ ހުރިހާ މެޗެއް "އެސްއެސް ޓީވީ"ގެ ފޭސްބުކް ޕޭޖުންނާއި "އެސްއެސް ޓީވީ"އިން ލައިވް ކުރާނެއެވެ.